Chandrababu :జూనియర్ ఎన్టీఆర్ నటించిన ‘వార్ 2’ సినిమా విడుదల సందర్భంగా అనంతపురం రూరల్ ఎమ్మెల్యే దగ్గుపాటి ప్రసాద్ చేసిన వ్యాఖ్యలు రాష్ట్రంలో పెను దుమారం రేపాయి. ఎన్టీఆర్ సినిమాను టీడీపీ కార్యకర్తలు చూడొద్దని దగ్గుపాటి ప్రసాద్ పిలుపునివ్వడంతో, జూనియర్ ఎన్టీఆర్ అభిమానులు తీవ్ర ఆగ్రహం వ్యక్తం చేశారు. ఎమ్మెల్యే ఇంటి వద్ద పెద్ద ఎత్తున ఆందోళన నిర్వహించారు.
ఈ వ్యవహారం టీడీపీ అధిష్టానం దృష్టికి చేరడంతో, ముఖ్యమంత్రి చంద్రబాబు వెంటనే జోక్యం చేసుకున్నారు. ఎమ్మెల్యే దగ్గుపాటి ప్రసాద్‌ను తన వద్దకు పిలిపించుకుని క్లాస్ తీసుకున్నారు. ప్రజా ప్రతినిధులుగా మీరు పరిణితితో వ్యవహరించాలి, పార్టీకి, అభిమానులకు మధ్య గొడవలు సృష్టించడం సరికాదంటూ తీవ్రంగా హెచ్చరించారు.
అయితే, తన వ్యాఖ్యలు ఉద్దేశపూర్వకంగా చేసినవి కాదని దగ్గుపాటి ప్రసాద్ సీఎంకు వివరణ ఇచ్చారు. నియోజకవర్గంలో అందరితో కలిసి పని చేయాలని, సమన్వయం చేసుకోవాలని చంద్రబాబు ప్రసాద్‌ను ఆదేశించారు. ఈ సంఘటనతో టీడీపీలో అంతర్గత విభేదాలు బయటపడ్డాయని, ఇలాంటి ఘటనలు పార్టీకి నష్టమని రాజకీయ విశ్లేషకులు అభిప్రాయపడుతున్నారు. చంద్రబాబు నాయుడు తీసుకున్న ఈ కఠిన నిర్ణయం పార్టీలో క్రమశిక్షణను పెంచుతుందని భావిస్తున్నారు. ఈ వివాదం తర్వాత పరిస్థితి ఎలా ఉంటుందో వేచి చూడాలి.
