Vijayasai Reddy: వైసీపీ సీనియర్ నేత, రాజ్యసభ సభ్యులు విజయసాయిరెడ్డి సోషల్ మీడియా వేదికగా చేసిన తాజా పోస్ట్ రాజకీయ వర్గాల్లో పెను సంచలనం రేపుతోంది. వెనిజువెలా దేశంలో గతంలో జరిగిన ఒక చారిత్రక పరిణామాన్ని ఉటంకిస్తూ ఆయన చేసిన వ్యాఖ్యలు ఇప్పుడు ఏపీ రాజకీయాల్లో హాట్ టాపిక్‌గా మారాయి. విజయసాయిరెడ్డి తన ఎక్స్‌ (ట్విట్టర్) ఖాతాలో.. ప్రజా నాయకులు తమ చుట్టూ ఉండే కోటరీల పట్ల ఎంత అప్రమత్తంగా ఉండాలో హెచ్చరిస్తూ ఆసక్తికర విశ్లేషణ చేశారు.

కోటరీల బందీలుగా నాయకులు:
“అమ్ముడుపోయిన కోటరీల మధ్య బందీలుగా ఉన్న ఓ ప్రజా నాయకులారా.. ఒక్కసారి ఆలోచించుకోండి. భవిష్యత్తులో మీకు ఇక్కడ ఏం జరగబోతోందో ఇప్పటికైనా గుర్తించండి” అంటూ ఆయన పరోక్ష హెచ్చరికలు జారీ చేశారు. వెనిజువెలా ఉదాహరణగా చూపిస్తూ.. భారీ ప్రజాదరణతో ఎన్నికైన ఒక దేశాధినేతకు సైన్యం, నిఘా వర్గాలు అండగా ఉన్నప్పటికీ.. విదేశీ శక్తులు అతడిని ఎలా బంధించగలిగాయో వివరించారు.

ఆర్మీ, నేవీ, ఎయిర్ ఫోర్స్ వంటి శక్తివంతమైన విభాగాలు, అత్యాధునిక యుద్ధ విమానాలు, మిసైళ్లు ఉన్నప్పటికీ.. ఎటువంటి ప్రతిఘటన లేకుండా అధ్యక్షుడిని, ఆయన భార్యను ప్యాలెస్ నుంచి తీసుకెళ్లగలిగారంటే దానికి ప్రధాన కారణం చుట్టూ ఉన్నవారంతా అమ్ముడుపోవడమేనని ఆయన పేర్కొన్నారు.

Also Read: CM Chandrababu Naidu – తెలుగుజాతి స్ఫూర్తిప్రదాత ఎన్టీఆర్..

రాజకీయ వర్గాల్లో చర్చ
విజయసాయిరెడ్డి ఈ వ్యాఖ్యలు ఎవరిని ఉద్దేశించి చేశారనే దానిపై ప్రస్తుతం పెద్ద ఎత్తున చర్చ జరుగుతోంది. సాధారణంగా అంతర్జాతీయ పరిణామాలను స్థానిక రాజకీయాలకు ముడిపెట్టడంలో ఆయన శైలి భిన్నంగా ఉంటుంది. ముఖ్యంగా “అమ్ముడుపోయిన కోటరీ” అనే పదాన్ని ఉపయోగించడం ద్వారా.. సొంత పార్టీలోని వ్యక్తులను ఉద్దేశించారా లేక ప్రత్యర్థి పార్టీల వ్యూహాలను విమర్శించారా అన్నది ఆసక్తికరంగా మారింది.

నమ్మకద్రోహం అనేది ఎంతటి శక్తివంతమైన నాయకుడినైనా బలహీనపరుస్తుందని, చుట్టూ ఉన్న వ్యవస్థలు అమ్ముడుపోతే అధికారం పేకమేడలా కూలిపోతుందని ఆయన హెచ్చరించినట్లు కనిపిస్తోంది. ఈ పోస్ట్ ప్రస్తుతం సోషల్ మీడియాలో వైరల్ అవుతుండటంతో, దీనిపై అధికార, ప్రతిపక్షాల నుంచి ఎలాంటి స్పందన వస్తుందో చూడాలి.