Ysrcp : ఆంధ్రప్రదేశ్‌లో ఎన్నికల ఫలితాల తర్వాత రాజకీయంగా ఆసక్తికరమైన పరిణామాలు చోటు చేసుకుంటున్నాయి. వైఎస్సార్ కాంగ్రెస్ పార్టీ ఓటమి తర్వాత, ఆ పార్టీకి చెందిన పలువురు ఎమ్మెల్సీలు తమ పదవులకు రాజీనామా చేశారు. తమ రాజీనామా లేఖలను మండలి చైర్మన్ ఫార్మాట్‌లో పంపించినప్పటికీ, ఏడాది గడుస్తున్నా ఆ రాజీనామాలు ఆమోదానికి నోచుకోలేదు.
Janasena : వ్యూహాలకు పదును పెట్టిన పవన్ కల్యాణ్
కోర్టుకు చేరిన వ్యవహారం:
తాజాగా జనసేనలో చేరిన ఎమ్మెల్సీ జయమంగళం వెంకటరమణ తన రాజీనామాను ఆమోదించడం లేదంటూ హైకోర్టును ఆశ్రయించారు. తన రాజీనామాను వెంటనే ఆమోదించేలా ఆదేశాలు ఇవ్వాలని ఆయన కోర్టును కోరారు. జయమంగళం బాటలో మిగతా ఎమ్మెల్సీలు కూడా కోర్టుకు వెళ్లే అవకాశం కనిపిస్తోంది. వైఎస్సార్ కాంగ్రెస్ పార్టీకి చెందిన ఎమ్మెల్సీలు కర్రీ పద్మశ్రీ, పోతుల సునీత, బల్లి కళ్యాణ్ చక్రవర్తి, మర్రి రాజశేఖర్, మండలి డిప్యూటీ చైర్ పర్సన్ జాకీయాఖానం కూడా రాజీనామా చేసిన వారిలో ఉన్నారు. అయితే వైఎస్సార్‌సీపీకి చెందిన మండలి చైర్మన్ మోసేన్ రాజు ఈ రాజీనామాలను ఆమోదించకుండా పెండింగ్‌లో పెట్టారు.
కూటమి ప్లాన్‌కు అడ్డుకట్ట:
ప్రస్తుతం శాసనమండలిలో వైఎస్సార్ కాంగ్రెస్ పార్టీకి మెజారిటీ ఉంది. కూటమి ప్రభుత్వం ఏవైనా బిల్లులు ప్రవేశపెట్టినప్పుడు అడ్డుకోవాలని జగన్ మోహన్ రెడ్డి భావిస్తున్నట్లు సమాచారం. దీనికి ప్రతిగా కూటమి పార్టీలు మరో వ్యూహాన్ని అనుసరించాయి. వైఎస్సార్‌సీపీ ఎమ్మెల్సీల రాజీనామాలను ఆమోదింపజేసి, ఆ స్థానాలను తమ నేతలతో భర్తీ చేయాలని చూశాయి. తద్వారా శాసనమండలిపై నియంత్రణ సాధించి, వైఎస్సార్‌సీపీని ఇరుకున పెట్టాలని భావించాయి. అయితే, వైఎస్సార్‌సీపీకి చెందిన చైర్మన్ మోసేన్ రాజు ఈ రాజీనామాలను ఆమోదించకుండా ఏడాది కాలంగా తొక్కిపెట్టారు. ఒకవేళ ఈ రాజీనామాలు ఆమోదించబడితే, మండలిలో వైసీపీ బలం తగ్గి, కూటమికి పట్టు లభిస్తుంది.
ఎమ్మెల్సీల భవిష్యత్తు ప్రశ్నార్థకం:
ఈ పరిస్థితుల్లో కూటమి పార్టీలతో ఒప్పందం చేసుకుని రాజీనామాలు చేసిన పలువురు ఎమ్మెల్సీలు ప్రస్తుతం ఇబ్బందుల్లో పడ్డారు. పోతుల సునీత, కర్రీ పద్మశ్రీ, బల్లి కళ్యాణ్ చక్రవర్తి, మర్రి రాజశేఖర్ వంటి వారు తమ రాజీనామా ఆమోదం పొందకపోవడంతో రాజకీయంగా సందిగ్ధంలో ఉన్నారు. ఈ వ్యవహారంలో కోర్టు ఎలాంటి తీర్పు ఇస్తుందో వేచి చూడాలి. కోర్టు తీర్పు ఈ ఎమ్మెల్సీల రాజకీయ భవిష్యత్తును నిర్ణయించడమే కాకుండా, శాసనమండలిలో అధికార బలాన్ని కూడా మార్చే అవకాశం ఉంది.
