Holidays-Bank: భారతీయ రిజర్వ్ బ్యాంక్‌ (ఆర్‌బీఐ) నియమాల ప్రకారం దేశవ్యాప్తంగా బ్యాంకులకు వివిధ పండుగలు, జాతీయ సందర్భాలు, స్థానిక వేడుకల సందర్భంగా సెలవులు ప్రకటిస్తారు. ఈ నియమాల ప్రకారం వచ్చే కొన్ని రోజులలో వరుసగా మూడు రోజుల పాటు బ్యాంకింగ్ సేవలు నిలిచిపోనున్నాయి. ఇప్పటికే షెడ్యూల్‌ ప్రకారం, సెప్టెంబర్ 5వ తేదీ గురువారం నుండి 7వ తేదీ ఆదివారం వరకు ప్రజలు బ్రాంచ్‌ స్థాయి బ్యాంకింగ్ పనుల్లో కొంత అసౌకర్యం ఎదుర్కొనే అవకాశం ఉంది.
చాలా రాష్ట్రాల్లో బ్యాంకు శాఖలు..
మొదటగా, సెప్టెంబర్ 5వ తేదీ ఈద్ ఏ మిలాద్ సందర్భంగా దేశంలోని చాలా రాష్ట్రాల్లో బ్యాంకు శాఖలు మూసివేయబోతున్నాయి. అదే సమయంలో, కేరళలో కూడా సెప్టెంబర్ 5న మరో ముఖ్యమైన పండుగ అయిన ఓనం వేడుకలు జరగనున్నాయి. ఆ రాష్ట్రంలో కూడా బ్యాంకులకు సెలవు ప్రకటించారు. దీంతో దక్షిణ భారతదేశంలోని పలు రాష్ట్రాల్లో ఒకే రోజున బ్యాంకు సేవలు అందుబాటులో ఉండవు.
బ్యాంకు శాఖలకు సెలవు…
సెప్టెంబర్ 6వ తేదీ శుక్రవారం గణేష్ నిమజ్జనం వేడుకలు నిర్వహించనున్నారు. ఇది ముఖ్యంగా తెలంగాణ, ఆంధ్రప్రదేశ్ రాష్ట్రాల్లో అత్యంత భక్తిశ్రద్ధలతో జరుపుకునే వేడుక. ఈ సందర్భంలో కూడా బ్యాంకు శాఖలకు సెలవు ప్రకటించారు. ఇప్పటికే ప్రభుత్వ కార్యాలయాలు, విద్యాసంస్థలు ఆ రోజున మూసివేయాలని నిర్ణయం తీసుకున్నారు. దీనికి అనుగుణంగా బ్యాంకింగ్ కార్యకలాపాలు కూడా ఆగిపోతాయి.
రొటీన్ వారాంతపు సెలవు..
తర్వాతి రోజు అంటే సెప్టెంబర్ 7 ఆదివారం కాబట్టి, దేశవ్యాప్తంగా పబ్లిక్ సెక్టార్, ప్రైవేట్ సెక్టార్ అన్నీ కలిపి అన్ని బ్యాంకులు రొటీన్ వారాంతపు సెలవు పాటిస్తాయి. ఫలితంగా 5వ తేదీ నుండి 7వ తేదీ వరకు వరుసగా మూడు రోజులపాటు బ్యాంకులు మూతపడనున్నాయి.
నగదు లావాదేవీలు, చెక్కు క్లియరెన్స్…
ఈ మూడు రోజుల విరామం కారణంగా కస్టమర్లకు బ్యాంకింగ్ కార్యకలాపాల్లో అసౌకర్యం కలగవచ్చు. ముఖ్యంగా పెద్ద మొత్తంలో నగదు లావాదేవీలు, చెక్కు క్లియరెన్స్ అవసరమైన వారు ఇబ్బంది పడే అవకాశం ఉంది. అందువల్ల అవసరమైన పనులు ముందుగానే పూర్తిచేసుకోవాలని నిపుణులు సూచిస్తున్నారు. ఈరోజు అంటే సెప్టెంబర్ 4వ తేదీనే పనులను పూర్తి చేసుకోవడం వల్ల రాబోయే మూడు రోజుల్లో సమస్యలు తలెత్తవు.
అయితే బ్యాంకు బ్రాంచ్‌లు మూసివేసినా, డిజిటల్‌ సేవలు మాత్రం యథావిధిగా కొనసాగుతాయి. కస్టమర్లు ఇంటర్నెట్‌ బ్యాంకింగ్, మొబైల్‌ బ్యాంకింగ్ సదుపాయాలు ఉపయోగించుకోవచ్చు. యూనిఫైడ్‌ పేమెంట్స్ ఇంటర్‌ఫేస్‌ (UPI), నేషనల్ ఎలక్ట్రానిక్ ఫండ్స్ ట్రాన్స్‌ఫర్‌ (NEFT), రియల్ టైమ్ గ్రాస్ సెటిల్‌మెంట్‌ (RTGS) సేవలు అంతరాయం లేకుండా అందుబాటులో ఉంటాయి. అలాగే దేశవ్యాప్తంగా ఏటీఎంలు కూడా కస్టమర్ల కోసం 24 గంటలపాటు పనిచేస్తాయి. కాబట్టి చిన్న లావాదేవీలు, బిల్లుల చెల్లింపులు, డిజిటల్‌ కొనుగోళ్లు సాధారణంగా కొనసాగుతాయి.
