Central Bank of India jobs: దేశంలోని ప్రముఖ ప్రభుత్వ రంగ బ్యాంకులలో ఒకటైన సెంట్రల్ బ్యాంక్ ఆఫ్ ఇండియా మరో కీలక ఉద్యోగ నోటిఫికేషన్ను విడుదల చేసింది. బ్యాంకింగ్ రంగంలో స్థిరమైన ఉద్యోగం కోరుకునే అభ్యర్థులకు ఇది మంచి అవకాశంగా చెప్పుకోవచ్చు. ఈ నోటిఫికేషన్ ద్వారా దేశవ్యాప్తంగా ఉన్న సెంట్రల్ బ్యాంక్ ఆఫ్ ఇండియా శాఖల్లో రెగ్యులర్ ప్రాతిపదికన వివిధ స్పెషలిస్ట్ ఆఫీసర్ పోస్టులను భర్తీ చేయనున్నారు. మొత్తం 350 ఖాళీలను ఈ ప్రక్రియ ద్వారా భర్తీ చేయాలని బ్యాంక్ నిర్ణయించింది.
రెండు ప్రధాన విభాగాలకు..
ఈ నియామక ప్రక్రియలో భాగంగా రెండు ప్రధాన విభాగాలకు చెందిన పోస్టులు ఉన్నాయి. అందులో ఫారిన్ ఎక్స్చేంజ్ ఆఫీసర్ పోస్టులు 50 ఉండగా, మార్కెటింగ్ ఆఫీసర్ పోస్టులు 300 వరకు ఉన్నాయి. బ్యాంకింగ్, ఫైనాన్స్, మార్కెటింగ్ రంగాల్లో అనుభవం ఉన్న అభ్యర్థులకు ఈ అవకాశాలు ఎంతో ఉపయోగకరంగా ఉంటాయని నిపుణులు చెబుతున్నారు. ఈ ఉద్యోగాలు రెగ్యులర్ విధానంలో ఉండటం వల్ల దీర్ఘకాలిక ఉద్యోగ భద్రతతో పాటు ఆకర్షణీయమైన జీతభత్యాలు కూడా లభిస్తాయి.
బ్యాచిలర్స్ లేదా మాస్టర్స్ డిగ్రీ ..
ఈ పోస్టులకు దరఖాస్తు చేసుకునే అభ్యర్థులు తప్పనిసరిగా నిర్ణయించిన అర్హతలను కలిగి ఉండాలి. సంబంధిత విభాగంలో బ్యాచిలర్స్ లేదా మాస్టర్స్ డిగ్రీ పూర్తి చేసి ఉండటం అవసరం. అదనంగా ఎంబీఏ లేదా పీజీడీఎం వంటి ప్రొఫెషనల్ కోర్సులు పూర్తి చేసిన వారికి ప్రాధాన్యం ఉంటుంది. ఫారిన్ ఎక్స్చేంజ్ ఆఫీసర్ పోస్టులకు దరఖాస్తు చేసే వారు ఫారెక్స్ లేదా ట్రేడ్ ఫైనాన్స్ రంగంలో విద్యార్హతలతో పాటు బ్యాంకింగ్ అనుభవం కలిగి ఉండటం తప్పనిసరి. ఈ అనుభవం ఉన్న అభ్యర్థులకే ఈ విభాగంలో అవకాశం కల్పించనున్నారు.
మార్కెటింగ్ ఆఫీసర్ పోస్టులకు…
మార్కెటింగ్ ఆఫీసర్ పోస్టులకు దరఖాస్తు చేసుకునే అభ్యర్థులు మార్కెటింగ్ స్పెషలైజేషన్తో చదువులు పూర్తి చేసి ఉండాలి. అలాగే బ్యాంకింగ్, ఫైనాన్షియల్ సర్వీసెస్ అండ్ ఇన్సూరెన్స్ రంగంలో అనుభవం ఉన్నవారికి ప్రాధాన్యం ఉంటుంది. బ్యాంకు ఉత్పత్తుల ప్రచారం, కస్టమర్ బేస్ విస్తరణ, డిజిటల్ మార్కెటింగ్ వంటి అంశాలపై అవగాహన ఉన్నవారు ఈ ఉద్యోగాలకు అనుకూలంగా ఉంటారు.
