72nd National Film Awards 2026 winners  : దేశవ్యాప్తంగా సినీ ప్రియులు అత్యంత ఉత్కంఠతో ఎదురుచూసిన ’72వ జాతీయ చలనచిత్ర అవార్డుల’ (72nd National Film Awards 2026) విజేతల జాబితా ఎట్టకేలకు అధికారికంగా వెలువడింది. 2024 క్యాలెండర్ సంవత్సరంలో సెన్సార్ పూర్తి చేసుకున్న ఉత్తమ చిత్రాలు, నటీనటులు, సాంకేతిక నిపుణుల ప్రతిభను గౌరవిస్తూ కేంద్ర సమాచార, ప్రసారాల మంత్రిత్వ శాఖ శనివారం సాయంత్రం ఈ పురస్కారాలను ప్రకటించింది. ఈసారి అవార్డుల రేసులో ఎన్నో ఆశ్చర్యకరమైన పరిణామాలు చోటుచేసుకున్నాయి. మరి ‘ఉత్తమ నటుడు’ విభాగంలో ఈసారి ఎవరెవరు అగ్రస్థానాన్ని పంచుకున్నారు? ఉత్తమ తెలుగు చిత్రంగా ఏ సినిమా నిలిచింది? ‘పుష్ప-2’, ‘కల్కి’ చిత్రాలకు దక్కిన పురస్కారాలు ఏమిటి? ఈ ప్రతిష్టాత్మక అవార్డుల పూర్తి జాబితాను ఈ ప్రత్యేక కథనంలో తెలుసుకుందాం…

ఢిల్లీ వేదికగా ప్రతిభా పురస్కారాలు : భారత చలనచిత్ర పరిశ్రమలో అత్యంత ప్రతిష్ఠాత్మకమైన ’72వ జాతీయ చలనచిత్ర అవార్డుల’ (72nd National Film Awards) ఫలితాలు అధికారికంగా వెలువడ్డాయి. కేంద్ర సమాచార, ప్రసారాల మంత్రిత్వ శాఖ శనివారం (జూలై 18) న్యూఢిల్లీలోని నేషనల్ మీడియా సెంటర్లో నిర్వహించిన ప్రెస్ కాన్ఫరెన్స్‌లో విజేతల పూర్తి జాబితాను ప్రకటించింది. ప్రముఖ మలయాళ దర్శకుడు జయరాజ్ నేతృత్వంలోని 11 మంది సభ్యుల జ్యూరీ ఈ ఎంపికను పూర్తి చేసింది. 2024 జనవరి 1 నుండి డిసెంబర్ 31 వరకు సెంట్రల్ బోర్డ్ ఆఫ్ ఫిల్మ్ సర్టిఫికేషన్ (CBFC) ద్వారా సెన్సార్ పూర్తి చేసుకున్న చిత్రాలను ఈ పురస్కారాలకు పరిగణనలోకి తీసుకున్నారు.

ఉత్తమ నటులుగా మమ్ముట్టి, కార్తీక్ ఆర్యన్ : 72వ జాతీయ చలనచిత్ర అవార్డుల్లో నటన విభాగంలో ఈసారి హోరాహోరీ పోటీ సాగింది. చివరికి ఉత్తమ నటుడు (Best Actor) పురస్కారాన్ని ఇద్దరు ప్రతిభావంతులు పంచుకోవడం విశేషం. మలయాళ హర్రర్ థ్రిల్లర్ భ్రమయుగం చిత్రంలో తన నటనతో ప్రేక్షకులను భయపెట్టి, మైమరిపించిన మలయాళ అగ్ర నటుడు మమ్ముట్టి ఈ పురస్కారాన్ని అందుకున్నారు. ఆయనతో పాటు బాలీవుడ్ స్పోర్ట్స్ బయోపిక్ చిత్రం చందు ఛాంపియన్ కోసం అసాధారణ శారీరక మార్పును సొంతం చేసుకుని విమర్శకుల ప్రశంసలు పొందిన యువ నటుడు కార్తీక్ ఆర్యన్ కూడా సంయుక్తంగా ఉత్తమ నటుడి అవార్డును గెలుచుకున్నారు.

ఉత్తమ నటిగా యామీ గౌతమ్.. ఉత్తమ చిత్రంగా ‘శ్రీకాంత్’ : రాజకీయ, భద్రతా నేపథ్యంలో తెరకెక్కిన సంచలన చిత్రం ఆర్టికల్ 370 లో తన అద్భుతమైన నటనతో ఆకట్టుకున్న బాలీవుడ్ నటి యామీ గౌతమ్ ఉత్తమ నటి (Best Actress) గా పురస్కారాన్ని అందుకున్నారు. ఇక, ఈ ఏడాది అత్యంత ప్రతిష్టాత్మకమైన ఉత్తమ ఫీచర్ ఫిలిం (Best Feature Film) అవార్డును తుషార్ హిరానందని దర్శకత్వంలో తెరకెక్కిన బయోపిక్ చిత్రం శ్రీకాంత్ కైవసం చేసుకుంది. అంధుడైన పారిశ్రామికవేత్త శ్రీకాంత్ బొల్లా జీవిత కథ ఆధారంగా రాజ్‌కుమార్ రావు ప్రధాన పాత్రలో నటించిన ఈ చిత్రం జూరీ సభ్యుల మనసులను గెలుచుకుంది. ఈ చిత్రం ఉత్తమ హిందీ చిత్రంగా కూడా అవార్డు పొందింది.

