Telugu states: తెలుగు రాష్ట్రాల్లో వాతావరణం విచిత్రంగా మారుతోంది. చలి తీవ్రత తగ్గిందని ఊపిరి పీల్చుకుంటున్న తరుణంలో.. మళ్లీ ఉష్ణోగ్రతలు స్వల్పంగా పడిపోతున్నాయి. ప్రస్తుతం ఆంధ్రప్రదేశ్, తెలంగాణ రాష్ట్రాల్లో మిశ్రమ వాతావరణం నెలకొంది. తెల్లవారుజామున వణుకు పుట్టిస్తుండగా పగటిపూట మాత్రం భానుడు తన ప్రతాపాన్ని చూపుతున్నాడు. ఈశాన్య మరియు తూర్పు దిశల నుండి వీస్తున్న గాలుల ప్రభావంతో రాబోయే మూడు రోజుల పాటు రెండు రాష్ట్రాల్లో పొడి వాతావరణం ఉంటుందని వాతావరణ శాఖ వెల్లడించింది.
తెల్లవారుజామున పొగమంచు: అమరావతి వాతావరణ కేంద్రం సమాచారం ప్రకారం ఉత్తర మరియు దక్షిణ కోస్తా ప్రాంతాల్లో మంగళ, బుధ, గురువారాల్లో పొడి వాతావరణం ఉంటుంది. ఒకటి రెండు చోట్ల స్వల్పంగా పొగమంచు కురిసే అవకాశం ఉంది. రాయలసీమలో సైతం రాగల మూడు రోజులు వాతావరణం పొడిగానే ఉంటుంది. తెల్లవారుజామున పొగమంచు ప్రభావం కనిపించవచ్చు. రాబోయే ఐదు రోజుల వరకు కనిష్ట ఉష్ణోగ్రతల్లో పెద్దగా మార్పులు ఉండవని అధికారులు స్పష్టం చేశారు.
తెలంగాణలో వాతావరణ పరిస్థితి: హైదరాబాద్ వాతావరణ కేంద్రం నివేదిక ప్రకారం రాష్ట్రంలో క్రింది స్థాయి గాలులు ఆగ్నేయ మరియు తూర్పు దిశల నుండి వీస్తున్నాయి. దీని ప్రభావంతో తెలంగాణ అంతటా మంగళవారం నుంచి గురువారం వరకు పొడి వాతావరణం ఏర్పడుతుంది. పగటి ఉష్ణోగ్రతలు క్రమంగా పెరుగుతుండటంతో వేడి సెగలు మొదలయ్యే సూచనలు కనిపిస్తున్నాయి.
మొత్తానికి తెలుగు రాష్ట్రాల్లో చలికాలం ముగుస్తూ, వేసవి ఛాయలు మొదలవుతున్నట్లు కనిపిస్తోంది. తెల్లవారుజామున చలిగా ఉన్నప్పటికీ, పగలు మాత్రం ఎండ తీవ్రత పెరుగుతోంది. మారుతున్న ఈ వాతావరణ పరిస్థితుల దృష్ట్యా ప్రజలు ఆరోగ్య విషయంలో జాగ్రత్తగా ఉండాలని నిపుణులు సూచిస్తున్నారు.