Bigg Boss Updates: బిగ్‌బాస్ హౌస్‌లో వైల్డ్ కార్డులు ఎంట్రీ అయ్యాక పోరు రసవత్తరంగా మారింది. మొత్తానికైతే ఆరోవారం నామినేషన్స్ ప్రక్రియ పూర్తయింది. రెండు రోజుల పాటూ ఈ నామినేషన్స్‌ని సా…గదీశాడు బిగ్‌బాస్. అయితే నామినేషన్స్ ఓవైపు హీటెక్కిస్తే మరోవైపు హౌస్‌లో సరికొత్త బంధాలు మొదలయ్యాయి. “భరణి గారి ఉమ్మడి కుటుంబం” ఇప్పటివరకూ బిగ్‌బాస్ 9 ఇలానే ఓ ఫ్యామిలీ సీరియల్‌లా సాగిపోయింది. పెద్దాయన భరణికి ఓ చిట్టి కూతురు తనూజ.. బుజ్జి చెల్లి దివ్య. వీళ్లిద్దరి మధ్యలో ఎటూ తేల్చకోలేక ఇరుక్కుపోయి భరణి పడే వేదనకి నేటితో శుభం కార్డు పడిపోయింది. ఉమ్మడి కుటుంబం ముక్కలైంది. మొన్నటివరకూ నాన్న నాన్న అంటూ భరణి వెంటపడిన తనూజ ఇప్పుడు పూర్తిగా రూటు మార్చి రాజు రాజు అంటుంది. మరి ఆ రాజు ఎవరు..? రాత్రి పూట ఆ గుసగుసలు ఏంటో చూసేద్దాం. ఈరోజు ఎపిసోడ్‌లో ఏమైందో ఓ లుక్కేద్దాం.

రీతూ చేతికి బాల్

నిన్నటి ఎపిసోడ్‌కి కొనసాగింపుగా నామినేషన్స్ ప్రక్రియ మళ్లీ మొదలైంది. ఈసారి బాల్ అందుకొని రీతూ చేతికి ఇచ్చింది మాధురి. ఇక రీతూ ముందుగా భరణిని నామినేట్ చేసింది. నిజానికి భరణిని నామినేట్ చేస్తానని రీతూ ముందు చెప్పింది కనుకే మాధురి తనకి బాల్ ఇచ్చింది. భరణిని నామినేట్ చేస్తూ రీతూ చెత్త రీజన్లు చెప్పింది. నాకు మీరు కెప్టెన్సీ టాస్కులో సపోర్ట్ చేయలేదు.. మీరు హెల్ప్ చేస్తానని మాట ఇచ్చి కూడా చేయలేదు.. మీ వల్లే నా కెప్టెన్సీ పోయింది.. మాట ఇస్తే నిలబెట్టుకోవాలి.. ఇలా చేస్తే ఎలా.. అంటూ ఏదో భరణి తనని కెప్టెన్ చేయడానికే హౌస్‌లోకి వచ్చినట్లు మాట్లాడింది రీతూ. ఇక దీనికి భరణి కూడా కూల్‌గానే ఆన్సర్ ఇచ్చాడు. నేను నీ ఒక్కదానికే మాట ఇవ్వలేదు.. రాముకి కూడా ఇచ్చాను. కనుక నీ కంటే రాము ఎక్కువ అనిపించి తనకి సపోర్ట్ చేశా అంటూ భరణి డిఫెండ్ చేసుకున్నాడు.

Read Also: Duvvada Srinivas: మాధురితో పాటు నేనూ వెళ్లాల్సిందే కానీ.. బిగ్ బాస్ ఎంట్రీపై దువ్వాడ కామెంట్స్

చిచ్చు రేపిన దోస లొల్లి..

తన రెండో నామినేషన్ దివ్యకి వేసింది రీతూ. నాకు ఈరోజు టిఫిన్ టైమ్‌కి దొరకలేదు.. దాని వల్ల నాకు చాలా ఇబ్బంది అయింది నీరసం వచ్చి కళ్లు తిరిగాయ్.. నువ్వు రేషన్ మానిటర్ కాబట్టి నీ వల్లే నాకు టిఫిన్ లేట్ అయిందని.. నువ్వే రీజన్ అని నామినేట్ చేస్తున్నా అంటూ రీతూ చెప్పింది. రీతూ చెప్పిన పాయింట్ విన్న తర్వాత ఇది రీతూ నామినేషన్‌లా అనిపించలేదు. దివ్యతో మాధురికి గొడవ ఉంది కాబట్టి ఆమె ఇండైరెక్ట్‌గా రీతూతో నామినేట్ చేయించినట్లుగా ఉంది. దీంతో దోస కోసం నన్ను నువ్వు నామినేట్ చేస్తున్నావా అని దివ్య కామెడీ చేసింది. నీకు అది పెద్ద విషయం కాకపోవచ్చు కానీ నాకు పెద్ద ఇష్యూ అంటూ రీతూ చెలరేగిపోయింది.

