Andhra Pradesh-Sthree Shakti Scheme:ఆంధ్రప్రదేశ్ ప్రభుత్వం మహిళల కోసం ప్రత్యేకంగా రూపొందించిన స్త్రీశక్తి పథకాన్ని ఈ నెల 15 నుంచి అమలు చేయడానికి అన్ని ఏర్పాట్లు పూర్తిచేసింది. ఈ పథకం కింద రాష్ట్రవ్యాప్తంగా ఆర్టీసీ బస్సుల్లో మహిళలకు ఉచిత ప్రయాణ సదుపాయం అందించనుంది. ఇప్పటికే అధికారుల నుంచి తుది మార్గదర్శకాలు వెలువడ్డాయి. పథకానికి సంబంధించిన అన్ని సాంకేతిక, పరిపాలన చర్యలు కూడా దాదాపుగా పూర్తి అయ్యాయి.
రోజువారీగా ప్రయాణించే..
జిల్లాల వారీగా మహిళల సంఖ్య, రోజువారీగా ప్రయాణించే వారి అంచనాలను అధికారుల బృందం సేకరించింది. ఉదాహరణకు ఒక జిల్లాలో 23.44 లక్షల జనాభా ఉండగా, అందులో 11.74 లక్షల మంది మహిళలు ఉన్నట్లు రికార్డులు చెబుతున్నాయి. ఈ లెక్కల ప్రకారం రోజుకు కనీసం 25 వేల మంది మహిళలు ఉచిత బస్సు సదుపాయం వినియోగించే అవకాశం ఉందని అధికారులు భావిస్తున్నారు.
ఐదు రకాల బస్సులను..
ఈ పథకం కింద ప్రభుత్వం ఐదు రకాల బస్సులను ఎంపిక చేసింది. వీటిలో పల్లెవెలుగు, అల్ట్రా పల్లెవెలుగు, సిటీ ఆర్డినరీ, ఎక్స్‌ప్రెస్, మెట్రో ఎక్స్‌ప్రెస్ సేవలు ఉన్నాయి. రాష్ట్రంలోని ఏ జిల్లాలోనైనా మహిళలు ఈ బస్సుల ద్వారా ఉచితంగా ప్రయాణించవచ్చు. ఒక జిల్లాకు పరిమితం కాకుండా, రాష్ట్రంలోని ఇతర ప్రాంతాలకు కూడా ఈ సదుపాయం వర్తిస్తుంది. దాంతో, దూరప్రాంతాల్లో ఉన్న బంధువుల ఇళ్లకు, ప్రధాన ఆలయాలకు, ఆధ్యాత్మిక కేంద్రములకు టిక్కెట్ కొనుగోలు చేయకుండా వెళ్లే అవకాశం లభించనుంది. ఈ కారణంగా బస్సులపై డిమాండ్ మరింత పెరిగే అవకాశముంది.
ఉచిత ప్రయాణ సౌకర్యాన్ని..
ఉచిత ప్రయాణ సౌకర్యాన్ని పొందడానికి మహిళలు గుర్తింపు కార్డు తప్పనిసరిగా వెంట ఉంచుకోవాలి. ఆధార్ కార్డు, రేషన్ కార్డు లేదా ఓటర్ ఐడీ చూపిస్తే సరిపోతుంది. ఈ పథకం కింద ప్రయాణించిన మహిళలకు కండక్టర్ “స్త్రీశక్తి” పేరుతో 0 రూపాయల టిక్కెట్ ఇస్తారు. ఈ టిక్కెట్ల ద్వారా ఎంతమంది ప్రయాణించారు, ఎంత దూరం వెళ్లారు అనే వివరాలు ప్రతిరోజూ ఆర్టీసీ అధికారులు ప్రభుత్వానికి నివేదిస్తారు. తర్వాత ఆ ప్రయాణ వ్యయాన్ని ప్రభుత్వం ఆర్టీసీకి చెల్లిస్తుంది.
విజయనగరం, శృంగవరపుకోట ఆర్టీసీ డిపోల పరిధిలో ప్రస్తుతం 60 రూట్లలో బస్సులు నడుస్తున్నాయి. ఇప్పటివరకు రోజుకు సుమారు 12 వేల మంది మహిళలు బస్సుల్లో ప్రయాణిస్తుండగా, ఉచిత సదుపాయం అందుబాటులోకి రాగానే ఆ సంఖ్య 25 వేలకు చేరుకునే అవకాశం ఉందని అధికారులు అంచనా వేస్తున్నారు.
ప్రయాణికుల సంఖ్య పెరగనున్నందున, ఆర్టీసీ అధికారులు బస్‌స్టాండ్‌లలో మౌలిక సదుపాయాల విస్తరణపై దృష్టి పెట్టారు. తాగునీటి సౌకర్యం, ఫ్యాన్ల ఏర్పాటు, కాంప్లెక్స్‌ల ఆధునికీకరణ వంటి పనులు చేపడుతున్నారు. ఈ పథకం కేవలం ఉచిత ప్రయాణానికే కాకుండా, బస్‌స్టాండ్‌ల అభివృద్ధికి కూడా దోహదం చేయనుందని భావిస్తున్నారు.
రద్దీ ఎక్కువగా ఉండే పరిస్థితుల్లో వివాదాలు, ఘర్షణలు తలెత్తకుండా కండక్టర్లకు బాడీవార్న్ కెమెరాలు ఇవ్వాలని అధికారులు నిర్ణయించారు. ఇవి వారి దుస్తులకే అమర్చుకునే విధంగా ఉంటాయి. అదనంగా, బస్సులలో సీసీ కెమెరాలు అమర్చే ప్రక్రియ కూడా కొనసాగుతోంది.
అయితే ఈ సౌకర్యం అన్ని రకాల బస్సులకు వర్తించదు. నాన్‌స్టాప్, ఇంటర్‌స్టేట్ ఎక్స్‌ప్రెస్, లగ్జరీ, సూపర్ లగ్జరీ, ఇంద్ర ఏసీ బస్సులు ఈ పథకానికి మినహాయింపు. అలాగే ఘాట్ రోడ్లపై నడిచే బస్సుల్లో కూడా ఈ సదుపాయం ఉండదు.