వయస్సు పరిమితుల విషయానికి వస్తే పోస్టుల స్కేల్ను బట్టి వయస్సు నిర్ణయించారు. స్కేల్ 3 పోస్టులకు దరఖాస్తు చేసుకునే అభ్యర్థుల వయస్సు 30 నుంచి 38 సంవత్సరాల మధ్య ఉండాలి. స్కేల్ 1 పోస్టులకు 23 నుంచి 27 సంవత్సరాల మధ్య వయస్సు కలిగి ఉండాలి. ప్రభుత్వం నిర్ణయించిన నిబంధనల ప్రకారం రిజర్వేషన్ కేటగిరీలకు చెందిన అభ్యర్థులకు వయస్సులో సడలింపు వర్తిస్తుంది.
ఆన్లైన్ విధానంలో…
ఈ నియామక ప్రక్రియ పూర్తిగా ఆన్లైన్ విధానంలో జరుగుతుంది. అర్హులైన అభ్యర్థులు నిర్ణయించిన చివరి తేదీలోగా బ్యాంక్ అధికారిక వెబ్సైట్ ద్వారా దరఖాస్తు చేసుకోవాలి. ఆన్లైన్ రిజిస్ట్రేషన్కు చివరి తేదీ ఫిబ్రవరి 3, 2026గా నిర్ణయించారు. చివరి తేదీ తర్వాత వచ్చిన దరఖాస్తులను బ్యాంక్ పరిగణనలోకి తీసుకోదు.
దరఖాస్తు రుసుమును ..
దరఖాస్తు చేసుకునే సమయంలో అభ్యర్థులు దరఖాస్తు రుసుమును చెల్లించాలి. జనరల్ మరియు ఇతర అన్రిజర్వ్డ్ కేటగిరీలకు చెందిన అభ్యర్థులు రూ.850 రుసుము చెల్లించాలి. ఎస్సీ, ఎస్టీ మరియు దివ్యాంగ అభ్యర్థులకు రూ.175 మాత్రమే రుసుముగా నిర్ణయించారు. ఈ రుసుము ఆన్లైన్ విధానంలోనే చెల్లించాలి.
రెండు దశల్లో నియామక ప్రక్రియ..
ఎంపిక విధానం విషయానికి వస్తే రెండు దశల్లో నియామక ప్రక్రియ జరుగుతుంది. మొదట ఆన్లైన్ రాత పరీక్ష నిర్వహిస్తారు. ఈ పరీక్ష ఫిబ్రవరి లేదా మార్చి 2026లో నిర్వహించే అవకాశం ఉందని బ్యాంక్ ప్రకటించింది. రాత పరీక్షలో అర్హత సాధించిన అభ్యర్థులను పర్సనల్ ఇంటర్వ్యూకు పిలుస్తారు. ఇంటర్వ్యూ ప్రక్రియ మార్చి లేదా ఏప్రిల్ 2026లో జరగనుంది. రాత పరీక్ష మరియు ఇంటర్వ్యూలో సాధించిన మార్కుల ఆధారంగా తుది ఎంపిక చేస్తారు.
ఆకర్షణీయమైన జీతభత్యాలు..
ఎంపికైన అభ్యర్థులకు బ్యాంక్ ఆకర్షణీయమైన జీతభత్యాలు అందించనుంది. పోస్టు,స్కేల్ను బట్టి నెలకు సుమారు రూ.85,920 నుంచి రూ.1,05,280 వరకు జీతం ఉంటుంది. దీనితో పాటు ఇతర అలవెన్సులు, బ్యాంక్ నిబంధనల ప్రకారం ప్రయోజనాలు కూడా వర్తిస్తాయి. ప్రభుత్వ రంగ బ్యాంక్ ఉద్యోగం కావడంతో పెన్షన్, ప్రమోషన్ అవకాశాలు కూడా లభిస్తాయి.
సెంట్రల్ బ్యాంక్ ఆఫ్ ఇండియా దేశవ్యాప్తంగా విస్తృతమైన నెట్వర్క్ కలిగి ఉండటంతో ఎంపికైన అభ్యర్థులకు వివిధ రాష్ట్రాల్లో పని చేసే అవకాశం ఉంటుంది. బ్యాంకింగ్ రంగంలో కెరీర్ నిర్మించుకోవాలని భావిస్తున్న యువతకు ఇది ఒక మంచి అవకాశం. ముఖ్యంగా ఫైనాన్స్, ఫారెక్స్, మార్కెటింగ్ రంగాల్లో అనుభవం ఉన్నవారు ఈ నోటిఫికేషన్ను పూర్తిగా పరిశీలించి దరఖాస్తు చేసుకోవాలని సూచిస్తున్నారు.