IB ACIO 2025 Exam Pattern: దేశ భద్రతలో కీలక పాత్ర పోషించే ఇంటెలిజెన్స్‌ బ్యూరో (ఐబీ)లో ఆఫీసర్‌గా చేరాలనేది ఎందరో యువత కల. కేంద్ర హోం శాఖ తాజాగా విడుదల చేసిన 3,717 అసిస్టెంట్‌ సెంట్రల్‌ ఇంటెలిజెన్స్‌ ఆఫీసర్‌ (ACIO) పోస్టుల నోటిఫికేషన్, ఆ కలను నిజం చేసుకునేందుకు ఓ సువర్ణావకాశాన్ని ఇచ్చింది. అయితే, దేశవ్యాప్తంగా లక్షలాది మంది పోటీపడే ఈ ప్రతిష్టాత్మక ఉద్యోగాన్ని సొంతం చేసుకోవడం అంత సులభం కాదు. దీనికి సరైన వ్యూహం, పరీక్షా విధానంపై సంపూర్ణ అవగాహన అత్యంత అవసరం. అసలు ఈ పరీక్ష ఎన్ని దశల్లో ఉంటుంది..? ఏ దశకు ఎంత ప్రాధాన్యం ఉంది..? నెగెటివ్ మార్కింగ్ ఉందా..? ఏ విభాగం నుంచి ఎన్ని ప్రశ్నలు వస్తాయి..? ఈ ప్రశ్నలన్నింటికీ సమాధానాలు తెలుసుకుని, పక్కా ప్రణాళికతో సిద్ధమైతే విజయం మీ సొంతం. 

గెలుపునకు మూడు మెట్లు : ఐబీ ఏసీఐఓ ఎంపిక ప్రక్రియ ప్రధానంగా మూడు అంచెల్లో ఉంటుంది: టైర్-1 (రాత పరీక్ష), టైర్-2 (రాత పరీక్ష), ఇంటర్వ్యూ. అభ్యర్థులు ప్రతి దశను విజయవంతంగా పూర్తి చేయాల్సి ఉంటుంది.

టైర్‌-1 పరీక్ష: వేగం, కచ్చితత్వం కీలకం : ఇది ఎంపిక ప్రక్రియలో మొదటి, అత్యంత కీలకమైన ఘట్టం. ఈ పరీక్ష ఆన్‌లైన్ విధానంలో జరుగుతుంది.

పరీక్షా విధానం: పూర్తిగా ఆబ్జెక్టివ్‌ విధానంలో (బహుళైచ్ఛిక ప్రశ్నలు) ఉంటుంది.
ప్రశ్నలు-మార్కులు: మొత్తం 5 విభాగాల నుంచి 100 ప్రశ్నలు అడుగుతారు. ప్రతి ప్రశ్నకు ఒక మార్కు చొప్పున మొత్తం 100 మార్కులు.

విభాగాలు:
కరెంట్‌ అఫైర్స్ (20 ప్రశ్నలు)
జనరల్‌ స్టడీస్ (20 ప్రశ్నలు)
న్యూమరికల్‌ ఆప్టిట్యూడ్ (20 ప్రశ్నలు)
రీజనింగ్‌/లాజికల్ ఆప్టిట్యూడ్ (20 ప్రశ్నలు)
ఇంగ్లిష్‌ (20 ప్రశ్నలు)

సమయం: పరీక్ష వ్యవధి కేవలం ఒక గంట (60 నిమిషాలు). అంటే, ప్రతి ప్రశ్నకు సగటున 36 సెకన్ల సమయం మాత్రమే ఉంటుంది. వేగంతో పాటు కచ్చితత్వం చాలా ముఖ్యం.

నెగెటివ్ మార్కింగ్: అభ్యర్థులు గమనించాల్సిన ముఖ్యమైన విషయం ఇది. ప్రతి తప్పు సమాధానానికి పావు (1/4) మార్కు కోత విధిస్తారు.

అర్హత: ఈ పరీక్షలో కనీస అర్హత మార్కులు (జనరల్/EWS-35, OBC-34, SC/ST-33) సాధించిన వారి నుంచి, కేటగిరీల వారీగా ఉన్న ఖాళీలకు 10 రెట్ల సంఖ్యలో అభ్యర్థులను టైర్-2 పరీక్షకు ఎంపిక చేస్తారు.

టైర్‌-2 పరీక్ష: విశ్లేషణ సామర్థ్యానికి పరీక్ష : టైర్-1లో గట్టెక్కిన వారికి డిస్క్రిప్టివ్‌ విధానంలో ఈ పరీక్ష నిర్వహిస్తారు. ఇది అభ్యర్థి విశ్లేషణ, భావవ్యక్తీకరణ సామర్థ్యాన్ని పరీక్షిస్తుంది.
పరీక్షా విధానం: పేపర్, పెన్ విధానంలో ఉంటుంది.

మొత్తం మార్కులు: 50.
సమయం: ఒక గంట.
ప్రశ్నల స్వరూపం: వ్యాసం (Essay): 20 మార్కులు
ఇంగ్లిష్‌ కాంప్రహెన్షన్‌ & ప్రెసిస్ రైటింగ్: 10 మార్కులు

కరెంట్‌ అఫైర్స్, ఆర్థిక, సామాజిక-రాజకీయ అంశాలపై రెండు వ్యాసరూప ప్రశ్నలు: 2 x 10 = 20 మార్కులు.

అర్హత: ఈ పరీక్షలో ఉత్తీర్ణత సాధించడానికి కనీసం 17 మార్కులు (33%) పొందాలి.

ఇంటర్వ్యూ (100 మార్కులు) & తుది ఎంపిక : టైర్-2లో అర్హత సాధించిన అభ్యర్థులకు శుభవార్త! మీ టైర్-1, టైర్-2 మార్కులను కలిపి ఒక మెరిట్ జాబితాను రూపొందిస్తారు. ఈ మెరిట్ ఆధారంగా, ప్రతి కేటగిరీలోని ఖాళీలకు ఐదు రెట్ల మంది అభ్యర్థులను ఎంపిక చేసి, 100 మార్కులకు నిర్వహించే ఇంటర్వ్యూకు ఆహ్వానిస్తారు.

దరఖాస్తుకు చివరి తేదీ: ఆగస్టు 10, 2025.