Bank Jobs -Bank Of Baroda: బ్యాంకింగ్ రంగంలో ఉద్యోగం కోసం ఎదురుచూస్తున్న నిరుద్యోగులకు శుభవార్త. దేశవ్యాప్తంగా పనిచేస్తున్న బ్యాంక్ ఆఫ్ బరోడా కొత్తగా ఉద్యోగ నియామక ప్రక్రియను ప్రారంభించింది. తాజాగా విడుదల చేసిన నోటిఫికేషన్ ప్రకారం కాంట్రాక్టు ఆధారంగా పలు విభాగాల్లో 330 పోస్టులను భర్తీ చేయనున్నట్లు ప్రకటించింది. ఈ నియామకాల్లో డిప్యూటీ మేనేజర్, అసిస్టెంట్ వైస్ ప్రెసిడెంట్, అసిస్టెంట్ మేనేజర్ స్థానాలు ఉన్నాయి. ఆసక్తి కలిగిన అభ్యర్థులు ఈ నెల 29వ తేదీ వరకు ఆన్‌లైన్‌లో దరఖాస్తు చేసుకోవచ్చని బ్యాంక్ స్పష్టంచేసింది.
300 పోస్టులు అసిస్టెంట్ మేనేజర్…
మొత్తం ఖాళీలలో ఎక్కువ భాగం అసిస్టెంట్ మేనేజర్ పోస్టులకు కేటాయించారు. 330 ఉద్యోగాల్లో 300 పోస్టులు అసిస్టెంట్ మేనేజర్ కోసమే ఉన్నాయంటే అవకాశాలు విస్తృతంగా లభిస్తున్నాయి. అలాగే డిప్యూటీ మేనేజర్‌కు 22 ఖాళీలు, అసిస్టెంట్ వైస్ ప్రెసిడెంట్‌కు 18 పోస్టులు ఉన్నాయి. ఈ ఉద్యోగాలు గుజరాత్‌లోని వడోదర ప్రధాన కార్యాలయం పరిధిలో ఉన్నప్పటికీ, దేశవ్యాప్తంగా వివిధ రాష్ట్రాల్లో అవసరాల ప్రకారం అభ్యర్థులను నియమించనున్నారు.
పలు ప్రత్యేక విభాగాల్లో…
ఈ నియామకాలు పలు ప్రత్యేక విభాగాల్లో జరగనున్నాయి. మాస్ ట్రాన్సిట్ సిస్టమ్, అకౌంట్ అగ్రిగేటర్, ఓఎన్‌డీసీ, డిజిటల్ ప్రొడక్ట్స్, పీఎఫ్‌ఎం, సీబీడీసీ, మొబైల్ బిజినెస్ అప్లికేషన్, డిజిటల్ లెండింగ్ సేల్స్, ఎంఎస్‌ఎంఈ సేల్స్, వెండర్ రిస్క్ మేనేజ్‌మెంట్, గ్రూప్ రిస్క్ మేనేజ్‌మెంట్, సైబర్ సెక్యూరిటీ రిస్క్ వంటి విభాగాల్లో ఖాళీలు ఉన్నట్లు బ్యాంక్ వివరాలు వెల్లడించింది.
డిగ్రీ లేదా బీఈ, బీటెక్..
విద్యార్హతల విషయానికి వస్తే, సంబంధిత విభాగంలో డిగ్రీ లేదా బీఈ, బీటెక్, ఎంఈ, ఎంటెక్ పూర్తి చేసిన వారు అర్హులు. ముఖ్యంగా కంప్యూటర్ సైన్స్, ఇన్ఫర్మేషన్ టెక్నాలజీ, ఇన్ఫర్మేషన్ సెక్యూరిటీ, సైబర్ సెక్యూరిటీ, ఎలక్ట్రానిక్స్, ఎలక్ట్రానిక్స్ అండ్ కమ్యూనికేషన్, సాఫ్ట్‌వేర్ ఇంజనీరింగ్ వంటి విభాగాల్లో చదివిన అభ్యర్థులకు ప్రాధాన్యం ఉంటుంది. ఫైనాన్స్, రిస్క్ మేనేజ్‌మెంట్, బిజినెస్ అడ్మినిస్ట్రేషన్ వంటి కోర్సులు పూర్తిచేసినవారూ దరఖాస్తు చేసుకోవచ్చు. అదనంగా పని అనుభవం ఉన్నవారికి మరింత ప్రాధాన్యత ఇవ్వనున్నారు.
40 సంవత్సరాల లోపు..
వయస్సు పరంగా కనీసం 23 సంవత్సరాలు, గరిష్టంగా 40 సంవత్సరాల లోపు ఉన్న అభ్యర్థులు మాత్రమే ఈ పోస్టులకు అర్హులు. ప్రభుత్వ నిబంధనల ప్రకారం కేటగిరీ ఆధారంగా వయస్సులో సడలింపు వర్తించనుంది.
జీతభత్యాల విషయానికి వస్తే, ఉద్యోగానికి తగిన విద్యార్హతలు, అనుభవాన్ని బట్టి వేతనం నిర్ణయించబడుతుంది. ప్రారంభ వేతనం గౌరవప్రదంగా ఉంటుందని, అనుభవం ఉన్నవారికి లక్ష రూపాయలకు మించి జీతం వచ్చే అవకాశం ఉందని సమాచారం అందింది.
దరఖాస్తు ప్రక్రియ జులై 30న ప్రారంభమైంది. ఆన్‌లైన్‌ దరఖాస్తుల సమర్పణకు చివరి తేదీ ఆగస్టు 29గా నిర్ణయించారు. జనరల్, ఓబీసీ, ఈడబ్ల్యూఎస్ అభ్యర్థులు రూ.850 ఫీజు చెల్లించాలి. ఎస్సీ, ఎస్టీ, మహిళా అభ్యర్థులు, దివ్యాంగులు, మాజీ సైనికులు కేవలం రూ.175 మాత్రమే చెల్లించాలి.
ఎంపిక విధానం సర్టిఫికెట్ పరిశీలన, వ్యక్తిగత ఇంటర్వ్యూ ఆధారంగా కొనసాగుతుంది. రాత పరీక్ష లేకుండా నేరుగా అనుభవం, అర్హత, ఇంటర్వ్యూ ఫలితాల ఆధారంగా అభ్యర్థులను ఎంపిక చేయనున్నారు. దరఖాస్తు చేసుకోవాలనుకునే వారు తప్పనిసరిగా బ్యాంక్ ఆఫ్ బరోడా అధికారిక వెబ్‌సైట్‌ను సందర్శించి అప్లికేషన్ పూర్తి చేయాలి. అధికారిక వెబ్‌సైట్ చిరునామా www.bankofbaroda.in
.
ఈ నియామక ప్రక్రియలో భాగంగా దేశంలో బ్యాంకింగ్ రంగంలో ప్రతిభ కనబరచాలనుకునే వారికి మంచి అవకాశం లభిస్తున్నట్లు నిపుణులు భావిస్తున్నారు. ముఖ్యంగా డిజిటల్ బ్యాంకింగ్, సైబర్ సెక్యూరిటీ, రిస్క్ మేనేజ్‌మెంట్ వంటి విభాగాల్లో మౌలిక సదుపాయాలు వేగంగా విస్తరిస్తున్న నేపథ్యంలో ఈ ఉద్యోగాలు భవిష్యత్‌లో మరింత ప్రాధాన్యం పొందుతాయని అంచనా.
