Bigg Boss Telugu : బుల్లితెర ప్రేక్షకులను కట్టిపడేస్తున్న రియాలిటీ సమరం ‘బిగ్బాస్ తెలుగు 10’లో తొలి ఆదివారం ఎపిసోడ్ అనూహ్య మలుపులతో, నవ్వుల జడివానతో హోరెత్తింది. హోస్ట్ అక్కినేని నాగార్జున సమక్షంలో జరిగిన పంచాయతీలో బెంగాలీ భామ దేబ్జానీ మోదక్ కేంద్రబిందువుగా నిలిచి అందరి దృష్టినీ ఆకర్షించింది. అటు అమాయకత్వంతో కడుపుబ్బా నవ్విస్తూనే, ఇటు అందరి ముందూ తన మనసులోని ప్రేమను నిర్భయంగా బయటపెట్టి తోటి సభ్యులను, ప్రేక్షకులను విస్మయానికి గురిచేసింది. ఇంతకీ ఆమె బయటపెట్టిన ఆ వింత రహస్యం ఏమిటి? హౌస్‌లో కొత్తగా మొదలైన ఆ రొమాంటిక్ లవ్‌ ట్రాక్ ఎటు దారితీయనుంది.
ఎలిమినేషన్‌కు బ్రేక్.. ఊపిరి పీల్చుకున్న 14 మంది : మిడ్ వీక్‌లోనే ఇద్దరు సభ్యులు నిష్క్రమించడంతో ఆదివారం ఎవరి నెత్తిన ఎలిమినేషన్ పిడుగు పడుతుందోనని అంతా తీవ్ర ఉత్కంఠతో ఎదురుచూశారు. అయితే, ఊహించని రీతిలో హోస్ట్ నాగార్జున ఈ వారం ఎవరినీ ఇంటికి పంపించకుండా ఊరట కల్పించారు. దీంతో ప్రస్తుతం హౌస్‌లో ఉన్న మొత్తం 14 మంది కంటెస్టెంట్లు—దేబ్జానీ మోదక్, ముఖేష్‌ గౌడ, రాం ప్రసాద్, నటుడు కృష్ణుడు, వర్షిణి సౌందరాజన్‌, త్రిగుణ్‌, టెంపర్ వంశీ, జబర్దస్త్ నరేష్‌, సుధీర్ రెడ్డి, షాలిని, రోహిత్‌ నాయుడు, అమన్‌ మసూద్‌, సింగర్‌ జాన్సీ, సృష్టి వ్యాకరణం సేఫ్‌ జోన్‌లోకి చేరారు.
హృదయాల తూకం: దేబ్జానీకి పట్టం.. రోహిత్‌కు ముప్పు : ఆదివారం వేదికపై ‘మనసుకు దగ్గరైన వారు – దూరమైన వారు’ పేరిట ఆసక్తికర టాస్క్‌ నిర్వహించారు. ఇందులో అత్యధికులు దేబ్జానీకే జైకొట్టారు. రాం ప్రసాద్ మాట్లాడుతూ.. దేబ్జానీలో ఉండే అందమైన స్వార్థం తనకు బాగా నచ్చిందని, తోబుట్టువు భావన కలుగుతోందని చెప్పాడు. నటుడు కృష్ణుడు సైతం ఆమెది స్వచ్ఛమైన మనసని ప్రశంసించాడు. మరోవైపు రోహిత్‌ తీరుపై ఇంటిసభ్యులు అసంతృప్తి వ్యక్తం చేశారు. ఆంగ్లంలో ఎక్కువగా మాట్లాడుతూ, ఇతరులను చిన్నచూపు చూస్తున్నాడని కృష్ణుడు, ముఖేష్‌లు పేర్కొంటూ అతడిని ‘హార్ట్‌కు దూరమైన వ్యక్తి’గా తేల్చారు. దీంతో రాబోయే రోజుల్లో ఇది రోహిత్‌కు డేంజర్‌ బెల్‌ అని నాగార్జున హెచ్చరించారు.
నవ్వులు పూయించిన ఆరో తరగతి రహస్యం : సరదా సంభాషణల మధ్య తనకు కాఫీ కావాలని దేబ్జానీ కోరగా, నాగార్జున ఓ షరతు విధించారు. జీవితంలో ఇప్పటిదాకా ఎవరికీ చెప్పని రహస్యాన్ని బయటపెడితేనే కాఫీ లభిస్తుందని స్పష్టం చేశారు. దీనికి ఏమాత్రం తటపటాయించని దేబ్జానీ.. “నేను ఆరో తరగతి ఫెయిలయ్యాను సార్.. ఆ క్లాస్‌ను రెండుసార్లు చదివాను” అంటూ అమాయకంగా ఒప్పేసుకుంది. ఈ సమాధానంతో హౌస్‌ మొత్తం ఒక్కసారిగా నవ్వుల్లో మునిగిపోగా, నాగార్జున విస్మయంతో కూడిన నవ్వు చిందించారు.
కాఫీ ఎంత ఇష్టమో.. ముఖేష్‌ అంతే ఇష్టం : అక్కడితో ఆగకుండా దేబ్జానీ మరో అసలైన బాంబు పేల్చింది. ‘గుప్పెడంత మనసు’ ఫేమ్‌ ముఖేష్‌ గౌడ చేయి పట్టుకుని లేపి, తన మనసులోని మాటను నిర్మొహమాటంగా బల్లగుద్ది చెప్పింది “హౌస్‌లోకి అడుగుపెట్టినప్పటి నుంచీ ముఖేష్‌ అంటే నాకు చాలా ఇష్టం. కానీ చెప్పలేకపోయాను. ఆయన అటువైపు, ఇటువైపు వెళ్లి పులిహోర కలుపుతున్నాడు కానీ నా దగ్గరికే రావడం లేదు. నాకు కాఫీ ఎంత ఇష్టమో.. ముఖేష్‌ కూడా అంతే ఇష్టం” అని మనసు విప్పింది. దీంతో బిగ్బాస్ వేదికపై సరికొత్త రొమాంటిక్ ట్రాక్ మొదలైనట్టేనని ప్రేక్షకులు భావిస్తున్నారు.
చేతులు మారిన ‘పవర్ కీ’.. ఆడియన్స్‌కు సర్వాధికారాలు : ఇంట్లో పవర్ కీస్ ఉన్న 9 మందిలో ఒకరికి ‘బ్లాక్ కీ’ ఇవ్వాలని నాగార్జున సూచించగా, మెజారిటీ సభ్యులు సృష్టికి మద్దతు పలకలేదు. దీంతో ఆమె పవర్ కోల్పోయింది. అనంతరం జరిగిన పోటీలో యూట్యూబర్ సుధీర్ రెడ్డి గెలుపొంది ఆ పవర్ కీని దక్కించుకున్నాడు. ఇక ఎపిసోడ్ చివర్లో నాగార్జున అదిరిపోయే ట్విస్ట్‌ ఇచ్చారు. రెండో వారంలో కెప్టెన్సీ కంటెండర్లను ఎంపిక చేసే పూర్తి నిర్ణయాధికారాన్ని ప్రేక్షకుల ఓటింగ్‌కే అప్పగిస్తున్నట్లు ప్రకటించి ఆటను సరికొత్త మలుపు తిప్పారు.