Trisha Krishnan: రెండు దశాబ్దాలుగా తెలుగు, తమిళ చిత్ర పరిశ్రమల్లో అగ్రతారగా కొనసాగుతున్న త్రిష కృష్ణన్ ఇప్పటికీ తన కెరీర్‌లో దూసుకుపోతున్నారు. ఆమెతో పాటు సినీ రంగ ప్రవేశం చేసిన చాలా మంది నటీమణులు ఇప్పటికే తెరమరుగైపోగా, కొందరు రెండవ ఇన్నింగ్స్ మొదలు పెట్టి తల్లి, అక్క వంటి పాత్రల్లో నటిస్తున్నారు. కానీ త్రిష మాత్రం ఇప్పటికీ సీనియర్ స్టార్ హీరోలకు జోడీగా ప్రధాన నాయికగా కొనసాగుతుండటం విశేషం. ఇటీవల కమల్ హాసన్‌తో కలిసి ఆమె నటించిన ‘థగ్ లైఫ్’ చిత్రం బాక్సాఫీస్ వద్ద ఆశించిన స్థాయిలో విజయం సాధించకపోయినా, త్రిష మాత్రం ఏమాత్రం నిరుత్సాహపడకుండా తన సినిమా జర్నీని కొనసాగిస్తున్నారు.
ఈ ఏడాదిలో ఇప్పటికే త్రిష నటించిన నాలుగు చిత్రాలు విడుదలయ్యాయి. సగం సంవత్సరం కూడా పూర్తి కాకుండానే ఇన్ని సినిమాలు విడుదలయ్యాయంటే త్రిష ఎంత బిజీగా ఉన్నారో అర్థం చేసుకోవచ్చు. విడుదలైన నాలుగు చిత్రాల్లో మూడు తమిళ చిత్రాలు కాగా, ఒకటి మలయాళ చిత్రం. ఇక రాబోయే రోజుల్లో తెలుగులో ‘విశ్వంభర’ తో పాటు, తమిళంలో ‘కురుప్పు’ చిత్రాలతో త్రిష ప్రేక్షకుల ముందుకు రాబోతున్నారు. ఈ రెండు చిత్రాలపై భారీ అంచనాలు నెలకొన్నాయి.
ఆలయానికి రోబోటిక్ ఏనుగు బహుమతి:
ప్రస్తుతం త్రిష నటించిన సినిమాలు విడుదలకు సిద్ధంగా లేనప్పటికీ, ఆమె చేసిన ఒక మంచి పని కారణంగా వార్తల్లో నిలిచారు. ఈ మధ్య కాలంలో చాలా మంది సినీ తారలు ఆలయాలకు యాంత్రిక ఏనుగులు (రోబోటిక్ ఎలిఫెంట్స్) బహుమానంగా ఇస్తున్నారు. నిజమైన ఏనుగులను బంధించి దైవ సేవలో ఉపయోగించడం సరైనది కాదని కొన్ని స్వచ్ఛంద సంస్థలు భావిస్తున్నాయి. ఈ నేపథ్యంలో, పలు ఆలయాలకు మెకానికల్ లేదా రోబోటిక్ ఏనుగులను బహూకరించే కార్యక్రమాన్ని చేపట్టాయి.
తాజాగా, నటి త్రిష కూడా ఒక స్వచ్ఛంద సంస్థతో కలిసి ఒక రోబోటిక్ ఏనుగును ఆలయానికి బహుమతిగా ఇచ్చారు. ఇటీవలే ఆ ఏనుగు ఆలయానికి చేరుకుందని, త్రిష మంచి మనసుతో ఈ బహుమతిని అందించినందుకు భక్తులు కృతజ్ఞతలు తెలుపుతూ సోషల్ మీడియాలో పోస్టులు చేశారు.
అరుప్పు కొట్టైలోని అష్టలింగ ఆదిశేష సెల్వవినాయకర్ ఆలయానికి త్రిష ఈ మర ఏనుగును బహుకరించారు. ఆలయ సిబ్బంది ఈ ఏనుగుకు ‘గజ’ అని పేరు పెట్టినట్లు తెలిపారు. స్థానిక స్వచ్ఛంద సంస్థ పీపుల్స్ ఫర్ క్యాటిల్ ఇండియా సహకారంతో త్రిష ఈ బహుమతిని అందజేశారని స్థానికులు చెబుతున్నారు.
ఈ మధ్యకాలంలో రథ యాత్రలు, ఉత్సవాల సమయంలో నిజమైన ఏనుగుల వల్ల తొక్కిసలాటలు జరిగి, ప్రతి సంవత్సరం అనేక మంది మరణించిన సంఘటనలు చోటు చేసుకుంటున్నాయి. అందుకే, ఆలయాల్లో పూజలు, ఉత్సవాల కోసం నిజమైన ఏనుగులకు బదులుగా ఇలాంటి మర ఏనుగులను ఉపయోగించడం అన్ని విధాలా ప్రయోజనకరమని అభిప్రాయం వ్యక్తమవుతోంది. అందుకే పలువురు సినీ తారలు తమ స్థాయికి తగ్గట్టుగా ఇలాంటి ఏనుగులను ఆలయాలకు బహుమానంగా ఇస్తూ, సామాజిక బాధ్యతను చాటుకుంటున్నారు. ఇది పర్యావరణ పరిరక్షణకు, జంతు సంరక్షణకు ఒక మంచి అడుగుగా పరిగణించబడుతోంది.