మాధురితో అట్టా ఉంటది..

అయితే ఈ రెండింటిలో ఒకరిని సేఫ్ చేసి ఒక నామినేషన్ మాత్రమే సెలక్ట్ చేయాలి. నేను భరణిని సేవ్ చేస్తున్నాను దివ్యని నామినేట్ చేయాలనుకుంటున్నాను.. అంటూ మాధురి షాకిచ్చింది. మేము హౌస్‌కి కొత్తగా వచ్చాం.. మీరు చాలా రోజులుగా ఉన్నారు.. మాకు కోఆపరేట్ చేయాలి.. మా మీద అరవకూడదు.. అని మాధురి చెప్పింది. అది మీ తీరు బట్టి ఉంటుందండి.. మీరు అరిస్తే నేనూ అరుస్తాను.. అంటూ దివ్య ఫైర్ అయ్యింది. సరే అరవండి.. ఏం ఫర్లేదు అరుచుకుందాం.. నాకు అయితే అది నచ్చలేదు.. హౌస్‌లో ఉన్నవాళ్లందరూ మాతో ఇంటరాక్ట్ అయ్యారు.. కానీ మీరు ఎంతసేపు భరణిగారితో తప్ప ఎవరితోనూ ఇంట్రాక్ట్ అవ్వలేదు.. అని మాధురి పర్సనల్ అటాక్ చేసింది. నాకు మీతో అవ్వాలని కూడా లేదు.. అని ముఖం మీదే దివ్య చెప్పేసింది. సరే మీ ఇష్టం నేను చెప్తున్నాను మీ ఆన్సర్ నేను అడగలేదు కదా..ఇదిగో ఈ ఆటిట్యూడ్ కారణంగానే ఆమెని నామినేట్ చేస్తున్నాను.. అది ఆటిట్యూడ్..అంటూ మాధురి చెప్పేసి కూర్చుంది.

Read Also: Dammu Sreeja: దమ్ము శ్రీజ రీఎంట్రీ కోసం నెటిజన్ల డిమాండ్

వాయమ్మో సీరియల్ విలన్ సినిమా చూపిస్తాడంట..

కాసేపు బ్రేక్ దొరకడంతో దివ్య-రాము-భరణి మాట్లాడుకున్నారు. ఇదేంటి నేను మీకు దగ్గరైపోయాను తనని దూరం చేసేశాను అంటుంది.. తను రోజూ ఏడుస్తుంది మీకోసం..నేను ఇక్కడేంటి సీరియల్‌లో విలన్‌ని.. ఏంటి నాకిది.. తను అలా చెప్తుంది అందరికీ ఏడుస్తుంది.. అంటూ తనూజ గురించి చెప్తూ భరణితో కంప్లెయింట్ చేసింది దివ్య. ఇలా తయారేంటి అందరూ.. సైకోలు ఉంటారు చూడు.. చెప్తా.. నేను కొడితే దెబ్బ అదోలా ఉంటుందని జనాలకి తెలిసే టైమ్ వచ్చింది రాము..కొడతాను చూడరా ఇక్కడి నుంచి ఒక్కొక్కడినీ.. నువ్వు ఏం మాట్లాడకు సినిమా చూస్తూ ఉండు.. పిక్చర్ చూస్తూ ఉండు అంతే.. అంటూ భరణి అన్నాడు. ఇప్పటికి ఒక్కసారి కూడా రీతూని నామినేట్ చేయలేదు నేను.. దొరుకుతారు అందరూ దొరుకుతారు.. వాళ్లకి తెలియట్లేదు తెలుసా వాళ్లకి.. నన్ను టార్గెట్ చేసి నన్ను మాటలు అన్నవాళ్లు నేను ఏమీ చేయకుండానే వెళ్లిపోతున్నారు చూసుకో నువ్వు కావాలంటే.. నేను మళ్లీ ఎవరినీ నామినేట్ చేయలేదు.. అంటూ రీతూ గురించి దివ్యతో చెప్పాడు భరణి.

బాల్ సంపాదించిన గౌరవ్..

