Indian Army: ఇండియన్ ఆర్మీలో టెక్నికల్ విభాగాల్లో సేవలందించాలని కలలు కనే యువతకు కేంద్ర ప్రభుత్వం మరో మంచి అవకాశం కల్పించింది. షార్ట్ సర్వీస్ కమిషన్ టెక్ 67వ కోర్సుకు సంబంధించిన అధికారిక నోటిఫికేషన్‌ను భారతీయ సైన్యం తాజాగా విడుదల చేసింది. ఈ నోటిఫికేషన్ ద్వారా మొత్తం 350 టెక్నికల్ పోస్టులను భర్తీ చేయనున్నారు. ఇంజినీరింగ్ విద్యార్హత కలిగిన పురుష అభ్యర్థులు ఈ నియామకాలకు దరఖాస్తు చేసుకునే అవకాశం ఉంది.

సైన్యంలో ఆఫీసర్ హోదా..

ఈ SSC Tech 67 కోర్సు ద్వారా ఎంపికైన అభ్యర్థులకు సైన్యంలో ఆఫీసర్ హోదాలో శిక్షణ ఇచ్చి, ఆ తర్వాత విధుల్లోకి తీసుకుంటారు. ఈ కోర్సు ప్రీ కమిషనింగ్ ట్రైనింగ్ అకాడమీ పీసీటీఏలో నిర్వహించబడుతుంది. శిక్షణ 2026 అక్టోబర్ నుంచి ప్రారంభం కానుంది. ఇది పూర్తిగా టెక్నికల్ విభాగానికి సంబంధించిన కోర్సు కావడంతో ఇంజినీరింగ్ నేపథ్యం ఉన్న అభ్యర్థులకే అవకాశం కల్పించారు.

Also Read: https://teluguprabha.net/career-news/dsc-notification-update-teacher-vacancies-likely-to-increase/

బీఈ లేదా బీటెక్..

ఈ నోటిఫికేషన్ కింద సివిల్ ఇంజినీరింగ్, కంప్యూటర్ సైన్స్, ఎలక్ట్రికల్, ఎలక్ట్రానిక్స్ అండ్ కమ్యూనికేషన్, మెకానికల్, ఎంఐఎస్సీ వంటి విభాగాల్లో అభ్యర్థులను ఎంపిక చేస్తారు. ఒక్కో విభాగానికి ప్రత్యేకంగా అర్హతలు నిర్ణయించారు. సంబంధిత బ్రాంచ్‌లో బీఈ లేదా బీటెక్ పూర్తి చేసిన వారు దరఖాస్తు చేసుకోవచ్చు. ఇంకా చదువు పూర్తి కాకుండా ఫైనల్ ఇయర్‌లో ఉన్న విద్యార్థులు కూడా ఈ అవకాశాన్ని వినియోగించుకోవచ్చు. అయితే వారు 2026 అక్టోబర్ 1లోపు డిగ్రీ పూర్తిచేయాల్సి ఉంటుంది.

సైనిక శిక్షణతో పాటు..

ఈ SSC Tech 67 కోర్సు కాలపరిమితి ఒక సంవత్సరం ఉంటుంది. ఈ సమయంలో అభ్యర్థులకు సైనిక శిక్షణతో పాటు టెక్నికల్ నైపుణ్యాలను కూడా అందిస్తారు. శిక్షణ విజయవంతంగా పూర్తయిన తర్వాత ఎంపికైన వారిని భారతీయ సైన్యంలో అధికారులుగా నియమిస్తారు. ఇది షార్ట్ సర్వీస్ కమిషన్ కింద జరిగే నియామకం కావడంతో నిర్ణీత కాలానికి సేవలందించే అవకాశం ఉంటుంది.

వయస్సు పరిమితి..

అభ్యర్థుల వయస్సు పరిమితిని కూడా స్పష్టంగా పేర్కొన్నారు. 20 సంవత్సరాల నుంచి 27 సంవత్సరాల మధ్య వయస్సు ఉన్నవారే ఈ పోస్టులకు అర్హులు. అంటే 1999 అక్టోబర్ 1 నుంచి 2006 సెప్టెంబర్ 30 మధ్య జన్మించిన వారు మాత్రమే దరఖాస్తు చేసుకోవచ్చు. వయస్సు పరిమితిలో ఎలాంటి సడలింపులు లేవని నోటిఫికేషన్‌లో పేర్కొన్నారు.

ఈ నియామకాల్లో ఫిజికల్ ఫిట్నెస్‌కు కూడా ప్రాధాన్యం ఇస్తారు. అభ్యర్థులు నోటిఫికేషన్‌లో పేర్కొన్న శారీరక ప్రమాణాలను తప్పనిసరిగా పూర్తి చేయాలి. 10 నిమిషాల 30 సెకన్లలోపు 2.4 కిలోమీటర్ల పరుగు పూర్తి చేయాలి. అదేవిధంగా కనీసంగా 40 పుష్ అప్స్, 6 పుల్ అప్స్, 30 సిట్ అప్స్ చేయగలగాలి. ఈ పరీక్షలతో పాటు ఈతలో ప్రాథమిక నైపుణ్యం ఉండటం కూడా అవసరం.

దరఖాస్తు ప్రక్రియ పూర్తిగా ఆన్‌లైన్ విధానంలో జరుగుతుంది. అర్హులైన అభ్యర్థులు 2026 జనవరి 7 నుంచి అధికారిక వెబ్‌సైట్ ద్వారా అప్లై చేసుకోవచ్చు. దరఖాస్తు చేసుకునేందుకు చివరి తేదీ ఫిబ్రవరి 5, 2026గా నిర్ణయించారు. ఈ తేదీ తర్వాత వచ్చిన దరఖాస్తులను స్వీకరించరు.

ఇంటర్వ్యూ ఆధారంగా..

ఎంపిక ప్రక్రియలో ఎలాంటి రాత పరీక్ష ఉండదు. అభ్యర్థులు అందించిన విద్యార్హతలు, గ్రాడ్యుయేషన్ మార్కులు, షార్ట్ లిస్టింగ్,ఎస్‌ఎస్‌బీ ఇంటర్వ్యూ ఆధారంగా తుది ఎంపిక చేస్తారు. అర్హతల పరిశీలన తర్వాత ఫిజికల్ స్టాండర్డ్స్ పరీక్షలు నిర్వహించి చివరకు ఎంపికైన వారిని ప్రకటిస్తారు.

Also Read: https://teluguprabha.net/career-news/dsc-notification-update-teacher-vacancies-likely-to-increase/

శిక్షణ సమయంలో ఎంపికైన అభ్యర్థులకు నెలకు రూ.56,100 వరకు స్టైపెండ్ చెల్లిస్తారు. శిక్షణ పూర్తయ్యాక విధుల్లోకి చేరిన తర్వాత వేతనం మరింత పెరుగుతుంది. ఆఫీసర్ హోదాలో సేవలందించే వారికి నెలకు గరిష్టంగా రూ.1,77,500 వరకు జీతం లభిస్తుంది. దీనితో పాటు ప్రభుత్వ నిబంధనల ప్రకారం ఇతర అలవెన్సులు కూడా వర్తిస్తాయి.