కాకినాడ జిల్లా తుని(Tuni) మున్సిపల్ వైస్‌ ఛైర్మన్‌ ఎన్నిక మరోసారి వాయిదా పడింది. వరుసగా రెండోరోజూ కోరం లేకపోవడంతో వాయిదా వేస్తున్నట్లు అధికారులు ప్రకటించారు. ఇప్పటికే ఈ ఎన్నిక మూడుసార్లు వాయిదా పడిన నేపథ్యంలో ఈ విషయాన్ని ఎన్నికల కమిషన్‌ దృష్టికి తీసుకెళ్లనున్నారు. తుని ఎమ్మెల్యే(ఎక్స్‌ అఫీషియో సభ్యురాలితో) కలిపి మొత్తం 29 మంది పాల్గొనాల్సి ఉండగా.. కేవలం వైసీపీ నుంచి టీడీపీలో చేరిన 10 మంది మాత్రమే హాజరయ్యారు.
అంతకుముందు వైసీపీ నేతలు చేపట్టిన ఛలో తుని కార్యక్రమం తీవ్ర ఉద్రిక్తతలకు దారి తీసింది. ఈ కార్యక్రమానికి అనుమతి లేదంటూ పోలీసులు భారీ బందోబస్తు ఏర్పాటు చేశారు. వైసీపీ నేతలు, కార్యకర్తలను ఎక్కడికక్కడ అరెస్ట్ చేశారు. కాకినాడ నుంచి తుని బయలుదేరిన కాపు ఉద్యమనేత ముద్రగడ పద్మనాభం రెడ్డి, మాజీ ఎంపీ వంగా గీతను అదుపులోకి తీసుకున్నారు. ఈ పరిణామాల నేపథ్యంలో మున్సిపల్ కార్యాలయం వద్ద భారీగా పోలీసులు మోహరించారు.
ఇక మన్యం జిల్లా పాలకొండ నగర పంచాయతీ చైర్మన్ ఎన్నిక కూడా మరోసారి వాయిదా పడింది. మొత్తం 19 మంది సభ్యుల్లో 14 మంది వైసీపీకి చెందిన వారు, ఐదుగురు కూటమికి చెందిన వారు ఉన్నారు. కోరం లేకపోవడంతో ఎన్నికను వాయిదా వేశారు.
