Silver Price and Quality: వెండి ధరకు రెక్కలొచ్చాయి! బంగారం బాటలోనే వెండి కూడా సామాన్యులకు అందనంత ఎత్తుకు చేరుకుంటోంది. పెట్టుబడిగా చూసినా, ఆభరణంగా చూసినా ఇప్పుడు వెండికి విపరీతమైన డిమాండ్ పెరిగింది. అయితే, ధరతో పాటు నాణ్యత విషయంలోనూ అంతే జాగ్రత్తగా ఉండాల్సిన సమయం ఆసన్నమైంది. అందుకే, వెండి కొనుగోలులో వినియోగదారులు మోసపోకుండా ఉండేందుకు కేంద్ర ప్రభుత్వం కీలక నిర్ణయం తీసుకోబోతోంది.

వెండికి కూడా హాల్‌మార్కింగ్ తప్పనిసరి!
ప్రస్తుతం మన దేశంలో బంగారానికి హాల్‌మార్కింగ్ తప్పనిసరి అనే విషయం తెలిసిందే. త్వరలో వెండి వస్తువులపై కూడా హాల్‌మార్కింగ్ (Hallmarking) తప్పనిసరి చేసే దిశగా అడుగులు పడుతున్నాయి. ఈ విషయాన్ని భారతీయ ప్రమాణాల మండలి (BIS) డైరెక్టర్ జనరల్ సంజయ్ గార్గ్ వెల్లడించారు.

Also Read: Cigarette : – Telugu Prabha Telugu Daily పొగబాబులకు మరో షాక్

ఈ నిర్ణయం వెనుక ముఖ్య ఉద్దేశాలు ఇవే:
మార్కెట్‌లో వెండి స్వచ్ఛత విషయంలో తరచూ ఫిర్యాదులు అందుతున్నాయి. హాల్‌మార్కింగ్ వల్ల కొనుగోలుదారులు తాము చెల్లించే ధరకు తగిన స్వచ్ఛత కలిగిన వెండిని పొందుతున్నారా లేదా అని సులభంగా తెలుసుకోవచ్చు. ప్రస్తుతం స్వచ్ఛందంగా అమలవుతున్న హాల్‌మార్కింగ్‌లో వెండి వస్తువులపై HUID (Hallmark Unique Identification) నంబర్ ఉంటుంది. దీని ద్వారా ఆ వస్తువు నాణ్యతను ఆన్‌లైన్‌లో సరిచూసుకోవచ్చు. 2024లో హాల్‌మార్క్ ఉన్న వెండి వస్తువుల సంఖ్య 31 లక్షలుగా ఉండగా, 2025 నాటికి అది ఏకంగా 51 లక్షలకు చేరింది. ప్రజల్లో పెరుగుతున్న అవగాహనే దీనికి నిదర్శనం.

కొన్ని సవాళ్లు.. మరిన్ని రకాలు
వెండి ఆభరణాల తయారీలో చిన్నపాటి పట్టీల నుంచి భారీ విగ్రహాల వరకు రకరకాలుగా ఉంటాయి. చాలా చిన్న వస్తువులపై కూడా హాల్‌మార్కింగ్ వేయడం అనేది అధికారులకు కొంత సాంకేతిక సవాలుగా మారింది. అయితే, పరిశ్రమ వర్గాల డిమాండ్ మేరకు దీనిని త్వరలోనే అమలు చేయాలని BIS భావిస్తోంది. వెండి స్వచ్ఛతను సూచించే కొన్ని కీలక గ్రేడ్లు ఉన్నాయి. వాటిల్లో 800, 835, 925 (స్టెర్లింగ్ సిల్వర్), 958, 970, 990, 999 అందుబాటులో ఉన్నాయి.

ఈ నిబంధన అమల్లోకి వస్తే, వెండి కొనుగోలు చేసే ప్రతి ఒక్కరికీ పూర్తి భద్రత లభిస్తుంది. ఇకపై వెండి మెరుపు మాత్రమే కాదు, దాని వెనుక ఉన్న ‘ముద్ర’ కూడా ముఖ్యం!