Sankranti Travel Rush:సంక్రాంతి సమయం దగ్గరపడుతున్న కొద్దీ విజయవాడ నుంచి పలు ప్రాంతాలకు వెళ్లే రవాణా మార్గాలు అన్నీ ఒక్కసారిగా రద్దీగా మారాయి. సాధారణంగా ప్రతి సంవత్సరం పండుగకు ముందు కొంత రద్దీ కనిపించినా, ఈసారి మాత్రం పరిస్థితి మరింత తీవ్రంగా ఉంది. పండుగకు దాదాపు రెండు వారాలు ముందు నుంచే రైళ్లు, బస్సులు, విమానాల్లో డిమాండ్ పెరిగి, ప్రయాణికులు ముందస్తుగా టికెట్లు బుక్ చేసుకోవడానికి పరుగులు పెడుతున్నారు.
ముందే టికెట్లు బుక్..
ఈ నేపథ్యంలో ప్రజా రవాణా విభాగాలన్నీ తమకు సాధ్యమైనంత సేవలను అందించేందుకు ప్రయత్నిస్తున్నప్పటికీ, భారీగా పెరిగిన డిమాండ్ను ఎదుర్కోవడం సవాలుగా మారింది.విజయవాడ నుంచి వివిధ దిశల్లో నడిచే రైళ్ల విషయానికి వస్తే, జనవరి 10 నుంచి 14 వరకు దాదాపు అన్ని రైళ్లలో సీట్లు పూర్తిగా నిండి పోయాయి. పండుగ కోసం తమ స్వస్థలాలకు వెళ్లాలని చూసే ప్రయాణికులు ముందే టికెట్లు బుక్ చేసుకోవడంతో వెయిటింగ్ లిస్ట్ సంఖ్య ఒక్కరోజులోనే పెరిగిపోతోంది.
ఈ కారణంగా ప్రజలు ప్రత్యామ్నాయ తేదీలు చూసుకుంటున్నా, వాటిల్లో కూడా పెద్దగా మార్పు లేకుండా ఉంది. జనవరి 15, 16 తేదీల్లో కొంతమంది టికెట్లు పొందగలిగే అవకాశాలు ఉన్నప్పటికీ, 17 నుంచి 19 వరకూ మళ్లీ తిరిగి ఫుల్ బుకింగులు కనిపిస్తున్నాయి. ఇలాంటి పరిస్థితుల్లో కేంద్ర రైల్వే అధికారులు స్పెషల్ రైళ్లు నడపడం పైన పరిశీలిస్తున్నారు. క్రిస్మస్ తర్వాత పరిస్థితిని విశ్లేషించి, అవసరమైతే అదనపు రైళ్లను ప్రకటించే అవకాశం ఉందని రైల్వే వర్గాలు భావిస్తున్నాయి.
రైళ్ల పరిస్థితితో పెద్దగా తేడా లేకుండా ఆర్టీసీ బస్సుల్లో కూడా ఇదే రద్దీ కనిపిస్తుంది. విజయవాడ నుంచి హైదరాబాద్, బెంగళూరు, విశాఖపట్నం, చెన్నై, తిరుపతి వంటి నగరాలకు వెళ్లే బస్సులన్నీ వేగంగా బుక్ అవుతున్నాయి. ముఖ్యంగా ఏసీ బస్సులు అత్యంత వేగంగా బుక్ అవుతున్నాయి. ప్రయాణానికి మరింత సౌకర్యాన్ని కోరుకునే ఉద్యోగులు, విద్యార్థులు, కుటుంబాలు ఏసీ బస్సులను ఎక్కువగా ఎంచుకోవడంతో ఒక్క సీటు కూడా అందుబాటులో లేకుండా పోయింది.
నాన్-ఏసీ బస్సుల్లో..
నాన్-ఏసీ బస్సుల్లో కూడా ముందస్తు రిజర్వేషన్లు 30 శాతం దాటాయి. ఈ వేగం చూస్తుంటే మరికొన్ని రోజుల్లో ఇవి కూడా పూర్తిగా నిండిపోయే అవకాశాలు స్పష్టంగా కనిపిస్తున్నాయి. దీనిని దృష్టిలో పెట్టుకుని ఆర్టీసీ అధికారులు ఈసారి రికార్డు స్థాయిలో స్పెషల్ బస్సులను నడపాలని నిర్ణయించారు. గత సంవత్సరం నడిపిన 1300 స్పెషల్ బస్సులతో పోలిస్తే ఈసారి 100 బస్సులు ఎక్కువగా, మొత్తం 1400 స్పెషల్స్ను సిద్ధం చేశారు. పండుగ రోజుల్లో ప్రయాణికుల రద్దీ ఎక్కువగా ఉండే రూట్లపై ఇవి నడపాలని అధికారులు ప్రణాళిక రూపొందిస్తున్నారు.
