Republic Day celebrations in Amaravati : రాజధాని అమరావతి చరిత్రలో ఓ కొత్త అధ్యాయం లిఖించబడనుంది. దశాబ్దాలుగా విజయవాడకే పరిమితమైన రాష్ట్ర అధికారిక వేడుకలు, తొలిసారిగా అమరావతి గడ్డపై అడుగుపెట్టనున్నాయి. ఈ నెల 26న జరగనున్న 77వ గణతంత్ర దినోత్సవ వేడుకలను, రాజధాని నగరంలో అంగరంగ వైభవంగా నిర్వహించేందుకు రాష్ట్ర ప్రభుత్వం సన్నాహాలు ముమ్మరం చేసింది. 

రాష్ట్ర విభజన తర్వాత, ఆంధ్రప్రదేశ్ ప్రభుత్వ అధికారిక వేడుకలైన గణతంత్ర, స్వాతంత్ర్య దినోత్సవాలను విజయవాడలోని ఇందిరాగాంధీ మున్సిపల్ స్టేడియంలో నిర్వహించడం ఆనవాయితీగా వస్తోంది. అయితే, అమరావతే ఏకైక రాజధాని అని స్పష్టం చేసిన ప్రస్తుత ప్రభుత్వం, ఇకపై అన్ని అధికారిక వేడుకలను రాజధాని నుంచే నిర్వహించాలని చారిత్రక నిర్ణయం తీసుకుంది.

పరేడ్ గ్రౌండ్‌లో పక్కా ఏర్పాట్లు : ఈ తొలి గణతంత్ర వేడుకలను అట్టహాసంగా నిర్వహించేందుకు, సీఆర్డీఏ ఆధ్వర్యంలో ఏర్పాట్లు యుద్ధప్రాతిపదికన సాగుతున్నాయి. రాజధాని పరిపాలన నగరంలో, మంత్రుల నివాసాలకు ఎదురుగా 10 ఎకరాల సువిశాల ప్రాంగణంలో పరేడ్ గ్రౌండ్‌ను సిద్ధం చేస్తున్నారు. మరో 10 ఎకరాలను పార్కింగ్ కోసం కేటాయించారు. గణతంత్ర దినోత్సవం సందర్భంగా, గవర్నర్ అబ్దుల్ నజీర్ సాయుధ దళాల గౌరవ వందనం స్వీకరించి, జాతీయ పతాకాన్ని ఆవిష్కరిస్తారు.

ప్రముఖుల హాజరు: ముఖ్యమంత్రి చంద్రబాబు, మంత్రులు సహా సుమారు 500 మంది ప్రముఖులు, 10,000 మందికి పైగా ప్రజలు ఈ వేడుకలకు హాజరవుతారని అంచనా. ప్రభుత్వ ‘పది సూత్రాలు’, సంక్షేమ, అభివృద్ధి కార్యక్రమాలను ప్రతిబింబించేలా శకటాల ప్రదర్శన ప్రత్యేక ఆకర్షణగా నిలవనుంది.

ప్రభుత్వ లక్ష్యం.. స్పష్టమైన సందేశం : ఈ నిర్ణయం వెనుక, రాష్ట్ర ప్రజలకు ప్రభుత్వం ఓ స్పష్టమైన సందేశాన్ని పంపాలని భావిస్తోంది. రాజధాని నిర్మాణ పనులను వేగవంతం చేయడంతో పాటు, ప్రభుత్వ పాలన మొత్తం అమరావతి కేంద్రంగానే సాగుతుందని చాటిచెప్పడం.
అధికారిక వేడుకలను ఇక్కడ నిర్వహించడం ద్వారా, అమరావతి అస్తిత్వాన్ని, దాని ప్రాధాన్యతను మరింత బలోపేతం చేయడం. ప్రభుత్వ ప్రధాన కార్యదర్శి కె. విజయానంద్ నేతృత్వంలో, అన్ని శాఖల అధికారులు ఈ వేడుకల ఏర్పాట్లను పర్యవేక్షిస్తున్నారు. ఈ తొలి గణతంత్ర వేడుకలు, రాజధాని అమరావతి చరిత్రలో ఓ మైలురాయిగా నిలిచిపోనున్నాయి.