Starbucks: అంతర్జాతీయ కాఫీ దిగ్గజం స్టార్‌బక్స్‌ ఆర్థికంగా కఠినమైన నిర్ణయాలు తీసుకుంటోంది. ప్రపంచవ్యాప్తంగా గుర్తింపు పొందిన ఈ బ్రాండ్, ఖర్చులను తగ్గించుకునే ప్రణాళికలో భాగంగా అమెరికా, కెనడా వంటి ఉత్తర అమెరికా ప్రాంతాలలో లాభదాయకత లేని వందల కొద్దీ స్టోర్లను మూసివేయాలని నిర్ణయించింది.
గత ఆరు త్రైమాసికాలుగా (Six Quarters) విక్రయాలలో క్షీణత నమోదుకావడం, పెరుగుతున్న ద్రవ్యోల్బణం (Inflation) కారణంగా వినియోగదారులు స్టార్‌బక్స్‌ ఖరీదైన పానీయాల కొనుగోలుపై పునరాలోచన చేయడం వంటి కారణాల వల్ల కంపెనీ ఈ కఠిన నిర్ణయాన్ని తీసుకుంది. స్టోర్ల సంఖ్య తగ్గడానికి మరో ముఖ్య కారణం.. వినియోగదారులు ఆశించిన ఆకర్షణీయమైన భౌతిక వాతావరణాన్ని (Physical Environment) లేదా ఆర్థిక పనితీరుకు మార్గాన్ని చూడని విక్రయశాలలను మూసివేయాలని కంపెనీ గుర్తించింది.
బిలియన్ డాలర్ల పునర్నిర్మాణ ప్రణాళిక
ఈ ప్రతికూల పరిస్థితుల నుంచి వ్యాపారాన్ని తిరిగి పుంజుకునేలా చేసేందుకు స్టార్‌బక్స్‌ $1 బిలియన్ డాలర్ల పునర్నిర్మాణ పథకానికి ఆమోదం తెలిపింది. ఈ ప్రణాళికలో భాగంగా, ఉత్తర అమెరికా వ్యాప్తంగా ఈ నెల చివరి నాటికి మొత్తం అవుట్‌లెట్లలో సుమారు 1% మూతపడనున్నాయి. జూన్ చివరి నాటికి 18,734 స్టోర్లు ఉండగా, సెప్టెంబర్ చివరి నాటికి అవి 18,300కు పరిమితం కానున్నాయి.
ఈ మూసివేత ప్రక్రియతోపాటు, స్టార్‌బక్స్‌ 900 మంది వరకు నాన్-రిటైల్ ఉద్యోగులను కూడా తొలగించనుంది. అయితే, ప్రభావితమైన స్టోర్లలోని సిబ్బందికి వీలైనంతవరకు సమీపంలోని ఇతర శాఖల్లో ఉద్యోగాలను బదిలీ చేయాలని లేదా తగినంత సెవరెన్స్ ప్యాకేజీలను (Severance Packages) అందించాలని కంపెనీ ప్రయత్నిస్తోంది.
ఈ ప్రణాళికలో స్టోర్ల మూసివేత, ఉద్యోగుల తొలగింపుతో పాటు, రాబోయే 12 నెలల్లో 1,000కు పైగా స్టోర్లను వినియోగదారులకు మరింత సౌకర్యవంతంగా, ఆకర్షణీయంగా ఉండేలా పునరుద్ధరించాలని (Redesign) కూడా స్టార్‌బక్స్‌ లక్ష్యంగా పెట్టుకుంది. ఈ చర్యల ద్వారా అమ్మకాలు, వినియోగదారుల అనుభవాన్ని మెరుగుపరచాలని కంపెనీ ఆశిస్తోంది. మార్కెట్‌లో స్థిరత్వాన్ని సాధించడానికి, తిరిగి లాభాల బాట పట్టడానికి స్టార్‌బక్స్‌ CEO బ్రియన్ నికోల్ (Brian Niccol) నాయకత్వంలో ఈ ‘బ్యాక్ టు స్టార్‌బక్స్‌’ కార్యక్రమం ప్రారంభించబడింది.
ప్రపంచ ఆర్థిక వ్యవస్థలో ఏర్పడిన ఒడిదుడుకులు, పెరిగిన ఖర్చులు పెద్ద సంస్థలను సైతం వ్యయ నియంత్రణకు పురికొల్పుతున్నాయనడానికి స్టార్‌బక్స్‌ తీసుకున్న ఈ నిర్ణయం ఒక నిదర్శనం.
