SIT report on Tirumala Laddu ghee adulteration : ఏడుకొండలవాడి ప్రసాదమంటే భక్తులకు అమితమైన భక్తి, అపారమైన నమ్మకం. కానీ, ఆ పవిత్ర లడ్డూ తయారీలో గత ఐదేళ్లుగా జరిగిన ‘కల్తీ’ బాగోతం ఇప్పుడు భక్తుల గుండెల్లో అగ్నిని రగిలిస్తోంది. నూటికి నూరు శాతం కల్తీ నెయ్యి వాడారంటూ సిట్ (SIT) ప్రభుత్వానికి పంపిన నివేదికలో సంచలన అంశాలను ప్రస్తావించింది.
అగ్మార్క్ ముసుగులో.. అంతులేని అవినీతి : 2019 నుంచి 2024 మధ్య కాలంలో తిరుమల తిరుపతి దేవస్థానం (TTD) కు సరఫరా అయిన నెయ్యిలో భారీ అక్రమాలు జరిగినట్లు సుప్రీంకోర్టు నియమించిన సిట్ తన అభియోగపత్రంలో నిర్ధారించింది. గుజరాత్లోని ప్రఖ్యాత ఎన్డీడీబీ-కాఫ్ (NDDB-CALF) ప్రయోగశాల విశ్లేషణలో నెయ్యి పరిమాణం అతి తక్కువగా ఉందని తేలింది.
భోలేబాబా ఆర్గానిక్ డెయిరీ మిల్క్ ప్రైవేట్ లిమిటెడ్ సుమారు 68.17 లక్షల కిలోల కల్తీ నెయ్యిని తయారు చేసి, అందులో 59.71 లక్షల కిలోలను ‘అగ్మార్క్ స్పెషల్ గ్రేడ్’ పేరుతో టీటీడీకి అంటగట్టింది. ఈ దొంగ నెయ్యి సరఫరా ద్వారా సుమారు రూ. 234.51 కోట్ల ప్రజాధనం దుర్వినియోగమైందని సిట్ స్పష్టం చేసింది.
కెమికల్ కాక్టెయిల్: పాలు లేవు.. వెన్న లేదు : కల్తీ నెయ్యి తయారీలో నిందితులు అనుసరించిన విధానం చూస్తే ఎవరైనా ముక్కున వేలేసుకోవాల్సిందే. పాలు, వెన్న సేకరించకుండానే కేవలం నూనెలు, రసాయనాలతో నెయ్యిని సృష్టించారు.
వాడిన నూనెలు: పామ్ కెర్నల్ ఆయిల్, రిఫైన్డ్ పామాయిల్, పామోలిన్ ఆయిల్.
రసాయనాల రొంపి: నెయ్యికి ఉండాల్సిన సహజమైన వాసన తెప్పించేందుకు, ల్యాబ్ పరీక్షల్లో పట్టుబడకుండా ఉండేందుకు లాక్టిక్ యాసిడ్, ఎసిటిక్ యాసిడ్ ఎస్టర్, మోనోగ్లిసరైడ్స్ వంటి ప్రమాదకర రసాయనాలను జోడించారు. ఈ రసాయనాలు మానవ ప్రాణాలకు ముప్పు కలిగిస్తాయని, వీటితో చేసిన లడ్డూలను కోట్ల మంది భక్తులకు పంచడం క్షమించరాని నేరమని టీటీడీ ఛైర్మన్ బీఆర్ నాయుడు ఆవేదన వ్యక్తం చేశారు.
నకిలీ పత్రాలతో టెండర్ల వేట : హర్షా ఫ్రెష్ డెయిరీ, భోలేబాబా డెయిరీ వంటి సంస్థలకు అసలు టీటీడీ టెండర్లలో పాల్గొనే అర్హతే లేదని సిట్ తేల్చింది. నిబంధనలను ఉద్దేశపూర్వకంగా సడలించి, నకిలీ పత్రాలను సృష్టించి మరీ వీరికి కాంట్రాక్టులు అప్పగించినట్లు అభియోగపత్రంలో పేర్కొన్నారు. గత ప్రభుత్వ హయాంలోని కీలక వ్యక్తుల ప్రమేయం లేకుండా ఇంతటి కుంభకోణం జరగడం అసాధ్యమని, సుబ్బారెడ్డి పీఏ ఖాతాల్లోకి వచ్చిన కోట్ల రూపాయల నిధులపై సీబీఐ దర్యాప్తు జరపాలని ఛైర్మన్ డిమాండ్ చేశారు.
భవిష్యత్తు దిద్దుబాటు చర్యలు : కల్తీ జరిగిందని నిర్ధారించడమే కాకుండా, భవిష్యత్తులో ఇలాంటివి పునరావృతం కాకుండా సిట్ కీలక సూచనలు చేసింది. నెయ్యి నాణ్యత పరీక్షల్లో ఆధునిక సాంకేతికతను వాడాలని, టెండర్ ప్రక్రియలో అత్యంత కఠినమైన నిబంధనలు ఉండాలని సిట్ ప్రభుత్వం కోరింది. నివేదికను అధ్యయనం చేసిన అనంతరం తప్పుడు ప్రచారాలు చేస్తున్న వారిపై కఠిన చర్యలు తీసుకోవాలని ప్రభుత్వం యోచిస్తోంది.