Zoho jobs:చాలా మంది మహిళలు జీవితంలో ఒక దశలో కుటుంబ అవసరాల కారణంగా తమ ఉద్యోగాలకు విరామం ఇవ్వాల్సి వస్తుంది. పిల్లల సంరక్షణ, కుటుంబ బాధ్యతలు, ఆరోగ్య సమస్యలు లేదా ఇతర వ్యక్తిగత కారణాలతో చదువు పూర్తయినా లేదా మంచి ఉద్యోగంలో ఉన్నా పని కొనసాగించలేని పరిస్థితులు ఏర్పడతాయి. ముఖ్యంగా టెక్నాలజీ రంగంలో పనిచేసిన మహిళల్లో ఈ పరిస్థితి ఎక్కువగా కనిపిస్తుంది. కొన్నేళ్ల పాటు ఉద్యోగానికి దూరంగా ఉండడం వల్ల మళ్లీ కెరీర్ మొదలుపెట్టాలని ప్రయత్నించినప్పుడు అవకాశాలు తగ్గిపోతాయి. నైపుణ్యాలు ఉన్నప్పటికీ ఉద్యోగ విరామం కారణంగా ఎంపిక ప్రక్రియలో వెనుకబడే పరిస్థితి చాలా మందిని నిరుత్సాహానికి గురిచేస్తుంది.
జోహో మహిళల కోసం ప్రత్యేకంగా..
ఇలాంటి సమస్యను గుర్తించిన భారతీయ ఐటీ దిగ్గజ సంస్థ జోహో మహిళల కోసం ప్రత్యేకంగా ఒక కార్యక్రమాన్ని రూపొందించింది. ఉద్యోగాలకు విరామం వచ్చిన తర్వాత మళ్లీ టెక్ రంగంలోకి రావాలనుకునే మహిళలకు మద్దతు ఇవ్వడమే ఈ ప్రయత్నం ప్రధాన ఉద్దేశ్యం. జోహో స్కూల్ ఆఫ్ లెర్నింగ్ ద్వారా ప్రారంభించిన ఈ కొత్త కార్యక్రమానికి మరుపడి అనే పేరు పెట్టారు. ఈ కార్యక్రమం మహిళలకు మళ్లీ కెరీర్ ప్రారంభించే దారిని సులభం చేయాలని లక్ష్యంగా పెట్టుకుంది.
టెక్నాలజీ, కొత్త నైపుణ్యాల అవసరం..
కుటుంబ పరిస్థితులు మారిన తర్వాత లేదా పిల్లలు కొంత పెద్దయ్యాక మళ్లీ ఉద్యోగం చేయాలనే ఆశతో చాలా మంది మహిళలు ప్రయత్నాలు చేస్తుంటారు. కానీ మారుతున్న టెక్నాలజీ, కొత్త నైపుణ్యాల అవసరం, ఉద్యోగ విరామం వంటి అంశాలు వారికి అడ్డంకులుగా మారుతాయి. ఈ సమస్యలను దృష్టిలో పెట్టుకుని జోహో నేరుగా ఉద్యోగం ఇవ్వడం కాకుండా ముందుగా శిక్షణ అందించే విధానాన్ని ఎంచుకుంది. దీని ద్వారా మహిళలు నెమ్మదిగా టెక్ రంగానికి అలవాటు పడే అవకాశం ఉంటుంది.
మళ్లీ కెరీర్ ప్రారంభించాలనుకునే గృహిణులు లేదా ప్రస్తుతం ఎలాంటి ఉద్యోగం చేయని మహిళలు ఈ కార్యక్రమానికి దరఖాస్తు చేసుకోవచ్చు. ఎంపికైన వారికి సుమారు ఐదు నెలల పాటు ప్రత్యేక శిక్షణ ఇవ్వనున్నారు. ఈ శిక్షణ సమయంలో టెక్నాలజీకి సంబంధించిన ప్రాథమిక అంశాల నుంచి ఆధునిక సాఫ్ట్ వేర్ నైపుణ్యాల వరకు క్రమంగా నేర్పిస్తారు. సాఫ్ట్ వేర్ డెవలప్ మెంట్, టెక్నికల్ రైటింగ్ వంటి విభాగాల్లో అవసరమైన నైపుణ్యాలపై ప్రధానంగా దృష్టి సారిస్తారు.
