ఏపీలో ఓ వైసీపీ నేత దారుణ హత్యకు గురయ్యాడు. ఈ హత్య రాష్ట్ర రాజకీయాల్లో కలకలం రేపుతోంది. అధికారపార్టీకి చెందిన నేతను గుర్తుతెలియని వ్యక్తులు దారుణంగా కత్తితో పొడిచి చంపారు. శ్రీకాకుళం జిల్లాలో మంగళవారం తెల్లవారుజామున ఈ ఘటన జరిగింది. గార మండల పరిషత్ ఉపాధ్యక్షుడు రామశేషును శ్రీకూర్మం గ్యాస్ గోడౌన్ సమీపంలో దుండగులు కత్తితో నరికి చంపారు. స్థానికుల సమాచారంతో ఘటనా ప్రాంతానికి చేరుకున్న పోలీసులు.. తొలుత ఇది దొంగల పనిగా భావించారు.
కానీ.. మృతుడి సెల్ఫోన్, ఒంటిపై బంగారం, డబ్బు ఏవీ చోరీకి గురికాలేదని గుర్తుంచారు. ఈ నేపథ్యంలో రామశేషు హత్యకు కారణం ప్రశ్నార్థకమైంది. రాజకీయ కక్షలు, లేదా వ్యక్తిగత కక్షల నేపథ్యంలో రామశేషును హత్యచేసి ఉండొచ్చని పోలీసులు భావిస్తున్నారు. హత్యకు ఉపయోగించిన కత్తిని పక్కనే ఉన్న పొలాల్లో గుర్తించారు. మృతదేహాన్ని పోస్టుమార్టమ్ కు తరలించారు. మొత్తం ముగ్గురు వ్యక్తులు ఈ హత్యకు పాల్పడి ఉండొచ్చని పోలీసులు అనుమానిస్తున్నారు. కేసు నమోదు చేసుకుని.. రియల్ ఎస్టేట్ వ్యవహారాలు, వివాహేతర సంబంధం, కుటుంబ, రాజకీయ గొడవలు కోణంలో దర్యాప్తు చేస్తున్నారు.