Car Offer Price :దేశంలో కొత్తగా ప్రవేశపెట్టిన జీఎస్టీ 2.0 (GST 2.0) రేట్లతో భారతీయ ఆటోమొబైల్ మార్కెట్ ఒక్కసారిగా పుంజుకుంది. జీఎస్టీ తగ్గింపు ప్రయోజనాలతో పాటు, రాబోయే పండుగ సీజన్‌ను దృష్టిలో ఉంచుకుని, టాటా మోటార్స్ తన కార్ల శ్రేణిపై ఆకర్షణీయమైన ఆఫర్లను ప్రకటించింది. ఈ ఆఫర్లలో భాగంగా వినియోగదారులు మోడల్‌ను బట్టి రూ. 2 లక్షల వరకు ప్రయోజనాలను పొందవచ్చు.

సెప్టెంబర్ 22 నుండి అమలులోకి వచ్చిన జీఎస్టీ రేట్ల మార్పుతో, దేశవ్యాప్తంగా ఆటో డీలర్‌షిప్‌లు రద్దీగా మారాయి. ఆన్‌లైన్ బుకింగ్‌లు కూడా భారీగా పెరిగాయి. ముఖ్యంగా చిన్న, మధ్యస్థ కార్ల విభాగంలో ధరలు గణనీయంగా తగ్గడం వినియోగదారుల ఆసక్తిని పెంచింది.

నెక్సాన్ కొనుగోలుపై బంపర్ ఆఫర్
టాటా మోటార్స్‌లో అత్యధికంగా అమ్ముడవుతున్న SUV నెక్సాన్ (Nexon) ఈ ప్రయోజనాలను అత్యధికంగా పొందుతోంది. జీఎస్టీ మినహాయింపు మరియు పండుగ డిస్కౌంట్లను కలిపిన తర్వాత, నెక్సాన్ ధర రూ. 1.55 లక్షల వరకు తగ్గింది.

అంతేకాకుండా, కంపెనీ అదనంగా రూ. 45,000 విలువైన పండుగ ప్రయోజనాలను కూడా అందిస్తోంది. కాబట్టి, ఈ నెలలో నెక్సాన్ కొనుగోలు చేసే వినియోగదారులు మొత్తం రూ. 2 లక్షల వరకు ఆదా చేసే అవకాశం లభించింది.

టాటా మోటార్స్ అందిస్తున్న ఈ బంపర్ ఆఫర్ సెప్టెంబర్ 30, 2025 వరకు మాత్రమే అందుబాటులో ఉంటుంది. దేశీయ కార్ల తయారీ సంస్థ అందించిన ఈ అద్భుతమైన తగ్గింపులు, మార్కెట్‌లో పోటీని పెంచడంతో పాటు, కొత్త కారు కొనాలని చూస్తున్న వారికి ఇది అత్యంత అనుకూలమైన సమయంగా మారింది.