మహిళలకు ఆర్థిక భారం..
శిక్షణ కాలంలో మహిళలకు ఆర్థిక భారం లేకుండా ఉండేందుకు నెలవారీ స్టైఫండ్ కూడా అందిస్తారు. ఇది కుటుంబ అవసరాలను కొంత మేర తీర్చుకునేందుకు సహాయపడుతుంది. శిక్షణ పూర్తయ్యాక పనికి సిద్ధంగా ఉన్న వారిని జోహో సంస్థలోనే ఉద్యోగాల్లోకి తీసుకుంటారు. ఇలా శిక్షణ నుంచి ఉద్యోగం వరకు ఒక స్పష్టమైన మార్గాన్ని ఈ కార్యక్రమం అందిస్తోంది.
ఈ కార్యక్రమానికి దరఖాస్తు చేసుకునే మహిళలకు కొన్ని అర్హతలు ఉన్నాయి. ప్రస్తుతం ఎలాంటి ఉద్యోగం చేయకుండా ఉండాలి. గతంలో కనీసం రెండు సంవత్సరాలు టెక్నాలజీ రంగంలో పని చేసిన అనుభవం ఉండాలి. వయస్సుకు ఎలాంటి పరిమితి లేదు. డిగ్రీ, డిప్లొమా లేదా డిస్టెన్స్ ఎడ్యుకేషన్ ద్వారా చదువు పూర్తి చేసిన మహిళలు కూడా అర్హులే. అయితే ప్రస్తుతం ఉద్యోగంలో ఉన్న వారు ఈ కార్యక్రమానికి అర్హులు కారు.
జోహోలో ఐటీ ఉద్యోగాలు…
శిక్షణను విజయవంతంగా పూర్తిచేసిన మహిళలకు జోహోలో ఐటీ ఉద్యోగాలు కల్పిస్తారు. ఈ ఉద్యోగాలు మంచి వేతనంతో ఉంటాయని సంస్థ స్పష్టం చేసింది. లక్షల్లో జీతం పొందే అవకాశం ఉండటంతో పాటు టెక్ రంగంలో తిరిగి స్థిరపడే అవకాశం లభిస్తుంది. కొందరికి ఇంటి నుంచే పని చేసే అవకాశాలు కూడా ఉండవచ్చని సమాచారం. దీంతో కుటుంబ బాధ్యతలు చూసుకుంటూనే కెరీర్ కొనసాగించే అవకాశం మహిళలకు లభిస్తుంది.
ఈ కార్యక్రమం ద్వారా మహిళలు తమ నైపుణ్యాలను మళ్లీ ఉపయోగించుకునే అవకాశం పొందుతారు. ఒకప్పుడు టెక్ రంగంలో పని చేసి అనుభవం సంపాదించిన వారు మధ్యలో వచ్చిన విరామాన్ని భయపడకుండా తిరిగి ముందుకు సాగవచ్చు. ఉద్యోగ విరామం అనేది ప్రతిభకు అడ్డంకి కాదని నిరూపించడమే జోహో లక్ష్యంగా కనిపిస్తోంది.
మహిళలకు అనుకూలమైన వాతావరణాన్ని కల్పిస్తూ, శిక్షణతో పాటు ఉద్యోగ భద్రతను అందించే ఈ కార్యక్రమం అనేక మందికి ప్రేరణగా నిలుస్తోంది. చదువు, అనుభవం ఉన్నా అవకాశం లేక వెనకడుగు వేసిన మహిళలకు ఇది ఒక కొత్త ఆశగా మారింది. టెక్నాలజీ రంగంలో మళ్లీ తమ స్థానం సంపాదించాలనుకునే మహిళలు ఈ అవకాశాన్ని సద్వినియోగం చేసుకోవచ్చని జోహో చెబుతోంది.