Nara Lokesh on Education Policy: ఆంధ్రప్రదేశ్ ప్రభుత్వ పాఠశాలల్లో విద్యా ప్రమాణాలను పెంచే దిశగా కూటమి ప్రభుత్వం దూకుడుగా అడుగులు వేస్తోంది. ఇటీవల జరిగిన శాసనమండలి సమావేశాల్లో విద్యాశాఖ మంత్రి నారా లోకేశ్ చేసిన ప్రకటనలు ఇప్పుడు విద్యా రంగంలో కొత్త ఆశలు రేకెత్తిస్తున్నాయి. ‘తరగతికి ఒక ఉపాధ్యాయుడు’ అనే విప్లవాత్మక విధానాన్ని రాష్ట్రవ్యాప్తంగా 9,600 ప్రాథమిక పాఠశాలల్లో అమలు చేసి దేశంలోనే ఏ రాష్ట్రం సాధించని ఘనతను సాధించామని ఆయన గర్వంగా ప్రకటించారు.

గత ప్రభుత్వ హయాంలో జారీ అయిన జీవో 117 కారణంగా కేవలం 1200 పాఠశాలల్లో మాత్రమే ఈ విధానం అమలయ్యేదని, కానీ తమ ప్రభుత్వం అధికారంలోకి వచ్చిన వెంటనే యుద్ధ ప్రాతిపదికన ఈ సంఖ్యను 9,600కు పెంచామని లోకేశ్ వివరించారు. ఈ నిర్ణయం ప్రభుత్వ పాఠశాలల భవిష్యత్తును మార్చబోతుందని ఆయన ఆశాభావం వ్యక్తం చేశారు. ప్రభుత్వ బడుల్లో విద్యార్థులకు ప్రాథమిక అక్షరాస్యత, సంఖ్యా శాస్త్రం (FLN)లో పూర్తి స్థాయి నైపుణ్యాలను గ్యారెంటీగా సాధించేలా చర్యలు తీసుకుంటున్నామని, దీనికోసం ఉపాధ్యాయులకు అన్ని రకాల ప్రోత్సాహకాలు అందిస్తున్నామని తెలిపారు.

విలువలతో కూడిన విద్యకు చాగంటి నిస్వార్థ సేవ
కేవలం అకడమిక్ విద్యతోనే సరిపెట్టకుండా, విద్యార్థుల్లో నైతిక విలువలను పెంపొందించడంపై కూడా కూటమి ప్రభుత్వం ప్రత్యేక దృష్టి సారించింది. ఈ లక్ష్యం కోసం ప్రముఖ ప్రవచనకర్త బ్రహ్మశ్రీ చాగంటి కోటేశ్వరరావును ప్రభుత్వానికి సలహాదారుగా నియమించడం విశేషం. ఈ సందర్భంగా మంత్రి లోకేశ్ చాగంటి నిస్వార్థ సేవను ప్రత్యేకంగా ప్రశంసించారు. “చాగంటి గారు ప్రభుత్వం నుంచి ఒక్క రూపాయి కూడా తీసుకోవడం లేదు. కనీసం ఫోన్ గానీ, వాటర్ బాటిల్ గానీ స్వీకరించడం లేదు. ఆయన రూపొందించిన అద్భుతమైన పుస్తకాలను ప్రింట్ చేసి విద్యార్థులకు అందిస్తున్నాం” అని లోకేశ్ వెల్లడించారు. ఈ అభినందనలు చాగంటి కోటేశ్వరరావు అంకితభావానికి, నిస్వార్థతకు నిదర్శనంగా నిలిచాయి.

ప్రైవేట్ పాఠశాలలకు హెచ్చరికలు, నాణ్యమైన విద్య లక్ష్యం..
మంత్రి లోకేశ్ ప్రైవేట్ విద్యా సంస్థలకు కూడా కొన్ని కీలక హెచ్చరికలు జారీ చేశారు. ప్రైవేట్ కార్పొరేట్ పాఠశాలల ఫీజుల నియంత్రణ కమిటీ (APSERMC) చట్టం-2019కు సంబంధించిన విషయం న్యాయస్థానం పరిధిలో ఉందని ఆయన తెలిపారు. ప్రైవేట్ పాఠశాలల్లో ఎస్సీ, బీసీ విద్యార్థులకు ప్రత్యేక తరగతులు నిర్వహిస్తున్నట్లు ఎక్కడైనా సమాచారం ఉంటే తమ దృష్టికి తీసుకురావాలని, అలాంటి వివక్షను ఉపేక్షించబోమని, కఠిన చర్యలు తీసుకుంటామని ఆయన స్పష్టం చేశారు.

జాతీయ విద్యా ప్రమాణాల సర్వే నివేదికను ప్రభుత్వం తీవ్రంగా పరిగణిస్తున్నదని, ప్రభుత్వ బడుల్లో నాణ్యమైన విద్యను అందించడమే తమ ప్రభుత్వ ధ్యేయమని లోకేశ్ పునరుద్ఘాటించారు. ఈ ప్రకటనలు రాష్ట్రంలో విద్యారంగానికి ఒక కొత్త దిశానిర్దేశం చేస్తాయని, ప్రభుత్వ పాఠశాలలను బలోపేతం చేసేందుకు ప్రభుత్వం కట్టుబడి ఉందని స్పష్టం చేస్తున్నాయి.