Tirumala Laddu Adulteration: కోట్లాది మంది భక్తుల ఆరాధ్యదైవం తిరుమల వేంకటేశ్వర స్వామి లడ్డూ ప్రసాదం కల్తీ వ్యవహారం ఇప్పుడు ఆంధ్రప్రదేశ్ రాజకీయాల్లో అగ్గి రాజేస్తోంది. ముఖ్యమంత్రి నారా చంద్రబాబు నాయుడు అధ్యక్షతన జరిగిన మంత్రివర్గ సమావేశంలో అజెండాలోని ఇతర అంశాలను పక్కనపెట్టి, కేవలం ఈ సున్నితమైన అంశంపైనే సుదీర్ఘంగా చర్చించారు.
నిజాలను తొక్కిపెట్టారు:
పయ్యావుల కేశవ్ మంత్రి పయ్యావుల కేశవ్ మీడియా ప్రతినిధులతో మాట్లాడుతూ గత ప్రభుత్వ తీరుపై నిప్పులు చెరిగారు. “2022లోనే సీఎఫ్టీఆర్ఐ (CFTRI) నివేదిక లడ్డూలో వాడే నెయ్యి నాణ్యతపై హెచ్చరించినా, అప్పటి వైకాపా పాలకులు ఆ నివేదికను ఉద్దేశపూర్వకంగా తొక్కిపెట్టారు” అని ఆయన ఆరోపించారు. లడ్డూలో పంది కొవ్వు, గొడ్డు కొవ్వు, ఫిష్ ఆయిల్ వంటివి కలిశాయని ఎన్డీడీబీ (NDDB) ల్యాబ్ నివేదిక స్పష్టం చేసినా, గత పాలకులు మౌనంగా ఉండటం నేరంలో భాగస్వామ్యం కావడమేనని మండిపడ్డారు.
Also Read:Nimmala Rama Naidu – జగన్పై మంత్రి నిమ్మల ఫైర్!
అక్రమాలకు గేట్లు తెరిచిన నిబంధనల సడలింపు: నెయ్యి సరఫరా చేసే టెండర్లలో నిబంధనలను కావాలనే సడలించారని పయ్యావుల వెల్లడించారు. కనీసం ఒక్క చుక్క పాలు కూడా సేకరించని ‘భోలే బాబా డెయిరీ’ వంటి సంస్థలకు నకిలీ పత్రాల ఆధారంగా టెండర్లు కట్టబెట్టారని, దీని వెనుక పెద్దల హస్తం ఉందని విమర్శించారు. రూ. 250 కోట్ల అవినీతి కోసం భక్తుల మనోభావాలను తాకట్టు పెట్టారని మంత్రి సత్యకుమార్ యాదవ్ మండిపడ్డారు.
ప్రభుత్వ తదుపరి చర్యలు
ఈ మహా పాపానికి ఒడిగట్టిన అసలు సూత్రధారులను తేల్చేందుకు ప్రత్యేక విచారణ కమిషన్ను ఏర్పాటు చేయాలని క్యాబినెట్ నిర్ణయించింది. టీటీడీ నూతన ఈవో శ్యామలరావు నేతృత్వంలో ఇప్పటికే ప్రక్షాళన మొదలైందని, పారదర్శకత కోసమే ప్రభుత్వం ప్రయత్నిస్తోందని మంత్రి నాదెండ్ల మనోహర్ స్పష్టం చేశారు. “బ్రిటీష్ వారు, నిజాం రాజులు కూడా ధైర్యం చేయని విధంగా తిరుమల పవిత్రతను గత పాలకులు దెబ్బతీశారు” అని మంత్రులు ఆవేదన వ్యక్తం చేశారు. కేవలం రాజకీయాల కోసం కాకుండా, సనాతన ధర్మ రక్షణ కోసమే తాము ఈ యుద్ధం చేస్తున్నామని ప్రభుత్వం స్పష్టం చేసింది.