కన్నడ స్టార్ హీరో రిషభ్ శెట్టి(Risabh Shetty) హీరోగా నటిస్తోన్న పాన్ ఇండియా చిత్రం ‘కాంతార చాప్టర్ 1’ (Kantara Chapter 1). భారీ బడ్జెట్‌తో తెరకెక్కుతున్న ఈ చిత్రం విడుదల తేదీని తాజాగా మేకర్స్ ప్రకటించారు. ఈమేరకు రిలీజ్ పోస్టర్ విడుదల చేశారు. మహాత్మ గాంధీ జయంతి కానుకగా వచ్చే ఏడాది అక్టోబర్ 2న సినిమా విడుదల చేయనున్నట్లు ఆ పోస్టర్‌లో పేర్కొంది. ఇప్పటికే ఈ చిత్రం షూటింగ్ మొదలైంది. కొన్ని కీలక సన్నివేశాలను తెరకెక్కించారు.
కాగా ‘కాంతార’మూవీతో దేశవ్యాప్తంగా గుర్తింపు తెచ్చుకున్నారు రిషభ్ శెట్టి. కన్నడలో 2022లో చిన్న సినిమాగా విడుదలైన ఈచిత్రం బాక్సాఫీస్‌ వద్ద వసూళ్ల సునామీ సృష్టించింది. రూ.16 కోట్ల బడ్జెట్‌తో తెరకెక్కిన ఈ సినిమా రూ.450 కోట్లు వసూలు చేసింది. ఈ చిత్రానికి గాను ఉత్తమ నటుడిగా రిషభ్ శెట్టి జాతీయ అవార్డు అందుకున్నారు. ‘కాంతార’కు ప్రీక్వెల్‌గా ‘కాంతార: చాప్టర్ 1’ రానుండడంతో దీనిపై భారీ అంచనాలు ఏర్పడ్డాయి. హోంబలే ఫిల్మ్ బ్యానర్‌ మీద విజయ్‌ కిరంగదూర్‌ ఈ చిత్రాన్ని నిర్మిస్తున్నారు.