Gold and silver rates today : బంగారం కొనాలని వేచిచూస్తున్న పసిడి ప్రియులకు, సామాన్య వినియోగదారులకు బులియన్ మార్కెట్ కాస్త ఊరటనిచ్చింది. అంతర్జాతీయ పరిణామాలు, ఆర్థిక అనిశ్చితి నడుమ గురువారం దేశీయ మార్కెట్లో పసిడి ధర స్వల్పంగా తగ్గగా, వెండి మాత్రం ఊహించని రీతిలో భారీ పతనాన్ని నమోదు చేసి మార్కెట్ వర్గాలను ఆశ్చర్యపరిచింది.

దిగొచ్చిన ధరలు – తాజా లెక్కలు: క్యాప్స్‌ గోల్డ్‌ గణాంకాల ప్రకారం, హైదరాబాద్‌, విశాఖపట్నం, విజయవాడ తదితర నగరాల్లో 24 క్యారెట్ల స్వచ్ఛమైన పసిడి తులం (10 గ్రాములు) ధర నిన్నటితో పోలిస్తే రూ.445 తగ్గి రూ.1,56,120కి చేరింది. ఆభరణాల తయారీలో వాడే 22 క్యారెట్ల బంగారం 10 గ్రాములకు రూ.1,40,660 వద్ద కొనసాగుతోంది. గ్లోబల్ మార్కెట్లో ఔన్స్‌ స్పాట్‌ గోల్డ్‌ 4,296 డాలర్ల వద్ద కదలాడుతోంది.

వెండి విలవిల: బంగారంతో పోలిస్తే వెండి ధరల్లో తీవ్ర ఒడిదొడుకులు నమోదయ్యాయి. కేజీ వెండి ధరపై ఏకంగా రూ.2,682 మేర కోత పడి రూ.2,35,308 వద్ద స్థిరపడింది. అంతర్జాతీయంగా ఔన్స్‌ సిల్వర్‌ ధర 63.73 డాలర్ల వద్ద నమోదైంది.

కొనుగోలుదారులకు సూచన: రూపాయి మారకం విలువ, దిగుమతి సుంకాలు, అంతర్జాతీయ చమురు ధరలు తుది రేటును ప్రభావితం చేస్తాయి. అయితే మార్కెట్ బోర్డుపై కనిపించే ధర నగల తుది బిల్లు కాదని, దానికి జీఎస్టీ, తయారీ రుసుములు (తరుగు, మజూరీ) అదనంగా కలుస్తాయని నిపుణులు గుర్తుచేస్తున్నారు.