Government jobs after degree : “డిగ్రీ చదివితే ఏం ఉద్యోగం వస్తుంది?” ఈ ప్రశ్న నేటి యువతను, వారి తల్లిదండ్రులను తొలిచేస్తున్న అతిపెద్ద సందేహం. అయితే, కేవలం ఆ మూడేళ్ల పట్టాతోనే దేశ అత్యున్నత సర్వీసుల నుంచి రాష్ట్ర స్థాయి కొలువుల వరకు ఎన్నో అవకాశాల ద్వారాలు తెరుచుకుంటాయని మీకు తెలుసా? చదువుతున్నప్పుడే కొలువు కొట్టవచ్చని, డిగ్రీ పాఠ్యాంశాలే విజయానికి సోపానాలని ఇటీవలి గ్రూప్స్ విజేతలు నిరూపిస్తున్నారు. అసలు డిగ్రీ విద్యార్థి దశ నుంచే ఉన్నత ఉద్యోగాలకు రూట్ మ్యాప్ ఎలా సిద్ధం చేసుకోవాలి? కళాశాలలు అందిస్తున్న తర్ఫీదును ఎలా సద్వినియోగం చేసుకోవాలి? సిద్దిపేట విద్యార్థులు వందల సంఖ్యలో ఉద్యోగాలు సాధించడం వెనుక ఉన్న రహస్యం ఏమిటి? ఈ ప్రశ్నలకు సమాధానాలు తెలుసుకుంటే, మీ భవిష్యత్తు కూడా బంగారుమయమే!

దేశంలో సివిల్ సర్వెంట్ కావాలన్నా, రాష్ట్రంలో గ్రూప్-1 అధికారి కావాలన్నా, బ్యాంకులో ప్రొబేషనరీ ఆఫీసర్‌గా చేరాలన్నా.. వీటన్నింటికీ మూలం, పునాది ఒక్కటే – ఏదైనా గ్రాడ్యుయేషన్ డిగ్రీ. అది మూడేళ్ల ఆర్ట్స్, సైన్స్ డిగ్రీ కావచ్చు లేదా నాలుగేళ్ల బీటెక్ కావచ్చు. సరైన ప్రణాళిక, కాస్త శ్రద్ధతో డిగ్రీ చదువుతున్న దశలోనే కొలువు సాధించి, జీవితంలో ఉన్నత శిఖరాలకు చేరవచ్చు.

చదువుతూనే కొలువు.. ప్రణాళికే బలం : గతంలో డిగ్రీ పూర్తయ్యాక కోచింగ్‌లకు వెళ్లి ఉద్యోగాలకు ప్రయత్నించేవారు. కానీ ఇప్పుడు ట్రెండ్ మారింది. డిగ్రీ మొదటి లేదా రెండో సంవత్సరంలో ఉండగానే ప్రభుత్వ ఉద్యోగాలకు సన్నద్ధమవ్వడం, విజయం సాధించడం పరిపాటిగా మారింది.

ప్రత్యక్ష నిదర్శనం – గ్రూప్స్ విజేతలు: ఇటీవలి కాలంలో రాష్ట్రంలో గ్రూప్స్ ఉద్యోగాలు సాధించిన వారిలో అత్యధికులు డిగ్రీ చదువుతున్నప్పటి నుంచే ప్రిపరేషన్ ప్రారంభించిన వారే. డిగ్రీ పాఠ్యాంశాలైన చరిత్ర, పాలిటీ, ఎకానమీ, జాగ్రఫీ వంటివే పోటీ పరీక్షల సిలబస్‌కు పునాదిగా ఉండటం వారికి కలిసొచ్చింది.

అవకాశాల గని: యూపీఎస్సీ నిర్వహించే సివిల్స్, ఎన్‌డీఏ నుంచి మొదలుకొని.. రాష్ట్ర పబ్లిక్ సర్వీస్ కమిషన్ల గ్రూప్స్, యూనిఫాం సర్వీసులు (పోలీస్, ఆర్మీ), పోస్టల్, రైల్వే రిక్రూట్‌మెంట్ బోర్డ్ (RRB), బ్యాంకింగ్, స్టాఫ్ సెలక్షన్ కమిషన్ (SSC), బోధన రంగాల వరకు.. ఇలా అన్నింటా డిగ్రీ అర్హతతో కొలువుల పంట పండించవచ్చు.

