Andhra Pradesh fog: ప్రస్తుతం వాతావరణంలో మార్పులు కనిపించడానికి ప్రధాన కారణంగా అధికపీడన పరిస్థితులు కొనసాగుతున్నాయని వాతావరణ శాఖ వెల్లడించింది. ఈ అధికపీడనానికి తోడు ఉత్తర భారతదేశం నుంచి చల్లని గాలులు దక్షిణ దిశగా ప్రవహిస్తుండటంతో తెలుగు రాష్ట్రాలైన ఆంధ్రప్రదేశ్, తెలంగాణలో వాతావరణం మారుతోంది. ముఖ్యంగా తెల్లవారుజామున దట్టమైన పొగమంచు కురుస్తుండటంతో సాధారణ జీవనంపై ప్రభావం పడుతోంది. రాబోయే కొద్ది రోజుల పాటు ఇదే తరహా వాతావరణ పరిస్థితులు కొనసాగవచ్చని వాతావరణ శాఖ ముందస్తు హెచ్చరికలు జారీ చేసింది.

కేవలం 300 మీటర్ల ..

ఆంధ్రప్రదేశ్‌లోని పలు జిల్లాల్లో పొగమంచు తీవ్రంగా ఉండటంతో రహదారులపై ప్రయాణం ప్రమాదకరంగా మారింది. ముఖ్యంగా జాతీయ రహదారులపై ఉదయంవేళల్లో విజిబిలిటీ గణనీయంగా తగ్గిపోయింది. కొన్ని ప్రాంతాల్లో చూపు దూరం కేవలం 300 మీటర్ల వరకే పరిమితమవడంతో వాహనదారులు అప్రమత్తంగా ప్రయాణించాల్సిన పరిస్థితి ఏర్పడింది. సంక్రాంతి పండుగ ముగిసిన తర్వాత కూడా తిరుగు ప్రయాణాలు కొనసాగుతుండటంతో విజయవాడ నుంచి హైదరాబాద్‌ను కలిపే జాతీయ రహదారిపై ఉదయం వేళల్లో భారీగా ట్రాఫిక్ జామ్‌లు ఏర్పడుతున్నాయి. వాహనాలు నెమ్మదిగా కదలడంతో ప్రయాణికులు తీవ్ర అసౌకర్యాన్ని ఎదుర్కొంటున్నారు.

Also Read: https://teluguprabha.net/ap-district-news/amaravati/ed-issues-notices-to-ysrcp-mp-mithun-reddy-in-liquor-scam-case/

దట్టమైన పొగమంచు ..

పొగమంచు ప్రభావం రహదారులకే పరిమితం కాకుండా విమాన రవాణాపై కూడా పడింది. ఉదయం వేళల్లో దట్టమైన పొగమంచు కారణంగా పలు విమాన సర్వీసులు రద్దుకావాల్సి వచ్చింది. విమానాశ్రయాల పరిసర ప్రాంతాల్లో విజిబిలిటీ తక్కువగా ఉండటంతో భద్రతా కారణాల దృష్ట్యా ఈ నిర్ణయాలు తీసుకున్నట్లు సమాచారం. వాతావరణ శాఖ తెలిపిన వివరాల ప్రకారం శ్రీకాకుళం, పార్వతీపురం మన్యం, విజయనగరం, అల్లూరి సీతారామరాజు, తూర్పు గోదావరి, ఏలూరు జిల్లాల్లో పొగమంచు తీవ్రత ఎక్కువగా కనిపిస్తోంది. ఈ జిల్లాల ప్రజలు ఉదయంవేళల్లో ప్రయాణాలకు ముందు వాతావరణ పరిస్థితులను గమనించాలని అధికారులు సూచిస్తున్నారు.

తెలంగాణ జిల్లాల్లో..

తెలంగాణలో కూడా ఇదే తరహా పరిస్థితులు కొనసాగుతున్నాయి. ముఖ్యంగా తూర్పు తెలంగాణ జిల్లాల్లో పొగమంచు ప్రభావం ఎక్కువగా ఉందని వాతావరణ నిపుణులు చెబుతున్నారు. భద్రాద్రి కొత్తగూడెం, మహబూబాబాద్, ములుగు, హన్మకొండ, జనగాం, సూర్యాపేట జిల్లాల్లో తెల్లవారుజామున దట్టమైన పొగమంచు కురుస్తోంది. కొన్ని ప్రాంతాల్లో ఉదయం 9 గంటల వరకు కూడా పొగమంచు కొనసాగడం వల్ల రోజువారీ కార్యకలాపాలు ఆలస్యమవుతున్నాయి. ఈ పరిస్థితులు మరికొన్ని ప్రాంతాలకు కూడా విస్తరించే అవకాశం ఉందని నిపుణులు అంచనా వేస్తున్నారు. రాబోయే కొద్ది రోజుల పాటు ఇదే వాతావరణం కొనసాగే సూచనలు ఉన్నాయని తెలంగాణ వెదర్ మ్యాన్ తెలిపారు.

సింగిల్ డిజిట్ ..

చలి తీవ్రత విషయానికి వస్తే తెలంగాణలో గతంతో పోలిస్తే ఉష్ణోగ్రతలు కొంత మేర పెరిగినట్లు గమనించవచ్చు. ఒకప్పుడు సింగిల్ డిజిట్ ఉష్ణోగ్రతలు నమోదైన ఆదిలాబాద్ జిల్లాలో ప్రస్తుతం అత్యల్ప ఉష్ణోగ్రత 13.7 డిగ్రీలుగా ఉంది. మెదక్‌లో 13.8 డిగ్రీలు నమోదయ్యాయి. రామగుండంలో 15.6 డిగ్రీలు, హన్మకొండలో 16 డిగ్రీలు, మహబూబ్‌నగర్‌లో 17 డిగ్రీలు, నల్గొండలో 17.4 డిగ్రీలు, నిజామాబాద్‌లో 17.2 డిగ్రీలు, భద్రాచలంలో 18.2 డిగ్రీల కనిష్ఠ ఉష్ణోగ్రతలు నమోదయ్యాయి. అదే సమయంలో ఆదిలాబాద్‌లోనే అత్యధికంగా 33.8 డిగ్రీల ఉష్ణోగ్రత నమోదు కావడం గమనార్హం.

Also Read:https://teluguprabha.net/ap-district-news/amaravati/nara-lokesh-draws-attention-at-davos-with-new-look-and-investment-focus/

వాతావరణ పరిస్థితులపై..

రాజధాని హైదరాబాద్ వాతావరణ పరిస్థితులపై చూస్తే, నగరంలో సగటు కనిష్ఠ ఉష్ణోగ్రత 17.5 డిగ్రీలుగా ఉంది. అయితే ప్రాంతాల వారీగా స్వల్ప తేడాలు కనిపిస్తున్నాయి. రాజేంద్రనగర్ ప్రాంతంలో 13.5 డిగ్రీల కనిష్ఠ ఉష్ణోగ్రత నమోదు కాగా, హయత్‌నగర్‌లో 13.6 డిగ్రీలు నమోదయ్యాయి. హకీంపేటలో 15.2 డిగ్రీలు, పటాన్ చెరులో 15 డిగ్రీలు, దుండిగల్‌లో 16.4 డిగ్రీలు, బేగంపేటలో 17.5 డిగ్రీల కనిష్ఠ ఉష్ణోగ్రతలు నమోదయ్యాయి. నగరంలో అత్యధికంగా బేగంపేట ప్రాంతంలో 31.7 డిగ్రీల ఉష్ణోగ్రత నమోదైంది.