నెక్స్ట్ వైల్డ్‌కార్డ్స్ నుంచి గౌరవ్ బాల్ సంపాదించి సంజనకి ఇచ్చాడు. ఇక సంజన రాముని ఫస్ట్ నామినేట్ చేసింది.రాము నీకు అనిపించలేదా అక్కడ బెడ్ టాస్కులో ఒక్క అమ్మాయిని నలుగురు అబ్బాయిలు అలా ఎత్తుకొని తీసుకుపోయారు.. రూల్ మార్చేద్దామని.. అలానే నన్ను ఇంట్లో పడుకోనివ్వలేదు.. ఓపెన్‌గా భరణికి సపోర్ట్ చేశావ్ సంచాలక్‌గా.. లిట్రల్లీ వాళ్లు గుండాల్లా వచ్చేసి అమ్మాయిల్ని తీసి ఇట్లా పాడేస్తున్నారు.. మీరేం చేస్తున్నారు సంచాలక్‌గా.. అంటూ సంజన ఫైర్ అయింది. దీనికి రాము కూడా గట్టిగానే ఆన్సర్ ఇచ్చాడు. మీరు గేమ్ ఆడటానికి ఇక్కడికి వచ్చారంటేనే మీకు అది తెలుసుండాలి.. ఇక్కడ జెండర్ బయాస్ ఏం లేదు.. అందరూ కలిసే ఆడాలి.. అక్కడ నా అక్క ఉన్నా నా చెల్లి ఉన్నా నేను అలానే చేస్తాను.. మేము ఇక్కడ కూర్చొని తినడానికి రాలేదు.. మేమూ గేమ్ ఆడుతున్నాం.. అన్నీ చూస్తున్నాం అంటూ రాము బదులిచ్చాడు.

భరణి వర్సెస్ సంజన

నెక్స్ట్ భరణిని నామినేట్ చేసింది సంజన. అసలు నేను మీ జోలికి రాకూడదు అనుకున్నాను.. ఎందుకంటే ఎలిమినేట్ అయిన నన్ను మీరు మీ త్యాగాలతో ఇక్కడికి తీసుకువచ్చారు.. అందుకే మీకు వ్యతిరేకంగా ఏం చేయనని మాటిచ్చాను.. కానీ నాకు బాలేనప్పుడు నన్ను హౌస్‌లోకి రాకుండా రాముతో మీరే చెప్పి అలా చేయించారు.. అది నాకు నచ్చలేదు అంటూ సంజన చెప్పింది. దీనికి భరణి ఇచ్చిపడేశాడు. మీ కోసం బాక్స్ త్యాగం చేసింది నేను.. అలాంటిది బెడ్ టాస్క్‌లో గేమ్ ఆడితే మీరు గూండాలు అని ఎలా అంటారు.. ఆ మాట వెనక్కి తీసుకోండి.. మరి ఇప్పుడు వైల్డ్‌కార్డ్స్‌లో వాళ్లు అమ్మాయిలు కాదా.. వాళ్లు పోటీపడలేదా.. గూండాలు అనకూడదు.. అంటూ భరణి క్లాస్ పీకాడు. ఇక ఒకవేళ నేను రాముతో మీ పేరు చెప్పి మిమ్మల్ని లోనికి రాకుండా అడ్డుకున్నానని ప్రూ చేస్తే నేనే హౌస్ నుంచి వాకౌట్ చేస్తా అంటూ భరణి సవాల్ చేశాడు. మధ్యలో సంజన మాట్లాడుతుంటే వినండి.. ముందు విను.. మీ గురించి చూసి చూసి మెంటల్‌గా అలసిపోయి మాట్లాడుతున్నా.. మా త్యాగాల వల్ల మీరు ఇక్కడ ఉన్నారు అది మర్చిపోకు.. ఆడియన్స్ కూడా సంజనని భరణిని చూస్తున్నారు.. ఎవరు ఏంటో వాళ్లకి తెలుసు అంటూ భరణి ఫైర్ అయ్యాడు. ఇక రాము-భరణిలో రాముని సేవ్ చేసి భరణిని నామినేట్ చేశాడు గౌరవ్.