విజయానికి చిరునామా.. సిద్దిపేట కళాశాలల మార్గం : ప్రణాళికాబద్ధమైన తర్ఫీదు అందిస్తే విద్యార్థులు అద్భుతాలు సృష్టిస్తారని సిద్దిపేట ప్రభుత్వ అటానమస్ డిగ్రీ కళాశాల నిరూపిస్తోంది. ఇక్కడి విద్యార్థులు ఏటా వందల సంఖ్యలో ప్రభుత్వ, ప్రైవేటు రంగాల్లో ఉద్యోగాలు సాధిస్తూ, మరికొందరు వ్యాపారవేత్తలుగా ఎదుగుతున్నారు.
కళాశాల స్థాయిలో తర్ఫీదు: పోటీ పరీక్షలకు అవసరమైన శిక్షణను కళాశాల స్థాయిలోనే అందిస్తున్నారు.

ఆచరణాత్మక విద్య: ఇంటర్న్‌షిప్‌లు, ప్రాజెక్టులు, క్షేత్రస్థాయి పర్యటనలు, సదస్సుల ద్వారా విద్యార్థులకు ఆచరణాత్మక పరిజ్ఞానాన్ని అందిస్తున్నారు.

ప్రాంగణ నియామకాలు: ప్రముఖ కంపెనీలతో అవగాహన ఒప్పందాలు (MOU) కుదుర్చుకుని, క్యాంపస్ ప్లేస్‌మెంట్ల ద్వారా ఉద్యోగాలు కల్పిస్తున్నారు. కేవలం గత ఏడాదిలోనే ఈ కళాశాల నుంచి 400 మంది విద్యార్థులు ఉద్యోగాలు సాధించడం వారి కృషికి నిదర్శనం.

విజేతల మాటల్లో..
“సిద్దిపేట మహిళా డిగ్రీ కళాశాలలో హెచ్​ఈపీ కోర్సు చేస్తూనే గ్రూప్స్ లక్ష్యంగా చదివాను. డిగ్రీ పాఠ్యాంశాలు ఉద్యోగ సాధనకు ఎంతో ఉపయోగపడ్డాయి. 2023లో గ్రూప్​-4కు ఎంపికై ప్రస్తుతం సిద్దిపేట మున్సిపల్​ వార్డు అధికారిణిగా పనిచేస్తున్నా.”
– దాసరి రసజ్ఞ, నంగునూరు.

“సిద్దిపేట ప్రభుత్వ డిగ్రీ కళాశాలలో ఎంపీపీఎస్​ చదివాను. ఎన్​సీసీ-సీ సర్టిఫికేట్​తో మొదట నేవీలో, ఆ తర్వాత సెంట్రల్​ ఆర్మ్‌డ్​ పోలీసు ఫోర్సెస్‌లో ఇండో టిబెటిన్​ బోర్డర్​ పోలీసుగా ఉద్యోగం సాధించాను. ప్రస్తుతం తమిళనాడులో శిక్షణలో ఉన్నా.”
– కె.స్వామి, కొడకండ్ల.

విజయానికి ఐదు సూత్రాలు :
ప్రామాణిక పుస్తకాలే ప్రాణం: సబ్జెక్టులకు అనుగుణంగా SCERT, NCERT పాఠ్యపుస్తకాలను క్షుణ్ణంగా చదవాలి.
గ్రంథాలయమే గుడి: అందుబాటులో ఉన్న గ్రంథాలయాన్ని సద్వినియోగం చేసుకుని అదనపు పరిజ్ఞానాన్ని పెంచుకోవాలి.
తరగతులకు క్రమం తప్పొద్దు: 80% పైగా హాజరు ఉంటే సబ్జెక్టుపై పట్టు, ఉపాధ్యాయులతో మంచి సంబంధాలు ఏర్పడతాయి.
సోషల్ మీడియాకు దూరం: సోషల్ మీడియాపై సమయాన్ని వృథా చేయకుండా, లక్ష్యంపై దృష్టి పెట్టాలి.
ప్రభుత్వ శిక్షణను వాడండి: ప్రభుత్వం అందించే TSKC, TASK వంటి శిక్షణా కార్యక్రమాలను పూర్తిగా వినియోగించుకోవాలి.