India EV Sales: భారతదేశంలో ఎలక్ట్రిక్ వాహనాల (EV) విభాగం ఈ ఏడాది అద్భుతమైన ప్రగతిని సాధిస్తూ దూసుకుపోతోంది. పెరుగుతున్న వినియోగదారుల ఆసక్తి, కొత్త మోడళ్ల లభ్యత కారణంగా 2025-26 ఆర్థిక సంవత్సరం తొలి అర్ధ భాగంలో (H1 FY2026) రిటైల్ విక్రయాలు ఆకాశాన్ని తాకాయి.

అంచనాలకు మించిన వృద్ధి
2025 ఏప్రిల్ నుండి సెప్టెంబర్ వరకు కేవలం ఆరు నెలల కాలంలోనే మొత్తం EV విక్రయాలు 108 శాతం పెరిగి 91,076 యూనిట్లకు చేరాయి. గత ఏడాది ఇదే కాలంలో నమోదైన 43,847 యూనిట్లతో పోలిస్తే ఇది రెట్టింపు కంటే ఎక్కువ. FY2025 మొత్తం విక్రయాల్లో దాదాపు 84 శాతం ఈ ఆరు నెలల్లోనే సాధించడం, మార్కెట్ ఎంత వేగంగా విస్తరిస్తోందో స్పష్టం చేస్తోంది. ప్రస్తుతం పండుగ సీజన్ ప్రారంభం కానుండడంతో, ఈ డిమాండ్ మరింత పెరిగి, FY2026 ముగిసేనాటికి 1,75,000 యూనిట్ల లక్ష్యాన్ని చేరుకోవడం ఖాయమని పరిశ్రమ అంచనా వేస్తోంది.

టాటా ఆధిపత్యానికి సవాలు
H1 FY2026 లో టాటా మోటార్స్ 34,586 యూనిట్లతో ముందంజలో ఉన్నప్పటికీ, దాని మార్కెట్ షేర్ గత సంవత్సరం 64 శాతం నుండి ఇప్పుడు 40 శాతానికి తగ్గింది. టాటా తన Punch, Nexon, Tiago, Tigor, Harrier EVల వంటి విస్తృత శ్రేణి మోడళ్లతో 23 శాతం వృద్ధిని సాధించింది, కానీ కొత్త పోటీదారుల దూకుడుతో మార్కెట్ షేర్ కోల్పోయింది.

కొత్త ఆటగాళ్ల హవా
టాటా మార్కెట్ షేర్‌ను మింగేస్తూ JSW MG, మహీంద్రా వంటి కొత్త ఆటగాళ్లు సమిష్టిగా దాదాపు 50 శాతం మార్కెట్ షేర్‌ను దక్కించుకోవడం విశేషం.

MG Motor India: 26,640 యూనిట్లతో ఏకంగా 220 శాతం వృద్ధిని నమోదు చేసి, 29 శాతం మార్కెట్ షేర్‌తో రెండో స్థానానికి ఎగబాకింది. Windsor, Comet, ZS EV, వంటి మోడళ్లతో మార్కెట్‌ను ఆకర్షిస్తోంది.

మహీంద్రా: అత్యధికంగా 531 శాతం వృద్ధి సాధించి, 19,436 యూనిట్లతో 21 శాతం మార్కెట్ షేర్‌ను అందుకుంది. XUV400 మరియు కొత్త BE సిరీస్ మోడళ్లతో మహీంద్రా తన పట్టు బిగిస్తోంది.

ఇక హ్యుందాయ్ (819% వృద్ధి), కియా (875% వృద్ధి) కూడా కొత్త మోడళ్ల (హ్యుందాయ్ క్రెటా ఎలక్ట్రిక్, కియా కారెన్స్ క్లావిస్ EV) తో భారీగా పురోగమించాయి. BYD కూడా 123 శాతం వృద్ధితో మార్కెట్‌లో తన స్థానాన్ని సుస్థిరం చేసుకుంది.

లగ్జరీ సెగ్మెంట్‌లో BMW దర్జా
లగ్జరీ EVల విభాగంలోనూ వృద్ధి అద్భుతంగా ఉంది. ఇక్కడ 2,375 యూనిట్ల విక్రయాలు జరగగా, ఇందులో 64 శాతం వాటా BMW దక్కించుకుంది.

ధరల పోరు:
అయితే, ఆగస్టులో 18,369 యూనిట్లకు చేరిన విక్రయాలు సెప్టెంబర్‌లో 15,771 యూనిట్లకు తగ్గడం కొందరిని ఆందోళన కలిగించింది. ICE/హైబ్రిడ్ వాహనాలపై GST తగ్గింపులు కారణంగా EVలకు, సాంప్రదాయ కార్లకు మధ్య ధర వ్యత్యాసం తగ్గడం ఈ తగ్గుదలకు ఒక కారణంగా కనిపిస్తోంది.

మొత్తం మీద, భారతీయ EV మార్కెట్ వేగంగా పరిణామం చెందుతోంది. ఒకప్పుడు టాటా ఏకఛత్రాధిపత్యంగా ఉన్న మార్కెట్‌లో, ఇప్పుడు బహుళ సంస్థల మధ్య పోటీ పెరగడం వినియోగదారులకు మరింత మెరుగైన ఎంపికలను అందిస్తోంది. ఈ పెరుగుతున్న డిమాండ్, పండుగ సీజన్ జోష్‌తో కలిసి భారత EV భవిష్యత్తు ఉజ్వలంగా ఉంటుందని స్పష్టంగా తెలుస్తోంది.