అక్రమ మైనింగ్ కేసులో ఏపీ ప్రభుత్వ వాదనలు వినకుండా వల్లభనేని వంశీకి ఏపీ హైకోర్టు ముందస్తు బెయిల్ ఇవ్వడాన్ని సుప్రీంకోర్టు తప్పుబట్టింది. కేసులో ఇరుప్రక్కల వాదన విన్న తర్వాత మెరిట్స్ ఆధారంగా నిర్ణయం తీసుకోవాలని సుప్రీం ఆదేశాలు జారీ చేసింది. ఇదే విషయమై వారం రోజుల్లో కౌంటర్ దాఖలు చేస్తామని ఏపీ ప్రభుత్వ తరపు న్యాయవాది ముకుల్ రోహత్గీ సుప్రీంకోర్టుకు విన్నవించుకున్నారు. ఈ క్రమంలో కౌంటర్ దాఖలు చేసిన నాలుగు వారాల్లోగా విచారణ పూర్తి చేయాలని సుప్రీంకోర్టు ఆదేశించింది.

ఫిబ్రవరి 16న హైదరాబాద్‌లో నివాసం ఉంటున్న వల్లభనేని వంశీని పోలీసులు అరెస్ట్ చేశారు. గన్నవరంలో టీడీపీ ఆఫీసుపై దాడి.. సత్యవర్థన్ కిడ్నాప్ కేసు.. నకిలీ ఇళ్ల పట్టాల కేసు, భూ కబ్జా ఇలా వివిధ కేసుల్లో దాదాపు 137 రోజుల పాటు జైలు జీవితం గడిపిన వంశీ ఇటీవలే బెయిల్ పై బయటకి వచ్చారు. ఆయనపై ఇప్పటి వరకు నమోదైన కేసుల్లో కొన్ని ముందుస్తు బెయిల్.. మరికొన్ని షరతులతో బెయిల్ ఇవ్వడంతో జూలై 2న విజయవాడ జైలు నుంచి వల్లభనేని వంశీ విడుదల అయ్యారు.