RRB NTPC Graduate Applications Started from Today: ఏటా క్రమం తప్పకుండా ఉద్యోగాలకు నోటిఫికేషన్‌ రిలీజ్‌ చేసే ఆర్‌ఆర్‌బీ.. ఇప్పుడు ఏకంగా 5,810 ఉద్యోగాల భర్తీకి దరఖాస్తులు ఆహ్వానిస్తోంది. దేశంలోని పలు రైల్వే జోన్లలో నాన్ టెక్నికల్ పాపులర్ కేటగిరీ (ఎన్‌టీపీసీ గ్రాడ్యుయేట్‌) పోస్టుల భర్తీకి ఇప్పటికే నోటిఫికేషన్‌ విడుదల చేసింది. నేటి నుంచే ఈ ఉద్యోగాలకు రిజిస్ట్రేషన్‌ ప్రారంభం కానుంది. ఈ నోటిఫికేషన్‌ ద్వారా చీఫ్ కమర్షియల్ కమ్ టికెట్ సూపర్‌వైజర్, స్టేషన్ మాస్టర్, గూడ్స్ ట్రైన్ మేనేజర్, ట్రాఫిక్‌ అసిస్టెంట్‌, జూనియర్ అకౌంట్ అసిస్టెంట్ కమ్ టైపిస్ట్, సీనియర్ క్లర్క్ కమ్ టైపిస్ట్ పోస్టులను భర్తీ చేయనుంది. ఈ ఉద్యోగాలకు నవంబర్‌ 20లోపు దరఖాస్తు చేసుకోవాల్సి ఉంటుంది.

పోస్టులు, జోన్ల వారీగా ఖాళీలు..

ఆర్‌ఆర్‌బీ ఎన్‌టీపీసీ నోటిఫికేషన్‌ ద్వారా 161 చీఫ్ కమర్షియల్ కమ్ టికెట్ సూపర్‌ వైజర్, 615 టేషన్ మాస్టర్, 3416 గూడ్స్ ట్రైన్ మేనేజర్, 921 జూనియర్ అకౌంట్స్ అసిస్టెంట్ కమ్ టైపిస్ట్, 638 సీనియర్ క్లర్క్ కమ్ టైపిస్ట్, 59 ట్రాఫిక్ అసిస్టెంట్ ఇలా మొత్తం 5,810 పోస్టులను భర్తీ చేయనుంది. ఇక, జోన్ల వారీగా ఖాళీలను పరిశీలిస్తే.. సికింద్రాబాద్ జోన్‌లో 396, అహ్మదాబాద్ 79, అజ్మీర్ 345, బెంగళూరు 241, గువాహటి 56, భువనేశ్వర్ 231, బిలాస్‌పూర్ 864, చండీగఢ్ 199, చెన్నై 187, గోరఖ్‌పుర్ 111, జమ్ము & శ్రీనగర్ 32, కోల్‌కతా 685, మాల్దా 522, ముంబయి 596, ముజఫర్‌పూర్ 21, పట్నా 23, ప్రయాగ్‌రాజ్ 110, తిరువనంతపురం 58, రాంచీ 651, సిలిగురి 21 జోన్లలో ఎన్‌టీపీసీ గ్రాడ్యుయేట్‌ ఖాళీలను భర్తీ చేయనుంది.

అర్హతలు ప్రమాణాలు..

గుర్తింపు పొందిన యూనివర్సిటీ నుంచి బ్యాచిలర్స్ డిగ్రీ లేదా సమానమైన ఉత్తీర్ణత కలిగి ఉండాలి. సీనియర్ క్లర్క్ కమ్ టైపిస్ట్, జూనియర్ అకౌంట్ అసిస్టెంట్ కమ్ టైపిస్ట్ పోస్టులకు డిగ్రీతో పాటు కంప్యూటర్‌లో ఇంగ్లిష్ లేదా హిందీలో టైపింగ్ ప్రావీణ్యం తప్పనిసరి వచ్చి ఉండాలి. వయోపరిమితి విషయానికి వస్తే.. అభ్యర్థుల వయస్సు 2026 జనవరి 1 నాటికి 18 నుంచి 33 ఏళ్ల మధ్య ఉండాలి. ఓబీసీలకు మూడేళ్లు, ఎస్సీ, ఎస్టీలకు ఐదేళ్లు, దివ్యాంగ అభ్యర్థులకు పదేళ్ల వయో సడలింపు ఉంటుంది. దరఖాస్తు ఫీజు విషయానికి వస్తే.. ఎస్సీ, ఎస్టీ, ఎక్స్‌ సర్వీస్‌మెన్‌, పీడబ్ల్యూబీడీ, మహిళలు, ఈడబ్ల్యూఎస్‌ అభ్యర్థులకు ఫీజు రూ. 250, ఇతర అభ్యర్థులకు దరఖాస్తు రుసుము రూ. 500గా నిర్ణయించారు.

సెలెక్షన్‌ ప్రాసెస్‌..

నియామక ప్రక్రియలో మొదటి దశలో కంప్యూటర్ ఆధారిత పరీక్ష (సీబీటీ), రెండో దశలో కంప్యూటర్ ఆధారిత పరీక్ష (సీబీటీ), మూడో దశలో కంప్యూటర్ ఆధారిత టైపింగ్ స్కిల్ టెస్ట్/కంప్యూటర్ ఆధారిత ఆప్టిట్యూడ్ టెస్ట్ ఉంటుంది. ఈ పరీక్షల్లో ప్రతిభ కనబర్చిన వారికి డాక్యుమెంట్ వెరిఫికేషన్, మెడికల్ ఎగ్జామినేషన్ ఉంటాయి. సీబీటీల్లో నెగిటివ్ మార్కింగ్(1/3 విధానం) అమల్లో ఉంటుంది.

ఇంపార్టెంట్‌ డేట్స్‌..

ఈరోజే (అక్టోబర్‌ 21)న ఆన్‌లైన్ దరఖాస్తు ప్రక్రియ ప్రారంభమైంది. నవంబర్ 20 వరకు దరఖాస్తు చేసుకోవచ్చు. ఇక, దరఖాస్తు ఫీజును నవంబర్ 22లోపు చెల్లించాల్సి ఉంటుంది. దరఖాస్తులో ఏమైనా తప్పులుంటే నవంబర్ 23 నుంచి డిసెంబర్ 02 వరకు సరిచేసుకోవాల్సి ఉంటుంది.

అప్లికేషన్‌ ప్రాసెస్‌..

1. ముందుగా ఆర్ఆర్‌బీ అధికారిక వెబ్‌సైట్‌లోకి వెళ్లండి.

2. హోమ్ పేజీలోని ‘ఆర్‌ఆర్‌బీ ఎన్‌టీపీసీ గ్రాడ్యుయేట్ రిక్రూట్‌మెంట్ 2026’ లింక్‌పై క్లిక్ చేయండి.

3. మీ రిజిస్ట్రేషన్ వివరాలను ఎంటర్‌ చేయండి.

4. అభ్యర్థి వివరాలతో అకౌంట్‌లోకి లాగిన్ అవ్వండి.

5. దరఖాస్తు ఫామ్ నింపి ఫీజు చెల్లించండి.

6. చివరగా సబ్‌మిట్‌పై క్లిక్ చేసి పేజీని డౌన్‌లోడ్ చేసుకోండి. తదుపరి అవసరం కోసం హార్డ్ కాపీని భద్రపరచుకోండి.