AP Rains: అల్పపీడన ప్రభావంతో ఆంధ్రప్రదేశ్లో ఈ రోజు భారీ వర్షాలు కురిసే అవకాశం ఉందని రాష్ట్ర విపత్తుల నిర్వహణ సంస్థ ఎండీ ప్రఖర్ జైన్ తెలిపారు. అల్లూరి, కోనసీమ, ఏలూరు, ఎన్టీఆర్, కృష్ణా, గుంటూరు, బాపట్ల, పల్నాడు, ప్రకాశం జిల్లాల్లో మోస్తరు నుంచి భారీ వర్షాలు కురుస్తాయని వెల్లడించారు. మిగతా జిల్లాల్లో తేలికపాటి నుంచి మోస్తరు వర్షాలు ఉంటాయని పేర్కొన్నారు. కృష్ణా నది పరివాహక ప్రాంతాలు, లంక గ్రామాల ప్రజలు అప్రమత్తంగా ఉండాలని సూచించారు.
ALSO READ: Free medical services : పేదవాడికి కార్పొరేట్ వైద్యం.. ఆ ఆసుపత్రిలో అన్నీ ఉచితం!
ప్రకాశం బ్యారేజీ వద్ద ఎగువ నుంచి 4 లక్షల క్యూసెక్కులకు పైగా వరద ప్రవాహం చేరుతోంది. దీంతో అధికారులు మొదటి స్థాయి ప్రమాద హెచ్చరిక జారీ చేశారు. వరద నీటిలో ఈతకు వెళ్లడం, చేపలు పట్టడం, నాటు పడవలతో ప్రయాణించడం వంటివి చేయవద్దని హెచ్చరించారు. రైతులు తమ పంటలను కాపాడుకోవడానికి అవసరమైన జాగ్రత్తలు తీసుకోవాలని సూచించారు.
వాతావరణ శాఖ అంచనాల ప్రకారం, ఈ అల్పపీడనం రాయలసీమ, తెలంగాణ సరిహద్దు ప్రాంతాల్లో కూడా ప్రభావం చూపే అవకాశం ఉంది. రానున్న 24 గంటల్లో వర్షాల తీవ్రత కొనసాగవచ్చని, తీరప్రాంత జిల్లాల్లో గాలులతో కూడిన వర్షాలు ఉండవచ్చని తెలిపారు. ప్రజలు అత్యవసర సందర్భాల్లో 112 నంబర్కు సంప్రదించాలని, అధికారులు అందుబాటులో ఉన్నారని విపత్తుల నిర్వహణ సంస్థ తెలిపింది. సురక్షితంగా ఉండండి, అవసరమైన జాగ్రత్తలు తీసుకోండి!