Nara Lokesh Narsaraopet Tour : పల్నాడు గడ్డపై పసుపు జెండాలు రెపరెపలాడాయి. జననేత రాకతో ఆ ప్రాంతమంతా గులాబీ రంగును తలపించేలా కాదు కదా, అచ్చంగా పసుపుమయంగా మారిపోయింది. రాష్ట్ర విద్య, ఐటీ శాఖల మంత్రి, టీడీపీ జాతీయ వర్కింగ్ ప్రెసిడెంట్ నారా లోకేష్ నరసరావుపేట పర్యటన అసాధారణ ఉత్సాహం మధ్య అంబరాన్ని తాకింది. స్థానిక ఎమ్మెల్యే చదలవాడ అరవిందబాబు సారథ్యంలో జరిగిన ఈ భారీ ర్యాలీ మరియు అభివృద్ధి కార్యక్రమాలు రాజకీయ వర్గాల్లో ప్రస్తుతం హాట్ టాపిక్గా మారాయి.
పసుపుమయమైన ప్రధాన రహదారులు – ఘన స్వాగతం: మంత్రి నారా లోకేష్ నరసరావుపేటకు విచ్చేసిన సందర్భంగా తెలుగు దేశం పార్టీ శ్రేణులు, అభిమానులు భారీ ఎత్తున తరలివచ్చారు. ఎస్ఆర్కేటీ కాలనీ బైపాస్ నుంచి ప్రారంభమైన ఈ భారీ ర్యాలీ మల్లమ్మ సెంటర్, ఆర్టీసీ బస్టాండ్ మీదుగా కాకాని జేఎన్టీయూ వరకు కోలాహలంగా సాగింది. నరసరావుపేట ఎమ్మెల్యే డాక్టర్ చదలవాడ అరవిందబాబు ఆధ్వర్యంలో జరిగిన ఈ జన సమీకరణ పార్టీ శ్రేణుల్లో నూతనోత్సాహాన్ని నింపింది. మార్గమధ్యంలో నాయకులు, కార్యకర్తలు మంత్రి లోకేష్పై పూలవర్షం కురిపించి ఘన స్వాగతం పలికారు.
అగ్రనేతల భాగస్వామ్యం: ఈ భారీ ర్యాలీ, పర్యటనలో ఉమ్మడి గుంటూరు, పల్నాడు ప్రాంతాలకు చెందిన ప్రముఖ ప్రజాప్రతినిధులు పెద్ద సంఖ్యలో పాల్గొన్నారు. పల్నాడు జిల్లా ఇన్చార్జి మంత్రి గొట్టిపాటి రవికుమార్, ఎంపీ లావు శ్రీకృష్ణదేవరాయలు, వినుకొండ ఎమ్మెల్యే జీవీ ఆంజనేయులుతో పాటుగా పెదకూరపాడు ఎమ్మెల్యే భాష్యం ప్రవీణ్ మాచర్ల ఎమ్మెల్యే జూలకంటి బ్రహ్మారెడ్డి చిలకలూరిపేట ఎమ్మెల్యే ప్రత్తిపాటి పుల్లారావు గురజాల ఎమ్మెల్యే ఎరపతినేని శ్రీనివాసరావు తదితరులు ఈ కార్యక్రమంలో పాల్గొని పర్యటనను విజయవంతం చేశారు.
జేఎన్టీయూలో రూ.70 కోట్లతో అభివృద్ధి పనుల ప్రారంభం: ర్యాలీ అనంతరం మంత్రి నారా లోకేష్ కాకాని జేఎన్టీయూ యూనివర్సిటీ కాలేజ్ ఆఫ్ ఇంజినీరింగ్ క్యాంపస్కు చేరుకున్నారు. అక్కడ సుమారు రూ.70 కోట్ల భారీ వ్యయంతో అత్యాధునిక వసతులతో నిర్మించిన కావేరి, గౌతమి బాలుర, బాలికల హాస్టల్ భవనాలతో పాటు డైనింగ్ హాల్ను ఆయన ఘనంగా ప్రారంభించారు. విద్యార్థులకు మెరుగైన వసతులు కల్పించడమే ధ్యేయంగా కూటమి ప్రభుత్వం ఈ ప్రాజెక్ట్ పూర్తి చేసిందని ఈ సందర్భంగా స్పష్టమైంది.
పకడ్బందీ అధికారిక ఏర్పాట్లు: మంత్రి పర్యటన ఎలాంటి అంతరాయాలు లేకుండా విజయవంతం అయ్యేందుకు జిల్లా యంత్రాంగం పకడ్బందీ ఏర్పాట్లు చేసింది. జిల్లా సంయుక్త కలెక్టర్ సంజనా సింహా, ఐజీ సర్వ శ్రేష్ట త్రిపాఠి, జేఎన్టీయూ ప్రిన్సిపాల్ డాక్టర్ సీహెచ్ శ్రీనివాసరావు తదితర ఉన్నతాధికారులు స్వయంగా ఏర్పాట్లను పర్యవేక్షించి, వివిధ శాఖల మధ్య సమన్వయం సాధించారు. అలాగే టీడీపీ పల్నాడు జిల్లా అధ్యక్షుడు షేక్ జాన్ సైదా, జిల్లా ప్రధాన కార్యదర్శి నల్లపాటి రామచంద్ర ప్రసాద్, ఎమ్మెల్సీ బీటీ నాయుడు, ఏపీ ఐటీ శాఖ చైర్మన్ మన్నవ మోహన్కృష్ణ తదితరులు ఈ కార్యక్రమంలో పాలుపంచుకున్నారు.