Post Office : డబ్బు సంపాదించాలంటే లక్షల పెట్టుబడి ఉండాలి లేదా రిస్క్ తీసుకోవాలి అనే అపోహను పోస్ట్ ఆఫీస్ సరికొత్తగా చెరిపివేస్తోంది. సామాన్యుడు సైతం తన రోజువారీ ఆదాయం నుండి చిన్న మొత్తాన్ని పక్కన పెడుతూ.. కాలక్రమేణా లక్షాధికారి అయ్యే అద్భుత అవకాశం ఇక్కడ ఉంది. స్టాక్ మార్కెట్ ఒడిదుడుకులు లేవు, ప్రైవేట్ సంస్థల మోసాలు లేవు.. కేవలం ప్రభుత్వ హామీతో మీ చేతికి రూ. 20 లక్షల భారీ నిధి అందేలా చేసే ‘పోస్ట్ ఆఫీస్ రికరింగ్ డిపాజిట్ (RD)’ స్కీమ్.

EPF : ప్రైవేట్ ఉద్యోగులకు గుడ్ న్యూస్.. పెరగనున్న పీఎఫ్ జీత పరిమితి.. లక్షలాది మందికి లబ్ధి

పోస్ట్ ఆఫీస్ RD మ్యాజిక్
మధ్యతరగతి ప్రజలకు, ముఖ్యంగా రోజువారీ కూలీలకు లేదా చిన్న వ్యాపారులకు ఈ పథకం ఒక వరప్రసాదం. కేవలం రూ. 100తోనే మీరు ఈ పొదుపు ప్రయాణాన్ని ప్రారంభించవచ్చు. మీ పిల్లల భవిష్యత్తు కోసమో లేదా మీ రిటైర్మెంట్ అవసరాల కోసమో ఒక పక్కా ప్లాన్‌తో పొదుపు చేయాలనుకునే వారికి ఇది బెస్ట్ ఆప్షన్.

వడ్డీ రేట్లు & కాలపరిమితి
ప్రస్తుతం ఈ పథకంపై ప్రభుత్వం 6.7 శాతం వడ్డీని అందిస్తోంది. దీని ప్రత్యేకత ఏమిటంటే, వడ్డీపై వడ్డీ పడే చక్రవడ్డీ విధానం ద్వారా మీ డబ్బు వేగంగా పెరుగుతుంది. ప్రతి మూడు నెలలకు ఒకసారి వడ్డీని లెక్కిస్తారు. సాధారణంగా ఈ పథకం కాలపరిమితి 5 ఏళ్లు. కానీ మీరు పెద్ద మొత్తం వెనకేయాలనుకుంటే, మరో 5 ఏళ్లు పొడిగించుకుని మొత్తం 10 ఏళ్ల పాటు పెట్టుబడిని కొనసాగించవచ్చు.

రూ. 20 లక్షల నిధి..
చాలామందికి రోజుకు రూ. 400 పొదుపు చేయడం పెద్ద కష్టమనిపించదు. కానీ అదే క్రమశిక్షణతో చేస్తే అది ఎంత పెద్ద మొత్తంగా మారుతుందో ఈ లెక్క చూడండి.

రోజువారీ పొదుపు: రూ. 400

నెలవారీ పెట్టుబడి: రూ. 12,000

వార్షిక పెట్టుబడి: రూ. 1.44 లక్షలు

కాలపరిమితి: 10 ఏళ్లు (5 + 5 ఏళ్లు)

ఇలా స్థిరంగా మీరు 10 ఏళ్ల పాటు పొదుపు చేస్తూ వెళ్తే, చక్రవడ్డీ ప్రభావంతో మీ మెచ్యూరిటీ సమయానికి మీ చేతిలో సుమారు రూ. 20 లక్షల (రూ. 19,89,150) నిధి ఉంటుంది. మీరు దాచుకున్న అసలు కంటే వడ్డీ రూపంలో వచ్చే ఆదాయమే మీ నిధిని భారీగా మారుస్తుంది.

పథకంలోని ఇతర ఆకర్షణీయమైన ఫీచర్లు
ఖాతా తెరిచిన ఏడాది తర్వాత అత్యవసర అవసరం ఏర్పడితే, మీ డిపాజిట్‌పై 50 శాతం వరకు రుణం పొందే సౌకర్యం ఉంది.10 ఏళ్లు పైబడిన వారు ఎవరైనా సొంతంగా ఖాతా తెరవవచ్చు. పిల్లల పేరిట తల్లిదండ్రులు గార్డియన్‌లుగా ఉండవచ్చు.ఇది ప్రభుత్వ పథకం కాబట్టి మీ రూపాయికి కూడా నష్టం ఉండదు. నామినీ సౌకర్యం ద్వారా మీ కుటుంబానికి పూర్తి ఆర్థిక భద్రత లభిస్తుంది.

పెద్ద మొత్తంలో డబ్బు వెనకేయడానికి మీరు ధనవంతులు కావాల్సిన అవసరం లేదు. కేవలం రోజువారీ ఖర్చుల నుండి కొద్ది మొత్తాన్ని పొదుపు చేసే ఓర్పు, క్రమశిక్షణ ఉంటే చాలు. అప్పుడే మీరు మీ కలల నిధిని సునాయాసంగా నిర్మించుకోగలరు.