UPSC Mains 2025 Results Release Check on Official Website: యూనియన్ పబ్లిక్ సర్వీస్ కమిషన్ (యూపీఎస్సీ) సివిల్ సర్వీసెస్ ఎగ్జామినేషన్స్ (CSE 2025) మెయిన్ ఫలితాలు విడుదలయ్యాయి. ఇవాళ (బుధవారం) మధ్యాహ్నం ఈ ఫలితాలను యూపీఎస్సీ రిలీజ్‌ చేసింది. మెయిన్స్‌ పరీక్షలకు హాజరైన అభ్యర్థులు యూపీఎస్సీ అధికారిక వెబ్‌సైట్‌లో తమ రిజల్ట్‌ను చెక్‌ చేసుకోవచ్చని తెలిపింది. దేశవ్యాప్తంగా ఈ ఏడాది ఆగస్టు 22వ తేదీ నుంచి 31వ తేదీ వరకు యూపీఎస్సీ సివిల్ సర్వీసెస్‌ మెయిన్స్‌ పరీక్షలు జరిగాయి. దేశవ్యాప్తంగా పలు పరీక్ష కేంద్రాల్ ఈ పరీక్షలను నిర్వహించారు. మెయిన్స్‌ పరీక్షలో అర్హత సాధించిన వారిని మాత్రమే ఫైనల్‌ ఇంటర్వ్యూకి పిలుస్తారు. కాగా, తాజా ఫలితాల్లో మొత్తం 2,736 మంది అభ్యర్థులు ఇంటర్వ్యూ (పర్సనాలిటీ టెస్ట్ రౌండ్‌)లకు ఎంపికైనట్లు తెలుస్తోంది. ఇంటర్వ్యూ పూర్తయిన తర్వాత మెయిన్స్‌, ఇంటర్వ్యూకి కలిపి వచ్చిన మొత్తం మార్కులతో మెరిట్‌ లిస్ట్‌ విడుదల చేస్తారు. ఫైనల్‌గా వచ్చిన మార్కుల ఆధారంగా ఇండియన్ అడ్మినిస్ట్రేటివ్ సర్వీస్ (ఐఏఎస్‌), ఇండియన్ ఫారిన్ సర్వీస్ (ఐఎఫ్‌ఎస్‌), ఇండియన్ పోలీస్ సర్వీస్ (ఐపీఎస్‌)తో పాటు ఇతర సెంట్రల్ సర్వీసెస్ అయిన గ్రూప్ ‘ఏ’ గ్రూప్ ‘బి’ వంటి పోస్టులకు అభ్యర్ధులను ఎంపిక చేస్తారు.

త్వరలోనే ఇంటర్వ్యూ షెడ్యూల్‌..

కాగా, మెయిన్స్‌ పరీక్షలో ఆర్హత సాధించిన అభ్యర్థులకు ఇంటర్వ్యూ తేదీని త్వరలోనే యూపీఎస్సీ ప్రకటించనుంది. ఈ ఇంటర్వ్యూలు న్యూఢిల్లీ షాజహాన్ రోడ్‌లో ఉన్న ధోల్‌పూర్ హౌస్‌లోని యూనియన్ పబ్లిక్ సర్వీస్ కమిషన్ కార్యాలయంలో జరుగుతాయని అధికారులు వెల్లడించారు. పర్సనాలిటీ టెస్ట్ (ఇంటర్వ్యూ) షెడ్యూల్‌ను త్వరలోనే వెబ్‌సైట్‌లో అందుబాటులో ఉంచుతారు. అభ్యర్థుల పర్సనాలిటీ టెస్ట్ (ఇంటర్వ్యూలు) ఈ-సమ్మన్ లెటర్లు కూడా వారికి పంపిస్తారు. వీటిని కమిషన్ వెబ్‌సైట్ నుండి డౌన్‌లోడ్ చేసుకోవచ్చు. కాగా, ఈ ఏడాది మొత్తం 979 పోస్టులను కమిషన్‌ ఎంపిక చేయనుండగా.. 2,736 మంది అభ్యర్థులు ఇంటర్వూలకు హాజరుకానున్నారు.

ఫలితాలను ఇలా చెక్‌ చేసుకోండి..

1. యూపీఎస్సీ సివిల్ సర్వీసెస్ మెయిన్స్ ఫలితాలను చెక్‌ చేయడానికి అభ్యర్థులు తొలుత యూపీఎస్సీ అధికారిక వెబ్‌సైట్‌ను సందర్శించాలి.
2. హోమ్ పేజీలో యూపీఎస్సీ సివిల్ సర్వీసెస్ మెయిన్స్ రిజల్ట్ 2025 లింక్‌పై క్లిక్ చేయాలి.
3. వెంటనే స్క్రీన్‌పై కొత్త పీడీఎఫ్‌ ఫైల్ ఓపెన్‌ అవుతుంది. ఇందులో మీ అడ్మిట్‌ కార్డ్ నెంబర్‌ను చెక్‌ చేసుకోవాలి. అనంతరం రిజల్ట్‌ పేజీని డౌన్‌లోడ్ చేసుకోవాలి.
4. ఇంటర్వ్యూకి ఈ మెయిన్‌ రిజల్ట్‌ కాపీని తీసుకెళ్లాల్సి ఉంటుంది. అందుకే, భవిష్యత్తు అవసరాల కోసం హార్డ్ కాపీని భద్రపరచుకోవాలి.