Egg Price Hike: కోడిగుడ్డు తక్కువ ఖర్చుతో ప్రొటీన్ అందించే ముఖ్యమైన ఆహారం. అయితే ఇటీవల పెరిగిన ధరలు వినియోగదారులపై ప్రభావం చూపుతున్నాయి. గుడ్ల కొనుగోళ్లు తగ్గినట్టు కొన్ని సర్వేల్లో వెల్లడైంది. ధరలు మరింత పెరిగే అవకాశం ఉండటంతో రాబోయే రోజుల్లో వినియోగదారులపై భారం పెరగవచ్చనే అంచనాలు ఉన్నాయి.

లోకల్‌సర్కిల్స్ దేశంలోని 287 జిల్లాల్లో 67,000 మందికి పైగా వినియోగదారుల నుంచి సేకరించిన సమాచారాన్ని పరిశీలించింది. ఈ వివరాల ప్రకారం గత ఆరు నెలల్లో గుడ్ల ధరలు 10 శాతం నుంచి 50 శాతానికి పైగా పెరిగాయి. దీంతో సుమారు 48 శాతం కుటుంబాలు గుడ్ల కొనుగోళ్లను తగ్గించుకున్నాయి. ఫామ్ స్థాయిలో గతంలో ఒక గుడ్డు రూ.4.94 ఉండగా, ప్రస్తుతం రూ.7కి చేరింది. రిటైల్ మార్కెట్లో ధర రూ.8.50 నుంచి రూ.9 వరకు ఉంది.

గుడ్ల ఉత్పత్తిలో కోళ్ల దాణా ఖర్చు 65 నుంచి 70 శాతం వరకు ఉంటుందని వ్యాపారులు చెబుతున్నారు. దాణాలో ఉపయోగించే మొక్కజొన్నకు ఇథనాల్ పరిశ్రమల నుంచి డిమాండ్ పెరగడంతో దాని ధర కూడా పెరిగింది. మరోవైపు కోస్తా ఆంధ్రలో తీవ్ర ఎండల కారణంగా 16 లక్షలకు పైగా కోళ్లు చనిపోవడం గుడ్ల ఉత్పత్తిపై ప్రభావం చూపింది.

పెరిగిన ధరలు పాఠశాలలు, అంగన్‌వాడీల పోషకాహార కార్యక్రమాలపై కూడా ప్రభావం చూపుతున్నాయి. ఒడిశాలో ఒక్కో గుడ్డుకు ప్రభుత్వం రూ.7 ధర నిర్ణయించినప్పటికీ, మార్కెట్లో కేంద్రాలు రూ.9 నుంచి రూ.10 వరకు చెల్లించాల్సి వస్తోంది. నాణ్యత, కల్తీపై భయాలు కూడా వినియోగాన్ని తగ్గించడానికి కారణమయ్యాయి.

ఇక వర్షాకాలం ముగిసి చలికాలం ప్రారంభం కానుంది. ఈ సమయంలో సాధారణంగా గుడ్లకు డిమాండ్ పెరుగుతుంది. అందువల్ల రాబోయే రోజుల్లో ధరలు మరింత పెరిగే అవకాశం ఉందని నిపుణులు అంచనా వేస్తున్నారు.

Also Read:Konda Surekha: అమ్మని ఇంతలా అవమానిస్తారనుకోలేదు-కొండా సుస్మిత కన్నీళ్లు