Gas cylinder subsidy: ఇళ్లలో వంట అవసరాల కోసం గ్యాస్ సిలిండర్ ఉపయోగిస్తున్న వినియోగదారులకు కేంద్ర ప్రభుత్వం కీలక సమాచారాన్ని విడుదల చేసింది. దేశవ్యాప్తంగా ఎల్పీజీ కనెక్షన్ కలిగిన ప్రతి ఒక్కరూ ఈకేవైసీ ప్రక్రియను తప్పనిసరిగా పూర్తి చేయాలని కేంద్ర పెట్రోలియం శాఖ స్పష్టం చేసింది. ఈ నిబంధనను నిర్లక్ష్యం చేస్తే గ్యాస్ సిలిండర్పై ప్రభుత్వం అందిస్తున్న సబ్సిడీ నిలిచిపోయే అవకాశం ఉందని హెచ్చరించింది. అంతేకాదు, భవిష్యత్తులో సిలిండర్ బుకింగ్ చేయడంలో కూడా ఇబ్బందులు ఎదురయ్యే పరిస్థితి ఏర్పడవచ్చని తెలిపింది.
ప్రభుత్వ సబ్సిడీపై..
ప్రస్తుతం దేశంలో కోట్లాది మంది గ్యాస్ సిలిండర్ వినియోగదారులు ప్రభుత్వ సబ్సిడీపై ఆధారపడుతున్నారు. ముఖ్యంగా మధ్యతరగతి, పేద కుటుంబాలకు ఈ రాయితీ ఎంతో ఉపయోగకరంగా ఉంది. అయితే కొందరు అర్హత లేకపోయినా సబ్సిడీ పొందడం, ఒకే వ్యక్తి పేరుతో వేర్వేరు చిరునామాల్లో కనెక్షన్లు ఉండటం, ఒకే కుటుంబంలో ఒకరికి మించిన వారు సబ్సిడీ పొందడం వంటి అంశాలు వెలుగులోకి వచ్చాయి. ఈ పరిస్థితులకు అడ్డుకట్ట వేయాలనే ఉద్దేశంతో కేంద్ర ప్రభుత్వం ఈకేవైసీని తప్పనిసరి చేసింది.
నిజమైన లబ్ధిదారుల..
ఈకేవైసీ ప్రక్రియ ద్వారా నిజమైన లబ్ధిదారుల వివరాలను ధృవీకరించడం ప్రధాన లక్ష్యంగా పెట్టుకుంది. ఆధార్తో గ్యాస్ కనెక్షన్ వివరాలను అనుసంధానం చేయడం ద్వారా నకిలీ ఖాతాలను గుర్తించి తొలగించవచ్చని ప్రభుత్వం భావిస్తోంది. ఈకేవైసీ పూర్తిచేసిన వినియోగదారులకే భవిష్యత్తులో సబ్సిడీ డబ్బులు నేరుగా వారి బ్యాంకు ఖాతాల్లో జమ అవుతాయని స్పష్టం చేసింది. అవసరమైన ప్రక్రియ పూర్తి చేయని వారి ఖాతాల్లో సబ్సిడీ నిలిపివేయబడుతుందని కూడా హెచ్చరించింది.
సబ్సిడీ పొందేవారికే..
ప్రభుత్వం ఈ నిబంధనను కేవలం సబ్సిడీ పొందేవారికే పరిమితం చేయలేదు. సబ్సిడీ తీసుకోని సాధారణ వినియోగదారులు కూడా ఈకేవైసీ చేయించుకోవాలని సూచించింది. దీని వల్ల గ్యాస్ కనెక్షన్ వివరాలు సక్రమంగా నమోదవుతాయని, భవిష్యత్తులో ఎలాంటి సాంకేతిక సమస్యలు తలెత్తకుండా ఉంటాయని అధికారులు చెబుతున్నారు.
ప్రధానమంత్రి ఉజ్వల్ యోజన
కేంద్ర ప్రభుత్వం అమలు చేస్తున్న ప్రధానమంత్రి ఉజ్వల్ యోజన కింద బీపీఎల్ కుటుంబాలకు ఉచితంగా గ్యాస్ కనెక్షన్లు అందిస్తోంది. ఈ పథకం ద్వారా లక్షలాది కుటుంబాలు ఇప్పటికీ లబ్ధి పొందుతున్నాయి. ఈ పథకం కింద కనెక్షన్ తీసుకున్న వారు కూడా తప్పనిసరిగా ఈకేవైసీ పూర్తి చేయాల్సిందేనని స్పష్టం చేసింది. లేదంటే సబ్సిడీ రూపంలో వచ్చే ఆర్థిక సహాయం నిలిచిపోయే ప్రమాదం ఉందని తెలిపింది.
