Boby deol : పవన్ కళ్యాణ్ హీరోగా డైరెక్టర్ క్రిష్ దర్శకత్వంలో తెరకెక్కుతున్న సినిమా హరిహర వీరమల్లు. ఎప్పుడో రెండేళ్ల క్రితం మొదలైన ఈ సినిమా కరోనాతో, పవన్ పొలిటికల్ షెడ్యూల్స్ తో వాయిదా పడుతూ వస్తుంది. ఇటీవలే ఈ సినిమా షూట్ ని శరవేగంగా చేయడం మొదలుపెట్టారు. ఎలాగైనా 2023 సమ్మర్ కి సినిమాని విడుదల చేయాలని చిత్ర యూనిట్ ఫిక్స్ అయ్యారు.
ఈ సినిమా పిరియాడికల్ స్టోరీ. పవన్ మొదటి సారిగా ఓ పిరియాడికల్ సినిమాలో నటించడం, అందులోను సాహసాలు చేసే బందిపోటుగా నటిస్తుండటంతో సినిమాపై చాలానే అంచనాలు ఉన్నాయి. ఇటీవలే రామోజీ ఫిలిం సిటీలో యాక్షన్ సన్నివేశాల్ని తెరకెక్కించారు. ఇందులో పవన్ సరసన నిధి అగర్వాల్ నటిస్తుంది. మరో బాలీవుడ్ భామ కూడా ఉండబోతుంది. తాజాగా ఈ సినిమాలో మరో బాలీవుడ్ నటుడు కీలక పాత్ర పోషించనున్నట్టు చిత్ర యూనిట్ అధికారికంగా ప్రకటించారు.
ప్రముఖ బాలీవుడ్ నటుడు బాబీ డియోల్ హరిహర వీరమల్లు సినిమాలో మొఘల్ చక్రవర్తి ఔరంగజేబు పాత్రలో కనిపించనున్నాడు. దీంతో ఈ సినిమా మొఘల్ కాలానికి చెందిన కథ అని అర్ధమవుతుంది. ఇక ఈ సినిమాని పాన్ ఇండియా లెవల్లో విడుదల చేయనున్నారు.