అయితే రైళ్లు, బస్సుల మాత్రమే కాకుండా విమాన ప్రయాణాలకూ ఈసారి భారీ డిమాండ్ ఏర్పడింది. హైదరాబాద్, చెన్నై, బెంగళూరు వంటి నగరాల్లో పనిచేస్తున్న అనేక మంది టెకీలు, ఉద్యోగులు ఇప్పటికే రెండు నెలల ముందే టికెట్లను బుక్ చేసుకున్నారు. ప్రతి సంవత్సరం సంక్రాంతి సమయంలో దేశంలోని పలు ప్రాంతాల్లో నివసించే ఆంధ్రప్రదేశ్ వాసులు తమ ఊళ్లకు వస్తుండటంతో విమాన సేవల్లో క్షణాల్లోనే బుకింగులు పూర్తి అవుతున్నాయి. ముందస్తు బుకింగులు ఎక్కువగా ఉండటం వల్ల పండుగకు దగ్గరగా టికెట్లు బుక్ చేయాలనుకునే వారికి ధరలు కూడా గణనీయంగా పెరుగుతున్నాయి. కొంతమంది తప్పనిసరి పరిస్థితుల్లో టికెట్లు కొనుగోలు చేయలేక, ఇతర రవాణా మార్గాలను చూడాల్సి వస్తోంది.
రైళ్లు, బస్సులు, విమానాలు అన్నీ నిండిపోయినప్పుడు చివరి ప్రత్యామ్నాయంగా ప్రజలు ప్రైవేట్ వాహనాలవైపు మొగ్గుచూపుతున్నారు. క్యాబ్లు, ట్యాక్సీలు, స్వీయ వాహనాలు ఇలా అందుబాటులో ఉన్న ప్రతి మార్గాన్ని ప్రయాణికులు పరిశీలిస్తున్నారు. ముఖ్యంగా హైదరాబాద్ నుంచి విజయవాడ దిశగా ప్రయాణం చేసే వారు ప్రైవేట్ వాహనాలపై ఎక్కువగా ఆధారపడుతున్నారు. ఇప్పటికే క్యాబ్ బుకింగులు పెరిగి, కొన్ని రోజుల్లోనే అందుబాటులో వాహనాలు లేకుండా పోతాయనే అంచనాలు ఉన్నాయి.
క్యాబ్లు దొరకకపోవడంతో కొందరు తమ ఊళ్లలోని కుటుంబ సభ్యులతో వాహనాలు పంపించమని కూడా చెప్పే పరిస్థితి వచ్చింది. దీనివల్ల రాష్ట్రంలోని జాతీయ రహదారులపై పండుగ ముందు రోజుల్లో భారీ ట్రాఫిక్ పెరిగే అవకాశం ఉందని అధికారులు చెబుతున్నారు.
ప్రయాణికుల పెరుగుతున్న రద్దీని గమనిస్తున్న రవాణా శాఖలు పలు చర్యలను తీసుకుంటున్నాయి. రైల్వే అధికారులు వెయిటింగ్ లిస్ట్ పరిస్థితిని పరిశీలిస్తూ ప్రత్యేక రైళ్లు నడపాలా అనే విషయంపై నిర్ణయం తీసుకోనున్నారు.
ఆర్టీసీ ఇప్పటికే స్పెషల్ బస్సులను సిద్ధం చేసింది. ఏ రూట్లలో డిమాండ్ ఎక్కువగా ఉందో పర్యవేక్షించి, రోజువారీ పరిస్థితులకు అనుగుణంగా అదనపు సేవలను ప్రకటించే అవకాశం ఉంది. విమాన ప్రయాణాల విషయంలో ఎయిర్లైన్లు అదనపు ఫ్లైట్లను నడపడం పెద్దగా సాధ్యంకాకపోయినా, ఇప్పటికే బుకింగ్ అయిన షెడ్యూల్ ఫ్లైట్లను పూర్తి సామర్థ్యంతో నడపాలని అధికారులు ప్రయత్నిస్తున్నారు.
.