తెలుగు సినిమా సత్తా – ‘కమిటీ కుర్రోళ్లు’కు పట్టం : జాతీయ స్థాయిలో మరోసారి తెలుగు సినిమా తన జెండా ఎగురవేసింది. వైవిధ్యమైన కథలతో సాగే చిన్న సినిమాలు కూడా జాతీయ వేదికపై రాణించగలవని నిరూపిస్తూ.. మెగా డాటర్ నిహారిక కొణిదెల సమర్పణలో, యదు వంశీ దర్శకత్వం వహించిన కమిటీ కుర్రోళ్లు చిత్రం ఉత్తమ ప్రాంతీయ తెలుగు చిత్రంగా నిలిచింది. పల్లెటూరి వాతావరణం, స్నేహం, సామాజిక అంశాలను అద్భుతంగా తెరకెక్కించినందుకు ఈ చిత్రానికి అవార్డు దక్కింది. అంతేకాకుండా, ఈ సినిమాకు అద్భుతమైన మేకప్ అందించినందుకు గాను పి. రవికుమార్ ఉత్తమ మేకప్ ఆర్టిస్ట్ అవార్డును గెలుచుకున్నారు.

‘పుష్ప-2’, ‘కల్కి’, ‘అమరన్’ చిత్రాలకు అవార్డుల పంట : ఈసారి తెలుగు మరియు దక్షిణాది చిత్రాలు సాంకేతిక విభాగాలలో అవార్డుల సింహభాగాన్ని కైవసం చేసుకున్నాయి.

పుష్ప-2: ది రూల్: ఈ చిత్రానికి గాను అద్భుతమైన స్క్రీన్‌ప్లే అందించిన దర్శకుడు సుకుమార్ ఉత్తమ ఒరిజినల్ స్క్రీన్‌ప్లే (Best Screenplay – Original) అవార్డును గెలుచుకున్నారు. అలాగే దీపాలి నూర్,  శీతల్ శర్మ ఉత్తమ కాస్ట్యూమ్ డిజైనర్లుగా అవార్డు అందుకున్నారు.
కల్కి 2898 ఏడీ: సైన్స్ ఫిక్షన్ వండర్‌గా తెరకెక్కిన ఈ చిత్రం బెస్ట్ ప్రొడక్షన్ డిజైన్ విభాగంలో అవార్డు గెలుచుకుంది.
అమరన్ (తమిళం): ఈ ప్రతిష్టాత్మక ఆర్మీ బయోపిక్ చిత్రానికి గాను రాజ్‌కుమార్ పెరియసామి ఉత్తమ దర్శకుడిగా (Best Director) అవార్డు గెలుచుకున్నారు. జి.వి. ప్రకాష్ కుమార్ ఉత్తమ సంగీత దర్శకుడిగా (బ్యాక్‌గ్రౌండ్ స్కోర్) అవార్డు అందుకోగా, ఆర్. కలైవానన్ ఉత్తమ ఎడిటర్‌గా నిలిచారు.

లక్కీ భాస్కర్: వెంకీ అట్లూరి ఉత్తమ సంభాషణల రచయితగా (Best Screenplay – Dialogue) జాతీయ అవార్డు గెలుచుకున్నారు.

35 చిన్న కథ కాదు: ఈ హృదయానికి హత్తుకునే చిత్రం ఉత్తమ బాలల చిత్రంగా నిలిచింది. అలాగే ఈ సినిమాలో అద్భుత నటన కనబరిచిన చైల్డ్ ఆర్టిస్ట్ అరుందేవ్‌ పోతుల ఉత్తమ బాలనటుడిగా (Best Child Artist) పురస్కారాన్ని గెలుచుకున్నాడు.

ఇతర ప్రధాన విభాగాలలో విజేతల వివరాలు:
ఉత్తమ తమిళ చిత్రం: రాయాన్ (దర్శకుడు: ధనుష్)
ఉత్తమ కన్నడ చిత్రం: మిథ్య (దర్శకుడు: సుమంత్ భట్)
ఉత్తమ మలయాళ చిత్రం: ఫెమినిచ్చి ఫాతిమా
ఉత్తమ బెంగాలీ చిత్రం: చల్చిత్ర ఎఖోన్ (దర్శకుడు: అంజన్ దత్)
ఉత్తమ కొరియోగ్రఫీ: స్త్రీ 2 (విజయ్ గంగూలీ)
ఉత్తమ యాక్షన్ డైరెక్షన్: మహారాజా (అన్ల్ అరసు)
ఉత్తమ సౌండ్ డిజైన్: భూల్ భులయ్యా 3 (మానస్ చౌదరి)
ఉత్తమ నేరేటర్: సౌందర్య జయచంద్రన్ (లిటిల్ ప్లానెట్: ఏ టేల్ ఆఫ్ ఫ్రాగ్స్)
ఉత్తమ నేపథ్య గాయకుడు: అభయ్ జోధ్‌పూర్‌కర్
ఉత్తమ నేపథ్య గాయని: వైకోమ్ విజయలక్ష్మి (మలయాళ చిత్రం: ARM)