Bigg Boss Promo 2 Today: ఈ వైల్డ్ కార్డులేమో కానీ.. ఈ వారం బిగ్ బాస్ లో టాస్కుల మోత మోగిపోయింది. ఇక, టాస్కులకు సంబంధించిన బిగ్‌బాస్ సెకండ్ ప్రోమో వచ్చింది. మొదటి ప్రోమోలో కలర్ హోల్ టాస్క్ పెట్టాడు బిగ్‌బాస్. అయితే ఆ టాస్కు పూర్తయిన తర్వాత లీడర్ బోర్డ్‌లో పాయింట్ల పట్టిక చూస్తే సుమన్-శ్రీజ జోడి చివరిలో నిలిచింది. దీంతో వాళ్లని ఈ రేసు నుంచి తప్పిస్తారని ఆడియన్స్ అనుకున్నారు. కానీ బిగ్‌బాస్ చిన్న ట్విస్ట్ ఇస్తూ చివరి రెండు జోడీల్లో ఎవరిని తీయాలా అనేది మీ ఇష్టం అంటూ మొదటి స్థానంలో ఉన్న దివ్య-భరణి జోడీకి స్పెషల్ పవర్ ఇచ్చాడు. ఇక దానికి సంబంధించిన వివరాలు చూద్దామిప్పుడు.
భరణి- దివ్య టీమ్ లీడ్ లో..
బిగ్‌బాస్ ఈరోజు ఎపిసోడ్‌కి సంబంధించిన సెకండ్ ప్రోమోలో చిన్న ట్విస్ట్ ఉంది. కలర్ హోల్ టాస్క్ జరిగిన తర్వాత లీడర్ బోర్డ్‌లో భరణి-దివ్య టీమ్ 260 పాయింట్లతో టాప్‌లో నిలిచింది. ఆ తర్వాత డీమాన్-రీతూ టీమ్ 250 పాయింట్లతో రెండో స్థానంలో ఉంది. తనూజ-కళ్యాణ్ టీమ్ 210 పాయింట్లతో మూడో స్థానంలో, సంజన-ఫ్లోరా టీమ్ 180తో నాలుగో స్థానంలో, శ్రీజ-సుమన్ జోడీ 130 పాయింట్లతో చివరి స్థానంలో నిలిచారు. దీంతో మొదటి స్థానంలో ఉన్న భరణి-దివ్య జోడీకి బిగ్‌బాస్ ఒక స్పెషల్ పవర్ ఇచ్చాడు. మొదటి స్థానంలో ఉన్న భరణి-దివ్యకి నేను ఒక ప్రత్యేకమైన అధికారాన్ని ఇస్తున్నాను.. దాన్ని ఉపయోగించి బాటమ్ టూ జంటలైన సంజన ఫ్లోరా, శ్రీజ-సుమన్‌లో నుంచి వారు సాధించిన పాయింట్లతో సంబంధం లేకుండా మీ కారణాలతో ఆ జంటని ఎంపిక చేసి ఈ రేసు నుంచి తొలగించండి.. అంటూ షాకిచ్చాడు.
సంజన-ఫ్లోరా టీమ్ ఔట్
పాయింట్ల ఆధారంగా అయితే శ్రీజ-సుమన్‌ని తీయాలి. కానీ దివ్య-భరణి తెలివిగా ఆలోచించి సంజన-ఫ్లోరా టీమ్‌ని పీకి పారేశారు. ప్రతి టాస్క్ పెర్ఫామెన్స్‌ కూడా లెక్కేశాం.. జరగబోయే టాస్కుల్లో మా సేఫ్టీ గురించి కూడా మేము ఆలోచించాం.. ఇవన్నీ ఆలోచించి తీసుకున్న డెసిషన్ ఇది.. అంటూ భరణి అన్నాడు. సంజన-ఫ్లోరా గారి టీమ్‌ని తీసేద్దామనుకుంటున్నాం.. కొంచెం కాంపిటేషన్ తగ్గించుకోవాలనే ఒక ఐడియా తప్ప ఇంకేం లేదు.. అందుకే మీ టీమ్‌ని తీద్దామనుకుంటున్నాం.. అని దివ్య చెప్పింది. తమని తీసేయడంతో సంజన హర్ట్ అయింది. ఈ డెసిషన్ చాలా అన్యాయం.. ఇలాంటిది మాకు రావాల్సింది కాదు.. ఎంత కష్టపడినా ఇక్కడ ఆ కష్టానికి అర్థమే లేదు, సపోర్ట్ కూడా లేదు.. కర్మ సిద్ధాంతం ప్రకారం ఏది పైకి పోతుందో అది కిందకి వస్తుంది.. కింద ఉన్నది పైకి వస్తుంది.. మళ్లీ ఫైట్ చేస్తాను నేను గివప్ ఇవ్వను.. అంటూ సంజన ఎమోషనల్ అయింది. అంతకుముందు టాస్కులోనూ సంజన కన్నీళ్లు పెట్టుకుంది. ఇంతలా ఫిజికల్ టాస్కులు పెడితే ఎలా.. నేను ఇంటికెళ్లిపోతాను అంటూ ఎమోషనల్ అయ్యింది.
రామూని ఆటపట్టించిన రీతూ
ఇక రెండో ప్రోమో మొదటిలో కెప్టెన్ రాముని సరదాగా ఆటపట్టించారు రీతూ-సంజన. ఇంట్లో నుంచి బయటికి రండి అని రాము పిలిస్తే “మేము రాము బయటికి రాము.. రాము బయటికి రాము..” అంటూ ఇద్దరూ పాట పాడారు. ప్లీజ్‌యే నీకు దండం పెడతాను రా.. అంటూ రీతూని బతిమలాడాడు రాము. దబిడి దిబిడి స్టెప్ వెయ్ వెళ్లిపోతాం.. అని రీతూ కండీషన్ పెట్టింది. ఇంతలో ఇమ్మూ వచ్చి.. ఇంట్లో నుంచి ఎవరైనా బయటికి వెళ్లకపోతే ఇలా హగ్ చేసుకొని ఇలా తీసి బయటికి తీసుకెళ్లే అవకాశం కూడా ఉంటుంది.. అంటూ రాముకి సలహా ఇచ్చాడు. అవునా అంటూ రాము.. రీతూని పట్టుకోవడానికి రాగానే రేయ్.. అంటూ రీతూ పారిపోయింది. దీంతో, ఈ ప్రోమో ఎండ్ అయ్యింది.
