Tariffs :రష్యా నుంచి ముడి చమురు కొనుగోళ్ల విషయంలో ట్రంప్ పరిపాలన భారతదేశంపై అధిక సుంకాలు విధించడాన్ని ప్రముఖ ఇంధన నిపుణుడు డాక్టర్ అనస్ అల్ హజ్జీ బలంగా ప్రశ్నించారు. భారత్‌పై ఆరోపణలు చేస్తూ సుంకాలు విధించడం వెనుక ఉన్న అమెరికా విధానంలో అసమానతలు ఉన్నాయని ఆయన సంచలన వ్యాఖ్యలు చేశారు.
ట్రంప్ పరిపాలన భారతీయ వస్తువులపై 50% సుంకాలను ప్రకటించింది, ఇందులో 25% సుంకం కేవలం న్యూఢిల్లీ మాస్కో నుండి ముడి చమురు కొనుగోలు చేయడాన్ని లక్ష్యంగా చేసుకుంది. ఉక్రెయిన్‌లో పుతిన్ యుద్ధానికి భారత్ నిధులు సమకూరుస్తోందనే వైట్ హౌస్ ఆరోపణలను డాక్టర్ అల్ హజ్జీ పూర్తిగా తోసిపుచ్చారు.
భారత్‌పైనే ఎందుకు నింద? టర్కీ, చైనాకు మినహాయింపు దేనికి?
అల్ హజ్జీ ఈ విధానాన్ని విమర్శిస్తూ, భారత్ కంటే రష్యా నుంచి భారీగా చమురు దిగుమతి చేసుకుంటున్న ఇతర దేశాలను ఉదహరించారు.
టర్కీ: రష్యా నుంచి భారీగా సహజ వాయువు, పెట్రోలియం ఉత్పత్తులను దిగుమతి చేసుకుంటుంది. అంతేకాక, టర్కీ భారతదేశం కంటే ఎక్కువ పెట్రోలియం ఉత్పత్తులను రష్యా చమురు నుండి యూరప్‌కు ఎగుమతి చేస్తుంది. అయినా టర్కీపై ఎవరూ యుద్ధానికి మద్దతు ఇస్తున్నారని ఆరోపించడం లేదు.
చైనా: రష్యా నుంచి పెద్ద మొత్తంలో చమురు, సహజ వాయువు దిగుమతి చేసుకుంటున్నప్పటికీ, చైనాపై కూడా ఎటువంటి ఆరోపణలు లేవు.
యూరోపియన్ యూనియన్ (EU): గత నెలలో, EU సహజ వాయువు దిగుమతుల్లో 12% రష్యా నుంచే వచ్చాయి. స్వయంగా అమెరికా కూడా ఏడాది పొడవునా రష్యా నుంచి దిగుమతులు పెంచుకుంది. అయినా వీరిపై ఎటువంటి ఆరోపణలు లేవు.
రష్యన్ చమురు దిగుమతి గురించి ఈ సుంకం విధించడం నిజంగా నమ్మడం కష్టం. కథలో ఇంకా చాలా ఉందని నేను భావిస్తున్నాను. భారతదేశం ప్రపంచంలోనే అతిపెద్ద మార్కెట్, ప్రతి ఒక్కరూ ఆ మార్కెట్‌లోకి ప్రవేశించాలని కోరుకుంటున్నారు. అసలు కారణం అదేనా? రష్యన్ చమురు దిగుమతుల కంటే ఇది మెరుగైన వివరణ అని అల్ హజ్జీ అభిప్రాయపడ్డారు. యుద్ధరంగంలో ఉక్రెయిన్ వ్యూహాలపై అమెరికా ఎన్నికల లెక్కలు ప్రభావం చూపాయని అల్ హజ్జీ విశ్లేషించారు.
డ్రోన్ దాడులపై బైడెన్ హెచ్చరిక: 2024 ప్రారంభంలో ఉక్రెయిన్ రష్యన్ శుద్ధి కర్మాగారాలపై డ్రోన్‌లను ఉపయోగించడం మొదలుపెట్టింది. కానీ, ముడి చమురు ఎగుమతి సౌకర్యాలను తాకవద్దని బిడెన్ పరిపాలన హెచ్చరించింది. తిరిగి ఎన్నికలకు ముందు చమురు ధరలు పెరగకూడదనేది దీని వెనుక కారణమని ఆయన పేర్కొన్నారు.
ట్రంప్ గ్రీన్ సిగ్నల్: ఇప్పుడు మనం తక్కువ డిమాండ్, తక్కువ ధరలు ఉండే నాల్గవ త్రైమాసికంలోకి వస్తున్నాము. అకస్మాత్తుగా, ఉక్రెయిన్ ముడి చమురు ఎగుమతి సౌకర్యాలను తాకడం మొదలుపెట్టింది. తక్కువ ధరల కారణంగా ట్రంప్ పరిపాలన నుండి గ్రీన్ సిగ్నల్‌తోనే వారు దీనిని చేశారని స్పష్టమవుతోందని అల్ హజ్జీ అన్నారు.
‘ఆదాయాలు తగ్గితే యుద్ధం ఆగదు’ అనే వాదన తప్పు
రష్యా చమురు ఆదాయాలు తగ్గిపోతే యుద్ధం ముగుస్తుందనే ఆలోచనను కూడా ఈ ఇంధన నిపుణుడు కొట్టిపారేశారు. “ఆదాయాలు తగ్గితే, యుద్ధం ముగిసిపోతుందనే ఆలోచన సాధారణంగా తప్పు. రష్యాలో నాయకులను ఓటు వేసి ఓడించే ప్రజాస్వామ్య దేశం గురించి మనం మాట్లాడటం లేదు. గతంలో సోవియట్ యూనియన్ తర్వాత కూడా మార్కెట్ పతనం ఫలితంగా ఆదాయంలో అనేక క్షీణతలను చూశాం, కానీ ఏమీ జరగలేదు” అని ఆయన స్పష్టం చేశారు.
ఈ వ్యాఖ్యలతో, భారతీయ మార్కెట్‌పై దృష్టి సారించడం, అంతర్జాతీయ ఇంధన రాజకీయాలే అమెరికా విధానంలో అసమానతలకు కారణమనే వాదన తెరపైకి వచ్చింది.
