GST Rates VS LPG Cylinder Price: దేశవ్యాప్తంగా వస్తువుల సేవల పన్ను (జీఎస్టీ)లో మార్పులు రేపటినుంచి అమలులోకి రానున్నాయి. సెప్టెంబర్ 22 నుంచి కొత్త జీఎస్టీ రేట్లు అమలులోకి రావడంతో పలు వస్తువులు, ముఖ్యంగా ఆహారం మరియు పానీయాల విభాగంలో వినియోగదారులకు తక్కువ ధరల సౌలభ్యం లభించనుంది. ఇప్పటికే కొంతమంది కంపెనీలు తాము ఉత్పత్తి చేసే వస్తువులపై తగ్గిన జీఎస్టీ రేట్లను నేరుగా వినియోగదారులకు అందజేస్తామని వెల్లడించాయి. ఈ నిర్ణయం అమలులోకి వచ్చిన తర్వాత మరికొన్ని సంస్థలు కూడా తమ ఉత్పత్తుల ధరలను సవరించే అవకాశముందని భావిస్తున్నారు.
తగ్గిన రేట్ల లాభాన్ని
ప్రభుత్వం ఈ జీఎస్టీ రేట్ల మార్పులను సమీక్షిస్తూ, కంపెనీలు తగ్గిన పన్ను ప్రయోజనాన్ని వినియోగదారులకు చేరుస్తున్నాయా లేదా అన్న దానిపై ప్రత్యేక దృష్టి పెట్టింది. రిటైల్ వ్యాపారులు, తయారీదారులు తగ్గిన రేట్ల లాభాన్ని వినియోగదారులకు అందించడం తప్పనిసరి అని స్పష్టతనిచ్చింది.
గృహ వంట గ్యాస్ సిలిండర్లపై..
ఇదే సమయంలో సామాజిక మాధ్యమాల్లో ఒక ప్రశ్న పెద్ద ఎత్తున చర్చనీయాంశమైంది. గృహ వంట గ్యాస్ సిలిండర్లపై కూడా ఈ తగ్గింపు వర్తిస్తుందా లేదా అన్న అనుమానం వినియోగదారుల్లో కనిపించింది. వంట గ్యాస్ ఖర్చు సాధారణ కుటుంబాల ఖర్చుల్లో ప్రధాన భాగం కావడంతో ప్రజల్లో ఆసక్తి ఎక్కువగా ఉంది.
5 శాతం జీఎస్టీ …
ప్రస్తుతం గృహ వంట గ్యాస్ సిలిండర్‌పై 5 శాతం జీఎస్టీ అమలులో ఉంది. అయితే వాణిజ్య వినియోగం కోసం ఉపయోగించే ఎల్‌పీజీ సిలిండర్లపై 18 శాతం జీఎస్టీ కొనసాగుతోంది. సెప్టెంబర్ 22న జరిగిన సమావేశంలో సిలిండర్లపై ఎటువంటి మార్పు నిర్ణయం తీసుకోలేదు. దీని అర్థం ఏమిటంటే గృహ వంట గ్యాస్ ధరల్లో ఎటువంటి మార్పులు ఉండవు. ప్రస్తుతం ఢిల్లీలో 14.2 కిలోల ఎల్‌పీజీ సిలిండర్ ధర రూ.853 వద్ద కొనసాగుతోంది.
ఎలాంటి మార్పులు లేవు..
వాణిజ్య సిలిండర్ల విషయానికి వస్తే, హోటళ్ళు, రెస్టారెంట్లు, వీధి తినుబండార కేంద్రాలు మరియు పారిశ్రామిక అవసరాలకు ఉపయోగించే గ్యాస్ సిలిండర్లపై కూడా ఎలాంటి మార్పులు లేవు. 19 కిలోల వాణిజ్య సిలిండర్ ధర ప్రస్తుతం ఢిల్లీలో రూ.1580గా ఉంది. కొత్త జీఎస్టీ రేట్లు అమలులోకి వచ్చిన తర్వాత కూడా ఈ ధరల్లో ఎలాంటి తగ్గింపు ఉండదు.
ఈ నేపథ్యంలో గృహ వినియోగదారులకు కొత్త జీఎస్టీ మార్పుల ప్రభావం ఆహారం, పానీయాలు వంటి కొన్ని విభాగాల్లో మాత్రమే ఉండనుంది. అయితే వంట గ్యాస్ విషయంలో ఎటువంటి మార్పు లేకపోవడం వల్ల ఆ విభాగంలో కుటుంబాలకు ఎటువంటి ఉపశమనం లభించదు.
