Nara Lokesh ఆంధ్రప్రదేశ్ రాష్ట్ర ఐటీ, విద్య శాఖల మంత్రి నారా లోకేష్కు అరుదైన గౌరవం దక్కింది. ఆస్ట్రేలియా ప్రభుత్వం ప్రతిష్టాత్మకంగా నిర్వహించే “స్పెషల్ విజిట్స్ ప్రోగ్రామ్ (SVP)”లో పాల్గొనాలని ఆస్ట్రేలియా హైకమిషన్ ప్రత్యేక ఆహ్వానం అందించింది.
ఆస్ట్రేలియా ఆహ్వానం: ఏపీ ఘనతకు నిదర్శనం
ఆస్ట్రేలియా హైకమిషనర్ ఫిలిప్ గ్రీన్ పంపిన లేఖలో, ఆంధ్రప్రదేశ్ ప్రభుత్వం సాధించిన పురోగతిని, ముఖ్యంగా మానవ వనరులు, సాంకేతిక రంగం మరియు ఆర్థికాభివృద్ధిని ప్రశంసించింది. విద్యారంగంలో రాష్ట్రం తీసుకొచ్చిన సంస్కరణలు, ముఖ్యంగా “ఏపీ మోడల్ ఆఫ్ ఎడ్యుకేషన్” దేశవ్యాప్తంగా ఒక ఆదర్శంగా నిలిచిందని లేఖలో పేర్కొన్నారు. ఈ ఆహ్వానం ఏపీ ప్రభుత్వం చేస్తున్న కృషికి లభించిన అంతర్జాతీయ గుర్తింపుగా చెప్పవచ్చు.
ప్రధాని మోడీ అడుగుజాడల్లో లోకేష్
ఈ స్పెషల్ విజిట్స్ ప్రోగ్రామ్ చాలా ప్రత్యేకమైనది. ఆస్ట్రేలియా ప్రభుత్వం గత 20 ఏళ్లలో భారత్కు చెందిన ప్రముఖ రాజకీయ నాయకులను మాత్రమే ఈ కార్యక్రమానికి ఆహ్వానించింది. 2001లో అప్పటి గుజరాత్ ముఖ్యమంత్రి నరేంద్ర మోడీ కూడా ఈ SVPలో పాల్గొని ఆస్ట్రేలియాతో సంబంధాలను బలోపేతం చేశారు. ఇప్పుడు అదే వేదికలో నారా లోకేష్ పాల్గొనడం ఆంధ్రప్రదేశ్ అభివృద్ధి ప్రాధాన్యతకు ప్రత్యేక గుర్తింపునిచ్చింది.
ఏపీ అభివృద్ధికి కొత్త మార్గాలు
ఈ పర్యటన ద్వారా నారా లోకేష్కు ఆస్ట్రేలియాలోని కీలక రాజకీయ నాయకులు, విద్యావేత్తలు, వ్యాపారవేత్తలు మరియు ప్రవాస భారతీయులతో సమావేశమయ్యే అవకాశం లభించనుంది. ఈ పర్యటనలో విద్య, నైపుణ్యాభివృద్ధి, పెట్టుబడులు, ఆక్వాకల్చర్, మౌలిక సదుపాయాలు మరియు ఐటీ రంగం వంటి విభాగాలపై చర్చలు జరగనున్నాయి. ముఖ్యంగా స్టార్టప్లు, ఇన్నోవేషన్ మరియు డిజిటల్ ట్రాన్స్ఫర్మేషన్ రంగాల్లో ఏపీ-ఆస్ట్రేలియా మధ్య సహకారం పెంపొందించడంపై లోకేష్ దృష్టి పెట్టనున్నారు.
Sadhguru : రెండు బ్రెయిన్ సర్జరీల తర్వాత సాహస యాత్ర చేపట్టిన సద్గురు
ఆస్ట్రేలియా ఆహ్వానంపై లోకేష్ సంతోషం వ్యక్తం చేస్తూ, ఈ అవకాశాన్ని రాష్ట్ర అభివృద్ధి దిశగా మలచుకుంటానని తెలిపారు. ఈ పర్యటన ద్వారా విద్యా వ్యవస్థ, ఉద్యోగావకాశాలు , ఐటీ పెట్టుబడులకు కొత్త మార్గాలు తెరవగలనని ఆయన పేర్కొన్నారు.