Gold Rate lower in Recent Days good news for investors: గత కొంతకాలంగా ఊహించని రీతిలో పెరుగుతూ వస్తోన్న బంగారం ధర ఇవాళ ఒక్కసారిగా భారీగా పతనమైంది. గత రికార్డులను తిరగరాస్తూ రోజురోజుకూ ధర పెరుగుతూ వచ్చిన బంగారం.. ఇప్పడు నేల చూపు చూస్తోంది. నాలుగు సంవత్సరాల్లో ఒక్కరోజులో ఇంతటి భారీ తగ్గుదల కనిపించడం ఇదే తొలిసారిగా చెప్పవచ్చు. అంతర్జాతీయ మార్కెట్‌లో స్పాట్ గోల్డ్ రేటు కేవలం ఒకే రోజులోనే 6 శాతం పడిపోయింది. ఈ కారణంతో వరుసగా మూడు రోజుల నుంచి గోల్డ్ రేట్స్ తగ్గుతూనే వస్తున్నాయి. అంతర్జాతీయ మార్కెట్‌లో ఔన్స్ (31.10 గ్రాములు) బంగారం ధర గరిష్టంగా $4,381 డాలర్ల మార్క్ నుంచి ఒక్క రోజులోనే $4,082 డాలర్ల కనిష్ట స్థాయికి పడిపోయింది. అంటే, ఒక్క రోజులోనే సుమారు 300 డాలర్ల (భారత కరెన్సీలో దాదాపు రూ. 21,000) విలువ తగ్గింది. దీని ప్రభావం దేశీయ మార్కెట్లపై కూడా స్పష్టంగా కనిపించింది. హైదరాబాద్‌లో 24 క్యారెట్ల 10 గ్రాముల బంగారం ధర కూడా గణనీయంగా తగ్గింది.

ధరలు పడిపోవడానికి కారణాలు ఇవేనా?

భారీ లాభాల స్వీకరణ

బంగారం ధరలు రికార్డు స్థాయికి చేరడంతో, ఇన్వెస్టర్లు తమ లాభాల కోసం తమ బంగారాన్ని అమ్మకానికి పెట్టారు. దీంతో, ఒక్కసారిగా డిమాండ్ తగ్గడం, సరఫరా పెరగడం వల్ల ధరలు పడిపోయాయి.

యూఎస్ డాలర్ బలం

అమెరికన్ డాలర్ ఇండెక్స్ బలపడటం ఈ పతనానికి మరో ముఖ్య కారణంగా చెప్పవచ్చు. సాధారణంగా డాలర్ బలపడినప్పుడు, ఇతర కరెన్సీల వారికి బంగారం ఖరీదైనదిగా మారుతుంది, తద్వారా డిమాండ్ తగ్గి ధర తగ్గుతుంది.

భౌగోళిక ఉద్రిక్తతలు సడలింపు

అమెరికా-చైనా వాణిజ్య చర్చల్లో పురోగతి కనిపించే అవకాశం ఉందనే సంకేతాలు రావడం, అలాగే ప్రపంచ రాజకీయ అనిశ్చితి తగ్గుతుందనే ఆశాభావం మదుపరుల్లో పెరిగింది. దీంతో ‘సురక్షిత పెట్టుబడి’ అయిన బంగారంపై మొగ్గు తగ్గింది.

ఇతర మార్కెట్ల వైపు ఇన్వెస్టర్ల చూపు

రిస్క్ టేకింగ్ కారణంగా పెట్టుబడిదారులు బంగారం నుంచి తమ పెట్టుబడులను తీసి, ఈక్విటీలు లేదా ప్రభుత్వ బాండ్ల వంటి ఇతర రిస్క్ ఆస్తుల వైపు మళ్లుతున్నారు.

ఈ పతనం స్వల్పకాలికమేనా?

అయితే, మార్కెట్ నిపుణుల అభిప్రాయం ప్రకారం, ఈ పతనం కేవలంస్వల్పకాలికం మాత్రమే. దీర్ఘకాలంలో ద్రవ్యోల్బణం పెరుగుదల, ప్రపంచ కేంద్ర బ్యాంకులు కొనసాగిస్తున్న బంగారం కొనుగోళ్లు వంటి కారణాల వల్ల పసిడికి మద్దతు లభిస్తుంది. కొంత కాలం తర్వాత గోల్డ్ రేట్లు మళ్లీ పెరుగుతాయని నిపుణులు చెబుతున్నారు. కాబట్టి, దీన్ని పెట్టుబడిదారులకు, పసిడి ప్రియులకు కొనుగోలు చేయడానికి ఇదే మంచి అవకాశంగా చూడాలని విశ్లేషకులు సూచిస్తున్నారు. రాబోయే యూఎస్ ఫెడరల్ రిజర్వ్ వడ్డీ రేట్ల నిర్ణయంపై బంగారం ధరల కదలిక ఆధారపడి ఉంటుంది.