SBI Declares RCom Loan Fraud: పారిశ్రామికవేత్త అనిల్ అంబానీకి భారీ ఎదురుదెబ్బ తగిలింది. దేశంలోనే అతిపెద్ద ప్రభుత్వరంగ బ్యాంక్ ఎస్బిఐ (స్టేట్ బ్యాంక్ ఆఫ్ ఇండియా) తాజాగా రిలయన్స్ కమ్యూనికేషన్స్ (RCom) బ్యాంకుల నుండి తీసుకున్న రుణాలను మోసపూరితంగా వినియోగించినట్లు పేర్కొంది. ఇందుకు సంబంధించిన వివరాలను జూలై 2, 2025 నాటికి స్టాక్ ఎక్స్ఛేంజ్‌లో పేర్కొంది. మోసపూరిత రుణ ఖాతా అనే ఎస్‌బీఐ ఆరోపణలు గమనిస్తే, ఎస్‌బీఐ ప్రకారం RCom రుణంగా పొందిన డబ్బును అనుబంధ సంస్థలకు అక్రమంగా బదిలీ చేసింది. అంతేకాకుండా ఇన్‌వాయిస్‌లను దుర్వినియోగం చేస్తూ ఇంటర్-కంపెనీ లావాదేవీలు జరిపిందని ఆరోపణ. ఈ కారణంగా ఆ కంపెనీ రుణ ఖాతాను మోసపూరిత ఖాతాగా ప్రకటించింది. ఈ ఆరోపణలు 2016లో జరిగిన కొన్ని లావాదేవీల ఆధారంగా వెలుగులోకి వచ్చాయి. ఎస్‌బీఐ ప్రకటన ప్రకారం, ఆర్‌కామ్ తీసుకున్న రుణాన్ని ఉద్దేశిత ప్రయోజనాల కోసం కాకుండా ఇతర సంస్థలకు బదిలీ చేయడంలో వినియోగించిందని వెల్లడైంది.
అనిల్ అంబానీ న్యాయవాది స్పందన
ఈ నిర్ణయాన్ని తీవ్రంగా వ్యతిరేకించిన అనిల్ అంబానీ న్యాయవాది, జూలై 2న ఎస్‌బీఐకి లేఖ రాశారు. అందులో, ఎస్‌బీఐ చర్యలు ఆర్బిఐ మార్గదర్శకాలను, సుప్రీంకోర్టు మరియు ముంబై హైకోర్టు తీర్పులను కూడా ఉల్లంఘించాయి అని పేర్కొన్నారు. అంతేకాదు, RComకి గతంలో షోకాజ్ నోటీసు ఇచ్చినప్పటికీ, ఆ సమయంలో సమాధానం ఇచ్చినందుకు ఎలాంటి స్పందన ఇవ్వకుండా ఏడాది పాటు వాయిదా వేశారు అని న్యాయవాది ఆరోపించారు. అంబానీకి వ్యక్తిగతంగా విచారణకు అవకాశం ఇవ్వకుండా ఏకపక్షంగా ఈ నిర్ణయం తీసుకున్నారని లేఖలో వాపోయారు.
న్యాయ ప్రక్రియలపై గౌరవం లేదని ఆరోపణ
న్యాయవాది ప్రకారం, ఎస్‌బీఐ నిర్ణయం సహజ న్యాయ సూత్రాలను కూడా అవమానించినట్లేనని పేర్కొన్నారు. ఒక సంస్థపై మోసం ఆరోపణ చేయాలంటే, దానికి సంబంధించిన సాక్ష్యాలు, విచారణలు, మరియు బాధితుల వాదనలు సమగ్రంగా పరిశీలించాల్సి ఉంటుంది. కానీ RCom విషయంలో అలాంటి ప్రక్రియను గౌరవించలేదని స్పష్టం చేశారు.
ఇదే మార్గంలో కెనరా బ్యాంక్ కూడా
ఎస్‌బీఐ కంటే ముందు కెనరా బ్యాంక్ కూడా RCom రుణ ఖాతాను మోసంగా వర్గీకరించింది. ఆ బ్యాంక్ కూడా డబ్బు అనుబంధ సంస్థలకు తరలించడాన్ని ప్రాధాన్యమైన కారణంగా పేర్కొంది. ఈ కేసులో మిగిలిన బ్యాంకులు ఏ విధంగా స్పందిస్తాయన్నది ఆసక్తికరంగా మారింది. RCom ఇప్పటికే దివాలా ప్రక్రియలో ఉన్న నేపథ్యంలో, ఈ నిర్ణయాలు ఇతర దివాలా బాధిత కంపెనీలపైనా ప్రభావం చూపే అవకాశం ఉంది. మిగతా సంస్థలు కూడా రుణ వినియోగంపై మరింత జాగ్రత్త తీసుకోవాల్సిన అవసరం ఏర్పడింది.
అనిల్ అంబానీకి ఇది ఒక గంభీరమైన న్యాయ పోరాటంగా మారే సూచనలు కనిపిస్తున్నాయి. ఎస్‌బీఐ, ఆర్బిఐ మార్గదర్శకాల ప్రకారం వ్యవహరించిందా లేక న్యాయ ప్రక్రియలను ఉల్లంఘించిందా అన్నది కోర్టులో తేలాల్సి ఉంది.