నవ్వులు పూయించిన సుమన్ శెట్టి

ఆ నెక్స్ట్ రౌండ్‌లో అయేషాకి ఛాన్స్ దొరికింది. దీంతో బాల్ సుమన్ శెట్టి చేతికి ఇచ్చింది. సుమన్ శెట్టి ముందుగా తనూజని నామినేట్ చేశాడు. లాస్ట్ వీక్‌లో గేమ్స్‌కి టీమ్‌లు ఏర్పడేటప్పుడు నాతో టీమ్‌ అవుతానని నాకు మాట ఇచ్చావ్.. కానీ సైలంట్‌గా కళ్యాణ్‌తో వెళ్లిపోయావ్.. నువ్వు నేనూ ఆడుంటే ఇంకా బాగా నాకు ఉపయోగపడేదేమో.. అలానే నువ్వు హౌస్‌లో చాలా ఎమోషనల్ అయిపోతున్నావ్.. సెంటిమెంట్ ఎక్కువైపోయింది అనిపిస్తుంది అంటూ సుమన్ శెట్టి చెప్పాడు. నెక్స్ట్ సంజనని నామినేట్ చేస్తూ హౌస్‌లో ఏదైనా గొడవ జరుగుతుందంటే మీకెందుకమ్మా అంత సంతోషం.. వెళ్లి ఆపాలి కానీ అలా మీరు ఎంజాయ్ చేస్తారా అని సుమన్ యాక్షన్ చేసి చూపించడంతో హౌస్‌లో అందరూ తెగ నవ్వుకున్నారు. ఇక వీరిద్దరిలో తనూజని నామినేట్ చేసి సంజనని సేఫ్ చేసింది అయేషా. మీ ఇన్‌ఫ్లుయెన్స్, మీ ఫేవరిజం వల్ల ఇక్కడ మిగిలిన అమ్మాయిలకి అన్యాయం జరుగుతుంది అనేది నా పాయింట్.. ఎగ్జాంపుల్ చెప్పాలంటే నీ వల్ల భరణి గారి గేమ్ కూడా పాడైపోతుందని నాకు అనిపిస్తుంది.. ఆల్రెడీ స్టార్ మాలో చాలా మంచి సీరియల్స్ ఉన్నాయి ఇక్కడ అది అవసరం లేదు.. అంటూ అయేషా చెప్పింది. దీనికి ప్రతి దానికి భరణి సార్ వచ్చే నన్ను సపోర్ట్ చేశారా.. నేను ఏం సింగిల్‌గా గేమ్ ఆడలేదా అని తనూజ అడిగింది. నీకు ఏ ప్రాబ్లమ్ అయినా నాన్న ఎందుకు స్టాండ్ తీసుకోవట్లేదని ఏడవలేదా నువ్వు ఇక్కడ.. అని సూటిగా ప్రశ్నించింది అయేషా. అఫ్‌కోర్స్ ఎవరికి వాళ్లు ఇక్కడ ఫేవరెట్ ఉన్నారు.. ఎవరికి వాళ్లు సపోర్ట్ చేసుకోవడానికి ఉన్నారు.. అని తనూజ ఒప్పుకుంది. అంటే నీకు అసలు ఇక్కడ ఫేవరిజం లేదంటున్నావా.. అని మళ్లీ కొశ్చన్ చేసింది అయేషా.

నాన్న-బాయ్ ఫ్రెండ్ ఉంటే ఫైనల్‌కి పోదామా అన్నట్లుగా ఉంది

మేము డే 1 నుంచి క్లోజ్ ఉన్నాం కాబట్టి..ఆ బాండ్ ఉంది అంటూ తనూజ చెబుతుంటే ఆ అదే చెప్తున్నా మీరు క్లోజ్‌గా చాలా ఉన్నారని చెప్తున్నా.. అంటూ అయేషా అసలు తగ్గలేదు. అలానే మీరు ఈ హౌస్‌లో ఎప్పుడూ మీరు రెండు పనులు చేస్తారు.. ఒకటి అరుస్తారు.. ఎందుకు అరుస్తారో తెలీదు.. లేదంటే ఏడుస్తారు.. ఇప్పుడు కట్ చేస్తే మీరు ఈ నామినేషన్ అయిపోయాక భరణి గారి దగ్గరికెళ్లి నాన్న నా వల్ల నీ ఆట పోయిందా నాన్న అంటూ ఏడుస్తావ్.. చేసేది అదే అంటూ అయేషా అంది. మీరు ఒరిజినల్ నాన్న కూతురా కాదు కదా.. ఈ సీజన్ ఎలా అయిందంటే ఇక్కడ ఒక నాన్నో-బాయ్‌ఫ్రెండో ఉంటే ఓకే ఫినాలేకి వచ్చేద్దాం అనేలా ఉంది టుబీ ఫ్రాంక్.. అంటూ బుల్లెట్లు దింపింది అయేషా. ఈ మాటలకి ఇమ్మూ అయితే క్లాప్స్ కూడా కొట్టాడు. నిజం చెప్పాలంటే ఈ ఎపిసోడ్ లోనే వావ్ మూమెంట్ అదే.