China removes gold VAT: చైనాలో బంగారం వ్యాపార రంగానికి పెద్ద దెబ్బతీసే విధంగా ఒక కీలక నిర్ణయం తీసుకుంది ప్రభుత్వం. ఇప్పటివరకు షాంఘై గోల్డ్‌ ఎక్స్ఛేంజ్‌ ద్వారా బంగారం కొనుగోలు చేసిన వ్యాపారులు, ఆ బంగారాన్ని తిరిగి విక్రయించే సమయంలో విలువ ఆధారిత పన్ను (వ్యాట్‌) నుంచి మినహాయింపు పొందుతున్నారు. అయితే నవంబర్‌ 1 నుంచి ఆ సదుపాయాన్ని అధికారికంగా రద్దు చేసినట్లు చైనా ఆర్థిక మంత్రిత్వ శాఖ ప్రకటించింది.
వ్యాట్‌ పన్నును…
ఈ నిర్ణయం ప్రకారం, షాంఘై గోల్డ్‌ ఎక్స్ఛేంజ్‌ నుంచి బంగారం కొనుగోలు చేసిన వ్యాపారి ఆ బంగారాన్ని అదే రూపంలో అమ్మినా లేదా ప్రాసెస్‌ చేసి విక్రయించినా, ఇకపై వ్యాట్‌ పన్నును సర్దుబాటు చేసుకునే అవకాశం ఉండదని స్పష్టం చేశారు. అంటే, బంగారం విక్రయంలో ముందుగా చెల్లించిన పన్నును తిరిగి తగ్గించుకోవడం లేదా మినహాయింపుగా చూపడం ఇక సాధ్యం కాదు.
వ్యక్తిగత ఆభరణాలుగా…
చైనాలో బంగారం మార్కెట్‌ చాలా పెద్దదిగా ఉంది. ఆ దేశంలో బంగారాన్ని వ్యక్తిగత ఆభరణాలుగా మాత్రమే కాకుండా పెట్టుబడి సాధనంగా కూడా ఉపయోగిస్తారు. ఇటీవల కాలంలో గ్లోబల్‌ స్థాయిలో బంగారం ధరలు పెరగడంతో చైనా మార్కెట్‌లో కూడా కొనుగోళ్లు పెరిగాయి. రిటైల్‌ స్థాయిలో చాలా మంది వినియోగదారులు భవిష్యత్తు భద్రత కోసం బంగారంలో పెట్టుబడులు పెడుతున్నారు.
ఇప్పటి వరకు వ్యాట్‌ మినహాయింపు ఉండటం వల్ల, వ్యాపారులు కూడా బంగారాన్ని సులభంగా కొనుగోలు చేసి తిరిగి విక్రయించగలిగారు. ఇది మార్కెట్‌లో స్పీడు పెంచింది. కానీ ఇప్పుడు ఆ మినహాయింపు రద్దు కావడంతో, బంగారం కొనుగోలు చేయాలనుకునే వారి ఖర్చు పెరిగే అవకాశం ఉంది. నిపుణుల అంచనా ప్రకారం, దీని ప్రభావం రిటైల్‌ స్థాయిలో ఎక్కువగా కనిపించవచ్చు.
బంగారం ధరలు ఇప్పటికే గత నెలల్లో గణనీయంగా పెరిగాయి. ఈ పరిస్థితిలో పన్ను మినహాయింపును తొలగించడం వల్ల కొనుగోలు దారులు మరింత జాగ్రత్తగా వ్యవహరించే అవకాశం ఉంది. ముఖ్యంగా చిన్న వ్యాపారులు, ఆభరణాల తయారీదారులు, రిటైల్‌ విక్రేతలు ఈ మార్పుతో ఎక్కువ ఒత్తిడిని ఎదుర్కొనే అవకాశం ఉందని ఆర్థిక విశ్లేషకులు చెబుతున్నారు.
పన్ను వ్యవస్థను సమతుల్యం..
