పేదవాడి ఆరోగ్యానికి భరోసా అయిన ఆరోగ్య శ్రీ పథకాన్ని(Arogya Sri Scheme) కూటమి ప్రభుత్వం అనారోగ్యశ్రీగా మార్చివేసిందని ఏపీసీపీ చీఫ్ వైఎస్.షర్మిల(YS Sharmila) విమర్శించారు. ఈమేరకు ఎక్స్ వేదికగా పోస్ట్ చేశారు.
“పేదవాడి ఆరోగ్యానికి భరోసా ఆరోగ్య శ్రీ. దివంగత ముఖ్యమంత్రి డాక్టర్ వైఎస్ రాజశేఖర రెడ్డి గారి మానస పుత్రిక ఈ పథకం. ప్రాణాలు తీసే జబ్బొచ్చినా సంజీవని లాంటి ఆరోగ్య శ్రీ పథకాన్ని.. కూటమి సర్కార్ అనారోగ్యశ్రీగా మార్చింది. రూ.3వేల కోట్లు బకాయిలు చెల్లించకుండా, వైద్యసేవలు నిలిచే దాకా చూడటం అంటే.. పథకాన్ని నిర్వీర్యం చేసే కుట్రనే ఇదంతా. ఆరోగ్య శ్రీ పథకానికి మంగళం పాడి.. ప్రజల ఆరోగ్యంతో కూటమి ప్రభుత్వం చెలగాటం ఆడుతుంది.
ఆరోగ్యానికి పెద్దపీట అంటూనే కత్తిపీట వేస్తున్నారు. ఆరోగ్యశ్రీని నిర్వీర్యం చేస్తూ.. వదిలించుకునే ప్రయత్నాలు చేస్తున్నారు. ముఖ్యమంత్రి చంద్రబాబు గారిని కాంగ్రెస్ పార్టీ పక్షాన డిమాండ్ చేస్తున్నాం. ఆరోగ్య శ్రీ పథకానికి బకాయిలు గత ప్రభుత్వం పెండింగ్ లో పెట్టినవి అయినా.. వాటిని చెల్లించే బాధ్యత మీ ప్రభుత్వంపైనే ఉంది. వెంటనే ఆసుపత్రుల యాజమాన్యాలను చర్చలకు పిలవండి. పెండింగ్ బకాయిలు రూ.3వేల కోట్లు తక్షణం విడుదల చేయండి. ఆరోగ్యశ్రీ సేవలను వెంటనే పునరుద్ధరించి, పథకానికి ఏ లోటూ రాకుండా చూడాలని డిమాండ్ చేస్తున్నాం.” అని ఆమె తెలిపారు.
కాగా ప్రభుత్వం రూ.3వేల కోట్లు బకాయిలు చెల్లించకపోవడంతో రాష్ట్రంలో సోమవారం నుంచి ఆరోగ్యశ్రీ వైద్య సేవలు కార్పొరేట్ ఆసుపత్రుల యాజమాన్యాలు నిలిపివేశాయి. దీంతో పేద, మధ్య తరగతి ప్రజలు, ఉద్యోగులు వైద్య సేవల అంశంలో ఇబ్బందులు తలెత్తుతున్నాయి. మరోవైపు ఈనెల 26వ తేదీ లోపు తమ సమస్యలు పరిష్కరించకపోతే అత్యవసర సేవలు కూడా నిలిపివేస్తామని ప్రభుత్వాన్ని హెచ్చరించాయి.