ఇక కొన్ని రాష్ట్రాల్లో రాష్ట్ర ప్రభుత్వాలు అదనపు రాయితీలు కూడా అందిస్తున్నాయి. ఉదాహరణకు తెలంగాణలో అర్హులైన వినియోగదారులకు రూ.500కే గ్యాస్ సిలిండర్ అందించే పథకం అమల్లో ఉంది. అయితే ఈ రాయితీలు కొనసాగాలంటే కేంద్ర ప్రభుత్వం నిర్దేశించిన ఈకేవైసీ నిబంధనలను తప్పనిసరిగా పాటించాల్సి ఉంటుంది. ఈ ప్రక్రియ పూర్తికాకపోతే రాష్ట్ర రాయితీలపై కూడా ప్రభావం పడే అవకాశముందని అధికారులు సూచిస్తున్నారు.
డెలివరీ సిబ్బంది ద్వారా కూడా..
ఈకేవైసీ ప్రక్రియను వినియోగదారులకు సులభంగా అందుబాటులో ఉంచేందుకు ప్రభుత్వం పలు మార్గాలను అందుబాటులోకి తీసుకొచ్చింది. గ్యాస్ సిలిండర్ డెలివరీకి వచ్చే డెలివరీ సిబ్బంది ద్వారా కూడా ఈకేవైసీ చేయించుకునే అవకాశం ఉంది. డెలివరీ సిబ్బంది వద్ద బయోమెట్రిక్ పరికరం ఉంటుంది. అందులో వినియోగదారు తన వేలిముద్ర ఇచ్చి ఆధార్ ధృవీకరణ పూర్తిచేయవచ్చు. ఈ విధానం ద్వారా ఇంటి వద్దనే ఈకేవైసీ పూర్తయ్యే సౌకర్యం కల్పించారు.
అలాగే వినియోగదారులు తమ గ్యాస్ ఏజెన్సీ కార్యాలయానికి వెళ్లి కూడా ఈకేవైసీ చేయించుకోవచ్చు. ఇందుకోసం ఆధార్ కార్డు, గ్యాస్ పాస్బుక్ లేదా కనెక్షన్ వివరాలు, ఆధార్తో లింక్ అయిన మొబైల్ ఫోన్ తీసుకెళ్లాల్సి ఉంటుంది. మొబైల్కు వచ్చే ఓటీపీ ద్వారా వివరాలు ధృవీకరించబడతాయి. బయోమెట్రిక్ వివరాలు సిస్టమ్లో నమోదు చేసిన తర్వాత ఈకేవైసీ ప్రక్రియ పూర్తవుతుంది.
డిజిటల్ సేవలకు..
ఇంటికి వెళ్లే అవకాశం లేని వారు లేదా డిజిటల్ సేవలకు అలవాటు ఉన్నవారు ఆన్లైన్ విధానాన్ని కూడా ఉపయోగించుకోవచ్చు. తమ గ్యాస్ డిస్ట్రిబ్యూటర్కు సంబంధించిన అధికారిక వెబ్సైట్ లేదా మొబైల్ యాప్లో లాగిన్ అయి ఆధార్ నంబర్, మొబైల్ ఓటీపీ ద్వారా ఈకేవైసీ పూర్తి చేయవచ్చు. ఈ విధానం ద్వారా ఏజెన్సీకి వెళ్లాల్సిన అవసరం లేకుండా ఇంటి నుంచే ప్రక్రియ పూర్తిచేసుకునే వీలుంది.
Also Read: https://teluguprabha.net/business/gst-shock-for-zomato-rs-3-69-crore-tax-demand-notice-issued/
ఈకేవైసీ ప్రక్రియ వల్ల గ్యాస్ వినియోగదారులకు దీర్ఘకాలంలో ప్రయోజనం ఉంటుందని ప్రభుత్వం చెబుతోంది. సబ్సిడీ డబ్బులు సకాలంలో ఖాతాలో జమ కావడం, నకిలీ కనెక్షన్లు తొలగిపోవడం, సరైన వినియోగదారులకే ప్రభుత్వ సహాయం అందడం వంటి ప్రయోజనాలు కలుగుతాయని పేర్కొంది. అంతేకాదు, గ్యాస్ సరఫరా వ్యవస్థ మరింత పారదర్శకంగా మారుతుందని అధికారులు భావిస్తున్నారు.