avoid financial mistakes employees: పని చేస్తున్న వ్యక్తులు తమ భవిష్యత్తు కోసం ఆర్థికంగా సురక్షితంగా ఉండాలంటే, ఖచ్చితమైన ప్రణాళిక, పొదుపు అలవాట్లు తప్పనిసరిగా చేసుకోవాలి. అయితే చాలా మంది తమ ఆదాయాన్ని మించి ఖర్చు చేస్తూ, కొన్ని సాధారణ ఆర్థిక తప్పిదాలు చేస్తారు. ఈ తప్పులు దీర్ఘకాలంలో ఆర్థిక ఇబ్బందులకు దారితీస్తాయి. ఉద్యోగులు తప్పక నివారించాల్సిన ఐదు ముఖ్యమైన ఆర్థిక తప్పిదాలు, వాటికి పరిష్కారాలను వివరంగా తెలుసుకుందాం.
జీతం పెరిగిన వెంటనే ఖర్చులు పెంచడం
పెరుగుతున్న జీతం ఆధారంగా ఖర్చులు పెంచుతారు. జీవితాన్ని జీవితశైలిని మెరుగుపరచడానికే ఖర్చుచాలా మందిలో కనిపించే అలవాటు. దీనిని ‘జీవితశైలి ద్రవ్యోల్బణం’ (Lifestyle Inflation) అంటారు. ఖరీదైన ఫోన్లు, లగ్జరీ వస్తువులు, రెస్టారెంట్‌లో తరచూ తినడం వంటి ఖర్చులు మీ పొదుపును తగ్గిస్తాయి.
పరిష్కారం: జీతం పెరిగిన వెంటనే పూర్తిగా ఖర్చు చేయకుండా, కనీసం 50% మొత్తాన్ని పొదుపు లేదా పెట్టుబడులలో పెట్టండి. ఉదాహరణకు, జీతం రూ.10,000 పెరిగితే, రూ.5,000ను SIP, ఫిక్సడ్ డిపాజిట్, లేదా రిటైర్మెంట్ పథకాల్లో పెట్టుబడి చేయండి.
క్రెడిట్ కార్డ్ దుర్వినియోగం
క్రెడిట్ కార్డులు సౌకర్యవంతంగా అనిపించినా, అవి సకాలంలో చెల్లించకపోతే అధిక వడ్డీ బాద్యతను తీసుకురాగలవు. చిన్నచిన్న ఖర్చులకూ కార్డును వాడటం, వడ్డీ, లేట్ ఫీజుల రూపంలో ఆర్థిక ఒత్తిడిని కలిగిస్తుంది.
పరిష్కారం: క్రెడిట్ కార్డును తెలివిగా వాడాలి. ప్రతి నెల బకాయిలను పూర్తిగా చెల్లించండి. మీ కార్డు నిబంధనలు వడ్డీ రేట్లు, వార్షిక రుసుములు మొదలైనవి తెలుసుకోవడం ముఖ్యం.
పొదుపు, పెట్టుబడులను ఆలస్యం చేయడం
చాలామంది పొదుపు లేదా పెట్టుబడులను తమ 30ల వయస్సు తర్వాత ప్రారంభిస్తారు. ఇది చక్రవడ్డీ ప్రయోజనాన్ని కోల్పోవడానికి దారితీస్తుంది.
పరిష్కారం: మొదటి జీతం నుంచి కనీసం 20-30% మొత్తాన్ని పొదుపులకు కేటాయించండి. SIP ద్వారా మ్యూచువల్ ఫండ్లలో నెలవారీ రూ.500- రూ.1000తో ప్రారంభించవచ్చు. దీర్ఘకాలంలో ఇది పెద్ద మొత్తంగా పెరుగుతుంది.
అత్యవసర నిధి, బీమా లేకపోవడం
వైద్య అవసరాలు లేదా ఉద్యోగం కోల్పోవడం వంటి ఆపత్కాలాల్లో అత్యవసర నిధి లేకపోవడం వల్ల ఆర్థికంగా గందరగోళం వస్తుంది. అలాగే వైద్య ఖర్చులు పొదుపును తుడిచిపెడతాయి.
పరిష్కారం: కనీసం 6 నెలల ఖర్చులకు సమానంగా అత్యవసర నిధిని సిద్ధం చేయాలి. నెలవారీ ఖర్చులు రూ.50,000 అయితే, రూ.3 లక్షల నిధి అవసరం. అదనంగా, కవర్ చేసుకునే విధంగా మంచి ఆరోగ్య బీమా పాలసీ తీసుకోవాలి.
బడ్జెట్ లేకుండా ఖర్చులు చేయడం
బడ్జెట్ లేకపోవడం వల్ల డబ్బు ఎలా ఖర్చవుతోందో తెలియదు. ఇది ఆర్థిక క్రమశిక్షణ లోపానికి దారితీస్తుంది.
పరిష్కారం: ప్రతి నెల బడ్జెట్ తయారుచేసుకొని, ఖర్చులను వర్గీకరించండి. అద్దె, బిల్లులు, ఆహారం, వినోదం మొదలైనవి. 50-30-20 నియమం అనుసరించండి:
- 50% – అవసరాలు
- 30% – కోరికలు
- 20% – పొదుపులు/పెట్టుబడులు
ఆర్థిక క్రమశిక్షణే విజయ రహస్యం
ఈ ఐదు తప్పులను నివారించడం ద్వారా మీరు ఆర్థిక భద్రత వైపు ఒక మెట్టు ఎక్కినట్లే. ఆటోమేటెడ్ సేవింగ్స్, SIP పెట్టుబడులు, బీమా, బడ్జెట్ వంటి చిన్న అలవాట్లు దీర్ఘకాలంలో పెద్ద ప్రయోజనం ఇస్తాయి. మీరు ఆర్థికంగా కొత్తవారైనా సరే, ఒక నమ్మదగిన ఆర్థిక సలహాదారుని సంప్రదించడం మంచిదే.