చైనా ప్రభుత్వం ఈ నిర్ణయం వెనుక ఉద్దేశం పన్ను వ్యవస్థను సమతుల్యం చేయడం అని పేర్కొంటుంది. దేశంలోని బంగారం మార్కెట్‌ పరిమాణం పెద్దదిగా ఉన్నందున, వ్యాట్‌ మినహాయింపు వల్ల ప్రభుత్వానికి పెద్ద మొత్తంలో పన్ను ఆదాయం కోల్పోతున్నట్లు అధికార వర్గాలు భావిస్తున్నాయి. అందుకే ఈ మినహాయింపును రద్దు చేసి, ఆదాయాన్ని పెంచే ప్రయత్నంలో ఉన్నట్లు తెలుస్తోంది.
అతిపెద్ద బంగారం వినియోగదారులలో..
దీంతో బంగారం వ్యాపార రంగంలో కొత్త సవాళ్లు ఎదురుకానున్నాయి. అంతర్జాతీయ స్థాయిలో కూడా ఈ నిర్ణయం ప్రభావం చూపే అవకాశం ఉంది, ఎందుకంటే చైనా ప్రపంచంలో అతిపెద్ద బంగారం వినియోగదారులలో ఒకటి. బంగారం కొనుగోళ్లు తగ్గితే, గ్లోబల్‌ మార్కెట్‌లో ధరలు స్థిరపడే అవకాశం ఉందని కొందరు ఆర్థిక నిపుణులు అంచనా వేస్తున్నారు.
చైనా రిటైల్‌ మార్కెట్‌లో ఇప్పటివరకు బంగారం కొనుగోలు చేయడం చాలా సులభం. ప్రజలు ఎక్స్ఛేంజ్‌ల ద్వారా లేదా అధికారిక విక్రేతల ద్వారా బంగారం తీసుకోవచ్చు. కానీ వ్యాట్‌ సడలింపు రద్దు కావడంతో, రిటైలర్లు తమ లాభాలను కాపాడుకునేందుకు అదనపు ధరను వినియోగదారులపై మోపే అవకాశం ఉంది.
ముడి బంగారం కొనుగోళ్లను..
దీంతో వినియోగదారులు ఆభరణాల కొనుగోళ్లను తాత్కాలికంగా వాయిదా వేసే అవకాశం ఉంది. ఇది చైనా బంగారం ఉత్పత్తి రంగానికి కూడా ప్రభావం చూపవచ్చు, ఎందుకంటే ఆభరణాల తయారీదారులు కూడా ముడి బంగారం కొనుగోళ్లను తగ్గించవచ్చు.
నిపుణులు చెబుతున్న ప్రకారం, చైనా బంగారం డిమాండ్‌ గత రెండు సంవత్సరాల్లో గణనీయంగా పెరిగింది. గ్లోబల్‌ ఆర్థిక అనిశ్చితి, ద్రవ్యోల్బణం మరియు కరెన్సీ విలువల మార్పులతో ప్రజలు బంగారాన్ని భద్ర పెట్టుబడిగా భావిస్తున్నారు. కానీ పన్ను రాయితీ లేకపోవడంతో ఇప్పుడు ఆ ధోరణి కొంత మారే అవకాశం ఉందని వారు పేర్కొంటున్నారు.
మరోవైపు, ప్రభుత్వం పన్ను సేకరణను పెంచడం ద్వారా బడ్జెట్‌ సమతుల్యాన్ని సాధించాలనుకుంటోంది. బంగారం లాంటి అధిక విలువ గల వస్తువులపై పన్ను రద్దు కొనసాగించడం వల్ల ప్రభుత్వానికి నష్టమే అవుతుందని వారు భావిస్తున్నారు. ఈ నేపథ్యంలో వ్యాట్‌ మినహాయింపును రద్దు చేయడం ఆర్థిక పరంగా సముచిత చర్యగా ప్రభుత్వ అధికారులు పేర్కొంటున్నారు.
