Tata Punch: భారత మార్కెట్‌లో అత్యధికంగా అమ్ముడవుతున్న ఫ్యామిలీ ఎస్‌యూవీలలో ఒకటైన టాటా పంచ్, ఇప్పుడు కొత్త ఫేస్‌లిఫ్ట్ వెర్షన్‌తో ప్రేక్షకులను ఆకట్టుకోవడానికి సిద్ధమవుతోంది. 2021లో మార్కెట్లోకి వచ్చిన తర్వాత ఈ మోడల్‌కు ఇదే తొలి ప్రధాన అప్‌డేట్ కావడం విశేషం. తాజాగా రోడ్లపై టెస్ట్ డ్రైవ్ చేస్తూ కెమెరాలకు చిక్కిన ఈ కారు, దాని డిజైన్, ఫీచర్ల గురించి కీలక వివరాలను బయటపెట్టింది.
ఎలక్ట్రిక్ వెర్షన్‌ను పోలిన డిజైన్
కొత్త స్పై షాట్‌లను బట్టి చూస్తే, కొత్త టాటా పంచ్ డిజైన్ దాని ఎలక్ట్రిక్ వెర్షన్ అయిన పంచ్ ఈవీని పోలి ఉంది. ఫ్లాట్ టెయిల్‌గేట్ ప్రొఫైల్, కనెక్టెడ్ టెయిల్‌లైట్ సెటప్ వంటి మార్పులు దీనిని మరింత ఆధునికంగా మార్చాయి. అంతేకాకుండా, వెనుక వైపర్ వాషర్, రూఫ్ రైల్స్, షార్క్-ఫిన్ యాంటెన్నా, కొత్త బ్లాక్-అవుట్ అల్లాయ్ వీల్స్ వంటి ఫీచర్లు కూడా ఇందులో ఉన్నట్లు తెలుస్తోంది.
ఇంటీరియర్‌లో అత్యాధునిక ఫీచర్లు
లోపలి భాగంలో కూడా టాటా మోటార్స్ పెద్ద మార్పులే చేసింది. ఇల్యూమినేటెడ్ లోగోతో కూడిన టూ-స్పోక్ స్టీరింగ్ వీల్, ఫ్రీ-స్టాండింగ్ ఇన్ఫోటైన్‌మెంట్ యూనిట్ మరియు బ్లైండ్ స్పాట్ మానిటర్ వంటి అధునాతన ఫీచర్లను ఇందులో చేర్చారు. ముందు వైపు వెంటిలేటెడ్ సీట్లు ఉండటం కూడా ఒక అదనపు ఆకర్షణ. ఈ ఫీచర్లు డ్రైవింగ్ అనుభవాన్ని మరింత సుఖవంతంగా మారుస్తాయి.
ఇంజిన్ , ధర
ఇంజిన్ పరంగా పెద్దగా మార్పులు ఉండకపోవచ్చు. ప్రస్తుత మోడల్‌లో ఉన్న 1.2-లీటర్ పెట్రోల్ ఇంజిన్ మరియు సీఎన్జీ ఆప్షన్ కొనసాగుతాయి. అయితే, ఈ కొత్త ఫీచర్లు, డిజైన్ అప్‌డేట్‌ల కారణంగా కొత్త పంచ్ ఫేస్‌లిఫ్ట్ ధర రూ. 30,000 నుంచి రూ. 50,000 వరకు పెరిగే అవకాశం ఉందని నిపుణులు అంచనా వేస్తున్నారు. ఈ మార్పులు టాటా పంచ్‌ను మార్కెట్‌లో మరింత పోటీకి సిద్ధం చేస్తాయని చెప్పవచ్చు.
