Charging Infrastructure: భారతదేశంలో ఎలక్ట్రిక్ వాహనాల (EV) భవిష్యత్తును తీర్చిదిద్దేందుకు కేంద్ర ప్రభుత్వం అతిపెద్ద ముందడుగు వేసింది. దేశవ్యాప్తంగా 72,300 పబ్లిక్ ఈవీ ఛార్జింగ్ స్టేషన్లను ఏర్పాటు చేసేందుకు పీఎం ఈ-డ్రైవ్ పథకం కింద మార్గదర్శకాలను జారీ చేసింది. ఈ భారీ లక్ష్యం కోసం తక్షణమే రూ. 2,000 కోట్లను ఖర్చు చేయనుంది.

సబ్సిడీల సునామీ
ఈ పథకంలో ప్రభుత్వం అనేక చోట్ల భారీగా సబ్సిడీలను ప్రకటించింది. ప్రభుత్వ కార్యాలయాలు, ఆసుపత్రులు, రెసిడెన్షియల్ కాంప్లెక్సులు, విద్యా సంస్థలు వంటి ప్రదేశాలలో ఉచిత ఛార్జర్లను అందిస్తే, 100 శాతం సబ్సిడీ ఇవ్వనుంది.

ముఖ్యమైన నగరాలు, హైవేల వెంట ఉన్న ప్రభుత్వ స్థలాలైన రైల్వే స్టేషన్లు, విమానాశ్రయాలు, బస్ డిపోలు, మెట్రో స్టేషన్లు వంటి వాటిలో సెటప్ ఖర్చులో 80 శాతం మరియు పరికరాల ఖర్చులో 70 శాతం సబ్సిడీని ప్రభుత్వం భరిస్తుంది. ఈ నిర్ణయం దేశవ్యాప్తంగా ఈవీ మౌలిక సదుపాయాలను వేగంగా పెంచేందుకు దోహదపడుతుంది.

అమలు, ప్రాధాన్యతలు
ప్రాజెక్ట్ అమలు ఏజెన్సీ (PIA)గా ప్రభుత్వ రంగ సంస్థ భారత్ హెవీ ఎలక్ట్రికల్స్ లిమిటెడ్ (BHEL) పనిచేయనుంది. పది లక్షల కంటే ఎక్కువ జనాభా కలిగిన పట్టణాలు, స్మార్ట్ సిటీలు, రాష్ట్ర రాజధానులు, మరియు జనసాంద్రత కలిగిన జాతీయ, రాష్ట్ర హైవేలకు ఈ ఛార్జింగ్ స్టేషన్ల ఏర్పాటులో అధిక ప్రాధాన్యత ఇవ్వబడుతుంది.

ఈ రూ. 10,900 కోట్ల కేటాయింపులో భాగమైన ఈ పథకం, సబ్సిడీలను రెండు దశల్లో విడుదల చేస్తుంది. నిబంధనలను పూర్తి చేసిన తర్వాతే నిధులు అందిస్తుంది. తద్వారా ఈవీ ఛార్జింగ్ నెట్‌వర్క్ వేగంగా, సమర్థవంతంగా విస్తరించడానికి కేంద్రం గట్టి చర్యలు తీసుకుందని స్పష్టమవుతోంది. ఇది దేశంలో ఈవీల వాడకాన్ని ప్రోత్సహించడంలో గేమ్-ఛేంజర్‌గా మారనుంది.